សិល្បៈជាតិ៖ ខណៈនេះកញ្ញាឯកដ៏ស្រស់សោភា ចន សុទិម៉ា Miss Universe កម្ពុជា ឆ្នាំ២០២៣ កំពុងតែបំពេញបេសកកម្មតំណាងជាតិនៅប្រទេស អែលសាល់វ៉ាឌ័រ។ ឆ្នាំនេះស្រីស្អាតតំណាងឱ្យប្រទេសកម្ពុជាទទួលបាននូវការចាប់អារម្មណ៍ច្រើនណាស់ មិនត្រឹមតែហ្វេននៅក្នុងប្រទេសកម្ពុជានោះទេ ដែលបានដាក់ក្ដីរំពឹងខ្ពស់លើរូបកញ្ញា សូម្បីតែអ្នកគាំទ្រអន្តរជាតិក៏ចាប់អារម្មណ៍កញ្ញាមិនស្ទើរនោះដែរ រហូតមានអ្នកគាំទ្រវិស័យនេះជាច្រើនរូបហ៊ានព្យាករណ៍ថាបេក្ខនារីកម្ពុជារូបនេះ ទំនងជាទទួលបានកៅអីលំដាប់ Top ដោយមិនបាច់ពិបាកប្រឹងនោះឡើយ។
បើទោះបីជាធ្លាប់បរាជ័យច្រើនដងលើវិថីប្រកួតសម្រស់ ទម្រាំនឹងទទួលបានឱកាសធំជាកញ្ញាឯកតំណាងជាតិ នៅលើវេទិកាអន្តរជាតិ ប៉ុន្តែបើក្រឡេកមើលទៅអតីតកាល ពីមួយលើកទៅមួយលើក ពីមួយប្រកួតទៅមួយប្រកួត ពេលត្រលប់មកឈរលើវេទិកាប្រកួតវិញ ចន សុទិម៉ា រមែងបង្កើនសមត្ថភាពរបស់ខ្លួនជាប់ជានិច្ច។
ឆ្នាំនេះ ចន សុទិម៉ា Miss Universe Cambodia ទៅដល់ទីណាល្បីផ្អើលកក្រើក និងទទួលបានការចាប់អារម្មណ៍ច្រើននៅទីនោះ ព្រោះមិនថាជាហ្វេនជនជាតិអ្វីក៏ពិបាកនឹងដកខ្សែភ្នែកចេញពីកញ្ញាណាស់ ដោយសារតែ រាងតូចស្រឡូន កម្ពស់ខ្ពស់សមសួន ចំណែកទម្រង់ក៏ស្អាតប្រៀបដូចជានារីកូនកាត់ រហូតដល់ថ្នាក់ហ្វេនៗជនជាតិថៃលាន់មាត់ថា៖ «អូ កម្ពុជា នាងស្អាតណាស់! កម្ពុជា មែនអត់? កម្ពុជា ស្អាតណាស់!, នាងស្អាតដូចគេនិយាយពិតមែន! ហើយមើលរ៉ូបដែលស្លៀកចុះ ប្លែកភ្នែកមែនទែន កម្ពុជា! អូយស្អាតណាស់ អូយ! កម្ពុជាឆ្នាំនេះស្អាតខ្លាំងណាស់អ្នកទាំងអស់គ្នា»
ក្រៅពីនោះគេមើលឃើញផេកគាំទ្រវិស័យប្រកួតសម្រស់ជាច្រើនបានផ្ដោតការចាប់អារម្មណ៍ជាពិសេសចំពោះស្រីស្អាតតំណាងឱ្យកម្ពុជា ដោយ Miss Universe Cambodia យើងរមែងមានឈ្មោះក្នុងលំដាប់ Top នៃការព្យាករណ៍ ឬទស្សន៍ទាយលំដាប់ខ្ពស់ៗនៃកម្មវិធី Miss Universe ពិភពលោក ពីបណ្ដាអ្នកជំនាញក្នុងវិស័យនេះជាប់ជានិច្ច។
គួរដឹងថា ចន សុទិម៉ា ជាបេក្ខនារីខ្មែរដំបូង អាចឈានជើងចូលដល់វគ្គ Top5 ក្នុងចំណោមបេក្ខនារីទាំង៥០ប្រទេស ដែលបានទៅចូលរួមក្នុងកម្មវិធីប្រកួតកម្រិតអន្តរជាតិ Miss Tourism International 2019 នាទីក្រុងកូឡាឡាំពួ ប្រទេសម៉ាឡេស៊ី កាលពីឆ្នាំ ២០១៩ ដោយកញ្ញាទទួលបានពានរង្វាន់ និង មកុដ «Miss Dream Girl of The year International 2019/2020» ឬលំដាប់រងទី៤ Top4 ក្នុងកម្មវិធីនេះ៕
