ក្រុមជម្រើសជាតិកម្ពុជា នឹងប្រកួតទល់ក្រុមម្ចាស់ផ្ទះប៉ាគីស្ថាន ក្នុងវគ្គជម្រុះជុំទី១ ជើងទី២ នៃពានរង្វាន់បាល់ទាត់ពិភពលោក FIFA World Cup 2026 ប្រចាំទ្វីបអាស៊ី ដែលការប្រកួតនឹងចាប់ផ្តើមនៅវេលាម៉ោង ២:០០ រសៀល (៤:០០ នាទីល្ងាច ម៉ោងនៅកម្ពុជា) ក្នុងកីឡដ្ឋាន Jinnah Sports ស្ថិតក្នុងទីក្រុង អ៊ីស្លាម៉ាបាដ ប្រទេសប៉ាគីស្ថាន។
ស្របពេលដែលលោក Félix Dalmás គ្រូបង្វឹករបស់ក្រុមជម្រើសជាតិកម្ពុជា បានលើកឡើងក្នុងកម្មវិធីសន្នីសិទសារព័ត៌មាន មុនការប្រកួតថា៖«ជាដំបូងពួកយើងសូមអរគុណដល់ប៉ាគីស្ថានដែលទទួលស្វាគមន៍យើងបានយ៉ាងល្អតាំងពីព្រលានយន្តហោះរហូតមកដល់សណ្ឋាគារ ប្រជាជននៅទីនេះពិតជារួសរាយជាមួយពួកយើង ហើយពួកយើងរីករាយដែលបានមកទីនេះ ។ ពួកយើងមើលឃើញថាប៉ាគីស្ថានជាក្រុមដែលរៀបចំបានល្អ ពួកគេបាននាំយកកីឡាករមកពីអឺរ៉ុបមួយចំនួនដើម្បីលេងតំណាងក្រុមរបស់ពួកគេ និងកីឡាករនៅក្នុងប្រទេស ប៉ុន្តែយើងក៏ត្រៀមខ្លួនហើយដូចគ្នាក្នុងការប្រយុទ្ធនៅថ្ងៃស្អែកនេះ ដើម្បីយកជ័យជម្នះជូនប្រទេសកម្ពុជា» ។
ដោយឡែកលោក Stephen Constantine គ្រូបង្វឹករបស់ក្រុមជម្រើសជាតិប៉ាគីស្ថាន បានលើកឡើងថា៖«ពួកយើងពិតជាត្រេកត្រអរដែលបានធ្វើការប្រកួតនៅទឹកដីរបស់យើង ដែលខកខានធ្វើនៅទីនេះអស់រយៈពេល៨ឆ្នាំរួមមកហើយ។ ខ្ញុំបានដឹងរួចមកហើយថាកម្ពុជា ជាក្រុមមួយដែលមានច្បាប់ទំលាប់រៀបចំបានល្អ ហើយការប្រកួតនេះគឺជាប្រកួតដែលតានតឹងមួយសម្រាប់យើង និងកម្ពុជា។ យើងនឹងធ្វើឱ្យបានសម្រេចនូវលទ្ធផលមួយដែលល្អ»។
សូមរំលឹកថា ក្រុមគោរព្រៃកម្ពុជា បានត្រឹមស្មើគ្នាជាមួយក្រុមប៉ាគីស្ថាន ដោយលទ្ធផល ០-០ ក្នុងការប្រកួតជើងទី១ ដែលកម្ពជា ជាម្ចាស់ផ្ទះ កាលពីថ្ងៃទី១២ ខែតុលា ឆ្នាំ២០២៣ កន្លងទៅ ក្នុងពហុកីឡដ្ឋានជាតិ(អូឡាំពិក)។
រវាងកម្ពុជា និងប៉ាគីស្ថាន ប្រសិនបើក្រុមណាអាចយកឈ្នះក្នុងការប្រកួតជើងទី២នេះ គឺនឹងត្រូវឡើងទៅកាន់វគ្គបន្ត នៅជុំទី២ ដោយមានក្រុមជើងខ្លាំង អារ៉ាប៊ីសាអូឌីត, ហ្ស៊កដានី និងតាជីគីស្ថាន ដែលកំពុងតែឈររងចាំនៅក្នុងពូល G ស្រាប់៕