ក្រុមបាល់ទាត់ Police Tero FC សមាជិកលីគកំពូលថៃ (Thai League 1) បានប្រកាសតែងតាំងលោក Sinthaweechai ជាគ្រូបង្វឹក និងលោក Worrawoot ជានាយកបច្ចេកទេស ពោលគឺ២ថ្ងៃបន្ទាប់ពីលោក Thanya Wongnak ប្រកាសចាកចេញពីតួនាទីជាអ្នកចាត់ការក្រុម Police Tero និងលោក Angsan Viwatchaichok បានសម្រេចចិត្តលាឈប់ពីតួនាទីគ្រូបង្វឹក។
គួរដឹងថាកាលពីថ្ងៃចន្ទ ទី៦ ខែវិច្ឆិកា ឆ្នាំ២០២៣ ក្លិបបាល់ទាត់ Police Tero FC បានធ្វើសន្និសីទសារព័ត៌មាន មួយដោយប្រកាសពីដៃគូវិនិយោគថ្មី នោះគឺព្រះអង្គម្ចាស់នរោត្តម រ៉ាវីចក្រ។
បើតាមសារព័ត៌មានរបស់ប្រទេសថៃ បានបញ្ជាក់ថា ព្រះរាជវង្សានុវង្សទាំងបីអង្គរបស់ប្រទេសកម្ពុជា ដែលដឹកនាំដោយព្រះអង្គម្ចាស់ នរោត្តម អម្រឹតវង្ស ព្រះបាទនរោត្តម នរិនថាពង្ស និងព្រះអង្គម្ចាស់នរោត្តម រ៉ាវីចក្រ បានចូលរួមកាន់កាប់ ភាគហ៊ុនសរុបរបស់ក្លិបចំនួន ៤៩% ហើយគោលដៅរបស់ព្រះអង្គចង់នាំក្លិបនេះឱ្យឈរនៅលំដាប់ក្លិបខ្លាំងកំពូលទាំង៣ (Top 3) នៅរដូវកាលក្រោយ ដើម្បីយកកៅអីទៅប្រកួតពានរង្វាន់កម្រឹតទ្វីប AFC Champions League ឡើងវិញ។
ក្លិបបាល់ទាត់ Police Tero FC កន្លងមកស្ថិតក្រោមការគ្រប់គ្រងរបស់ Tero Entertainment និងអគ្គស្នងការដ្ឋាននគរបាលជាតិថៃ (Royal Thai Police) ដែលមានលោក Brian L.Marcar ជាប្រធានក្លិប។
សូមបញ្ជាក់ថាព្រះអង្គម្ចាស់ នរោត្តម រ៉ាវីចក្រ ធ្លាប់មានបំណងចង់កាន់កាប់ក្លិប Saints Etienne ដែលមានប្រវត្តិល្បីល្បាញរបស់ប្រទេសបារាំង កាលពីប៉ុន្មានឆ្នាំមុន ប៉ុន្តែមិនជោគជ័យនោះឡើយ ដោយសារបញ្ហាឯកសារទ្រព្យសម្បត្តិ និងរឿងមួយចំនួនទៀត។
ក្លិបបាល់ទាត់ Police Tero បង្កើតឡើងដំបូងនៅឆ្នាំ១៩៩២ ឈ្មោះ Sasana Witthaya School Football Team ប៉ុន្តែមានការប្តូរឈ្មោះជាបន្តបន្ទាប់ ទៅជា Tero Sasana FC នៅឆ្នាំ១៩៩៦ ខណៈឆ្នាំ១៩៩៨ ប្តួរទៅជាBEC Tero Sasana FC ហើយឆ្នាំ២០១៨ ប្តូរមកជា Police Tero FC ក្រោយមានការបញ្ជូលគ្នារវាងក្រុមមួយនេះ ជាមួយក្រុម Police United F.C។
រយៈពេល៣១ឆ្នាំមកនេះក្រុម Police Tero FC ធ្លាប់ឈ្នះជើងឯកលីគកំពូលថៃចំនួន២លើក គឺនៅឆ្នាំ២០០០ និង រដូវកាល២០០១-២០០២ ខណៈ២០០២-០២ និង២០០២-២៣ បានត្រឹមជើងឯករង។ ក្រុមនេះធ្លាប់ឈ្នះពាន League Cup នៅឆ្នាំ២០០៩។ អ្វីដែលគួរអោយចាប់នោះក្រុម Police Tero FC បានឈ្នះជើងឯករងពានរង្វាន់ទ្វីបអាស៊ី AFC Champions League នៅរដូវកាល២០០២-២00៣ ទៀតផង។
មុនឈានដល់កិច្ចព្រមព្រៀងវិនិយោគភាគហ៊ុន ៤៩% នៅលីគកំពូលថៃ កាលពីថ្ងៃទី ២៨ ខែកញ្ញា ឆ្នាំ២០២៣ កន្លងទៅ ព្រះអង្គ Matteo Norodom ជាបុត្ររបស់ព្រះអង្គ នរោត្ដម រ៉ាវីចក្រ ចុះកុងត្រាប្រកបអាជីពនៅក្លិបបាល់ទាត់ Police Tero FC រួចជាស្រេចផងដែរ។
ទាំងព្រះអង្គម្ចាស់ នរោត្តម អម្រឹតវង្ស, ព្រះអង្គម្ចាស់ នរោត្តម នរិនថាពង្ស និងព្រះអង្គម្ចាស់ នរោត្តម រ៉ាវីចក្រ សុទ្ធជាបុត្រារបស់សម្តេច ព្រះមហិស្សរា នរោត្តម ចក្រពង្ស និងមានព្រះមាតានាម ហ៊ុន សឿន ដែលជាអតីតអ្នករាំរបាំព្រះរាជ្យទ្រព្យ៕