សិល្បៈជាតិ៖ គេច្រើនមើលឃើញថាអ្នករកស៊ី អ្នកជំនួញ ឬអ្នកមានអាជីព ដូចគ្នារមែងទុកគ្នាជាគូប្រជែងឬសត្រូវ ប៉ុន្តែសម្រាប់ផលិតករភាពយន្តខ្មែរ ពាក្យនេះហាក់ដូចជាប្រើមិនត្រូវនោះឡើយ ព្រោះកន្លងមកគេសង្កេតឃើញថាផលិតករក្ដី ចាងហ្វាងផលិតកម្មក្ដី អ្នកដឹកនាំក្ដី ពោលបុគ្គលដែលបំពេញការងារលើវិស័យភាពយន្តខ្មែររមែងរួបរួមគ្នា ជួយផ្សព្វផ្សាយពីភាពយន្តខ្មែរជានិច្ច។
ថ្មីៗនេះ ផលិតកម្ម LD Entertainment ទើបតែបញ្ចេញស្នាដៃភាពយន្តខ្នាតធំ កម្រិតស្ដង់ដារអន្តរជាតិ ដែលជារឿងមានខ្ទង់ចំណាយខ្ពស់ និងប្រមូលផ្ដុំទៅដោយតារាសម្ដែងល្បីៗមកពីបណ្ដាប្រទេសក្នុងតំបន់អាស៊ានដូចជា មីយ៉ាន់ម៉ា ថៃ និង វៀតណាមជាដើម។ ខណៈដែលរឿងនេះកំពុងបញ្ចាំងនៅតាមបណ្ដារោងភាពយន្តនានាៗ ក្រៅពីចាងហ្វាងផលិតកម្ម និងបុគ្គលិកពាក់ព័ន្ធ បានព្យាយាមប្រូម៉ូតផ្សព្វផ្សាយពីរឿងនេះ គេឃើញចាងហ្វាងផលិតកម្ម Wonderfilm លោក សែម វិសាល បានចូលរួមជួយផ្សព្វផ្សាយសាច់រឿងមួយនេះនៅលើបណ្ដាញទំនាក់ទំនងសង្គមរបស់ខ្លួន។ សកម្មភាពរបស់លោកនេះ ត្រូវបានលោក លៀក លីណា អ្នកចាត់ការទូទាំងផលិតកម្ម LD រំភើបចិត្តហើយបានចូលមកអរគុណចំពោះទឹកចិត្តដ៏ល្អរបស់លោក សែម វិសាល។
មិនត្រឹមបង្ហាញស្មារតីជួយគ្នាតែប៉ុណ្ណឹងទេ ផលិតករភាពយន្ត «កុំដេក» បានជូនពរឱ្យភាពយន្តខ្មែររឿង «ប្រុសលក់ខ្លួន» ទទួលបានជោគជ័យ ដោយលោកបានសរសេរថា៖ សុំឱ្យជោគជ័យខ្លាំង លីណា យក 1M អោយបានមើល។ ដោយភាគីលោក លៀក លីណា បានឆ្លើយតបវិញថា ៖ «បាទបង For Real Filmmaker» ឬ «បាទបង ដើម្បីអ្នកផលិតកុនពិតប្រាកដ»។
កន្លងមកគេឃើញភាគី លោក លៀក លីណា ក៏បានចូលរួមជួយប្រូម៉ូតនិងផ្សព្វផ្សាយ ក៏ដូចជាអបអរសាទរដែរនៅពេលដែលភាពយន្ត «កណើតអរូប» ក្ដី រឿង «កុំដេក» ក្ដី របស់ផលិតកម្ម Wonderfilm មានលោក សែម វិសាល ជាចាងហ្វាងផលិតកម្ម ត្រូវបានយកទៅចាក់បញ្ចាំងនៅតាមរោងភាពយន្តក្នុងប្រទេសថៃ និង ឡាវ ដែលនេះគឺជាទង្វើសបញ្ជាក់ពីសាមគ្គីភាពរវាងអ្នកផលិតភាពយន្ត ដែលមានស្មារតីរួមគ្នាគឺជួយជំរុញឱ្យវិស័យភាពយន្តខ្មែរកាន់តែការអភិវឌ្ឍន៍ដើរឆ្ពោះទៅមុខទាន់បណ្ដាប្រទេសនានា៕
