សិល្បៈជាតិ៖ តារាសម្ដែង ប្រុសខួច បានធ្វើឱ្យមហាជនជាច្រើនងាកមកចាប់អារម្មណ៍ជាថ្មីម្ដងទៀត បន្ទាប់ពីលោកបង្ហោះរូបភាពជាច្រើនសន្លឹកស្ដែងឱ្យឃើញពីគំនិតច្នៃប្រតិដ្ឋក្នុងការគ្រងឈុតសម័យពាក់មុខខ្មុក។
ជាមួយគំនិតច្នៃប្រឌិតបែបសហសម័យនេះ តារាសម្ដែង ប្រុស ខួច បានបង្ហោះចំណាប់អារម្មណ៍យ៉ាងដូច្នោះ ៖ «បុរាណលាយជាមួយសហសម័យ អភិរក្សនឹងអភិវឌ្ឍន៍ ត្រូវតែរួមគ្នាដើម្បីបង្កើតបង្កើនឡើងមកថែមទៀត របស់ដូនតាត្រូវតែថែរក្សា តែយើងជាកូនចៅត្រូវរកអ្វីបន្ថែមពីលើឱ្យកាន់តែបានច្រើន ក្រុងរាពណ៌នឹងព្រះរាម ដកស្រង់ចេញពីរឿងព្រះរាមព្រះល័ក្ខ ខុសឆ្កងសុំចិត្តបងប្អូនកុំប្រកាន់ #ខ្ញុំស្រលាញ់វប្បធម៍ខ្មែរ»។
គួរមើលថា គំនិតនេះ បើទោះបីជាកើតឡើងបន្ទាប់លោក ខាត់ វ៉ៃហាំង បានបង្ហាញមុនកាលពីឆ្នាំ ២០២២ គ្រងឈុតអាវធំបុរស រចនាបថគោមក្បាច់ ដ៏ទាន់សម័យសម្រិតសម្រាំងច្នៃជាពិសេសសម្រាប់ពិធីចូលឆ្នាំខ្មែរប្រពៃណីជាតិ ដោយរួមបញ្ចូលគ្នារវាងសិល្បៈបុរាណក្នុងទម្រង់តួអង្គ ក្រុងរាពណ៌ ក៏ពិតមែន ក៏ប៉ុន្តែមហាជននៅតែកោតសរសើរចំពោះ ប្រុសខួច ដែលជាតារាសម្ដែងប្រុសទី២ដែលបានបន្តស្មារតីបំផុសគំនិតនេះជាបន្តបន្ទាប់ទៀត។
សូមជម្រាបថា លោក លី សុខគីមសាន ហៅប្រុសខួច គឺជាតារាសម្តែងរាងសង្ហាមួយរូបដែលបានតស៊ូពុះពារឧបសគ្គជាច្រើនក្នុងជីវិត ទម្រាំបានក្លាយជាតារាសម្តែងល្បីឈ្មោះដូចបច្ចុប្បន្ន។ មុនចូលសិល្បៈ លោកធ្លាប់ទៅរស់នៅ មណ្ឌលកុមារកំព្រារ ខេត្តបន្ទាយមានជ័យជាង៤ឆ្នាំ ដោយសារតែឪពុកម្ដាយបានបែកបាក់គ្នា ហើយក៏បានចំណាកស្រុកចេញទៅធ្វើការនៅប្រទេសថៃ។ ក្រោយវិលប្រឡប់មកស្រុកកំណើតវិញ លោកក៏តស៊ូក្នុងជីវិតរហូតក្លាយជាតារាសម្តែង ទទួលបាន ប្រជាប្រិយភាពដូចបច្ចុប្បន្ននេះ៕