សិល្បៈជាតិ៖ ថ្មីៗនេះផលិតកម្ម វ័នឌើរហ្វីម អេនធើធេនម៉ីន និងផលិតកម្ម អឺរ៉ាយ ភីកឈ័រ ដែលជាផលិតកម្មផលិតភាពយន្តនៅក្នុងប្រទេសកម្ពុជា បានចុះកិច្ចព្រមព្រៀងចាប់ដៃគូសហការគ្នាជាមួយក្រុមហ៊ុន Tham Studio 19 ដែលជាក្រុមហ៊ុនផលិត និងចែកចាយភាពយន្តនៅឯប្រទេសថៃ។
ការចុះកិច្ចសហប្រតិបត្តិការនេះធ្វើឡើងកាលពីថ្ងៃទី ៦ តុលា កន្លងមកក៏បានសម្រេចនូវសមិទ្ធផលនាំយកខ្សែភាពយន្តខ្មែររបស់ផលិតកម្ម វ័នឌើរហ្វីម អេនធើធេនម៉ីន រឿង កំណើតអរូប ជាប្រភេទភាពយន្តរន្ធត់ដែលទទួលបានការគាំទ្រយ៉ាងច្រើនពីសំណាក់ប្រជាជនកម្ពុជា ហើយគ្រោងនិងបង្ហាញខ្លួននៅប្រទេសឡាវ នៅថ្ងៃទី១៩ ខែតុលា នឹងនៅប្រទេសថៃ នៅថ្ងៃទី៣០ ខែវិច្ឆិកា ឆ្នាំ២០២៣ ខាងមុខនេះផងដែរ។
ជាមួយគ្នានេះដែរ ផលិតកម្ម វ័នឌើរហ្វីម អេនធើធេនម៉ីន ក៏មានខ្សែភាពយន្តមួយទៀត គឺរឿង កុំដេក គ្រោងនិងចាក់បញ្ចាំងនៅដើមឆ្នាំ២០២៤។ សម្រាប់ការចាប់ដៃគូគ្នានេះ ក្រុមហ៊ុនទាំងខ្មែរ-ថៃនិងបន្តសហការគ្នាឱ្យកាន់តែខ្លាំងក្នុងការចែកចាយភាពយន្តខ្មែរឱ្យបានកាន់តែទូលំទូលាយ និងអភិវឌ្ឍន៍គម្រោងផលិតភាពយន្តរួមគ្នានាពេលអនាគតបន្តទៅមុខទៀត។
នេះចាត់ទុកជាជំហ៊ានថ្មីមួយទៀតរបស់ផលិតកម្ម វ័នឌើរហ្វីម អេនធើធេនម៉ីន និងផលិតកម្ម អឺរ៉ាយ ភីកឈ័រ ដែលប្រកាន់ខ្ជាប់ទស្សនៈ និងចក្ខុវិស័យរបស់ខ្លួន ក្នុងការនាំយកភាពយន្តខ្មែរឆ្ពោះទៅកាន់ទីផ្សារអន្តរជាតិ ក៏ដូចជាការនាំយកនូវភាពទំនើបនៃភាពយន្តពីអន្តរជាតិមកជួយជំរុញឧស្សហកម្មភាពយន្តខ្មែរឱ្យកាន់តែរីកចម្រើនទៅមុខ។ ហេតុដូច្នេះហើយ ទើបច្រើនឆ្នាំមកនេះ វ័នឌើរហ្វីម នៅក្រាញ់នរនាលក្នុងវិស័យភាពយន្តខ្មែរ ទោះអំឡុងពេលដ៏ពិបាកនៃការត្បាតជំងឺកូវីដ១៩នៅលើសកលលោក រួមទាំងកម្ពុជា ក៏ វ័នឌើរហ្វីម នៅតែរិះរកគ្រប់មធ្យោបាយដើម្បីផលិតភាពយន្តឱ្យមានគុណភាព ត្រៀមវាយលុកចូលទីផ្សារអន្តរជាតិ ដូចអ្វីដែលកំពុងធ្វើនៅពេលនេះ៕