ក្រោយទុកឱ្យមហាជនមានមន្ទិលមួយរយៈធំពីការដកខ្លួនចេញពីការអត្ថាធិប្បាយលើកញ្ចក់ទូរទស្សន៍ ពេលនេះមហាជនរកឃើញចម្លើយហើយ ព្រោះអ្នកអត្ថាធិប្បាយច្បាប់តាមរយៈកញ្ចក់ទូរទស្សន៍ល្បី លោក ទូច សុខៈ (ទូច សុឃៈ) បានចាប់ផ្ដើមដំណើរការ Live កម្មវិធីនិយាយពីច្បាប់របស់លោកតាមរយៈបណ្ដាញសង្គម។
កាលពីរាត្រីទី២ ខែសីហា ឆ្នាំ២០២១ តាមរយៈគណនីផ្ទាល់ខ្លួនរបស់លោក ទូច សុខៈ លោកបានចេញមកធ្វើការ Live ផ្ទាល់ចែករំលែកបញ្ហាច្បាប់ដោយបើកឱ្យបងប្អូនសាធារណជនដែលមានចម្ងល់លើបញ្ហានេះអាច Comment សាកសួរភ្លាមៗនៅក្នុងពេល Live ផ្ទាល់ឬអាច Inbox (ផ្ញើសារ) មកសាកសួរលោក រួចលោកនឹងធ្វើការបកស្រាយពន្យល់ទៅតាមអង្គហេតុនៃរឿងនីមួយៗ។
ការ Live រយៈពេលមួយម៉ោងសោះនៃថ្ងៃដំបូងឃើញថាសន្ទុះនៃការគាំទ្រអ្នកអត្ថាធិប្បាយរូបនេះនៅតែខ្លាំងនិងមានអ្នកគាំទ្រច្រើនបានចូលមកទស្សនាការ Live ហើយក៏ជាមតិសាកសួរនិងឆ្លងឆ្លើយគ្នាទៅវិញទៅមករវាងអ្នកទស្សនា និង អ្នកអត្ថាធិប្បាយល្បីពាក់ព័ន្ធទៅនឹងប្រធានបទនីមួយៗ ដែលកើតមានឡើងពិតៗនៅក្នុងសង្គម។
ងាកមកវិញបងប្អូនប្រជាពលរដ្ឋដែលធ្លាប់លើកឡើងថាសោកស្ដាយចំពោះអវត្តមានរបស់អ្នកអត្ថាធិប្បាយដែលតែងតែផ្ដល់នូវចំណេះដឹងយ៉ាងក្បោះក្បាយ ងាយស្រួលយល់រូបនេះ លែងមានបញ្ហាកង្វល់ទៀតហើយ ព្រោះនៅក្នុងកម្មវិធីរបស់លោកគឺបើកឱ្យបងប្អូនដែលមានចម្ងល់ផ្នែកច្បាប់អាចសាកសួរបានដោយសេរី។
មួយថ្ងៃដំបូងនៃកម្មវិធី #ផ្លូវច្បាប់ ដែលជាគំនិតបង្កើតនិងផ្ដួចផ្ដើមឡើងដោយលោក ទូច សុខៈ បុគ្គលល្បីមួយរូបដែលតែងតែព្យាយាមបញ្ជ្រាបផ្លូវច្បាប់ជូនដល់សាធារណជនក្នុងគោលដៅចែករំលែកចំណេះដឹងមួយនេះឱ្យបងប្អូនប្រជាពលរដ្ឋកម្ពុជាកាន់តែមានយល់ដឹងទូលំទូលាយឡើងនេះ មានហ្វេនៗជាច្រើនដែលជាអ្នកគាំទ្ររូបលោកបានចូលមកទស្សនាផ្ទាល់ច្រើនព្រមទាំងមានការ Comment Like និង Share ចេញពីគណនីរបស់លោកខ្លាំងមិនចាញ់បណ្ដាញផ្សព្វផ្សាយព័ត៌មានមួយចំនួននោះទេ។
មិនទុកឱ្យមហាជនមានមន្ទិលបន្តទៀត សារព័ត៌មានត្រយងបានធ្វើការទំនាក់ទំនងទៅសាកសួរផ្ទាល់ពីលោកដើម្បីបញ្ជាក់ឱ្យកាន់តែច្បាស់ថែមទៀតពីបញ្ហានេះ ដោយសាមីខ្លួនលោកបានឆ្លើយតបជាលក្ខណៈការទូតថា៖ «លោកមានការសោកស្ដាយដែរ ដែលលោកមិនអាចបន្តអត្ថាធិប្បាយផ្លូវច្បាប់តាមកញ្ចក់ទូរទស្សន៍ជាបន្តទៀតបាន ព្រោះកន្លងមកមហាជនមានការគាំទ្រទាំងទៅលើការអត្ថាធិប្បាយ និងការបញ្ជ្រាបផ្លូវច្បាប់ ឆ្លៀតក្នុងឱកាសនេះលោកក៏សូមថ្លែងអំណរគុណចំពោះបងប្អូនប្រជាពលរដ្ឋដែលផ្ដល់នូវក្ដីស្រលាញ់និងគាំទ្ររូបលោករហូតមក»។
ចំពោះការសម្រេចចិត្តចាកចេញរបស់លោក លោកបានឆ្លើយដោយខ្លីមកកាន់សារព័ត៌មានត្រយងថាដោយសារតែបញ្ហាពេលវេលា គ្រួសារ និងមុខរបរផ្ទាល់ខ្លួន។
«បច្ចុប្បន្នគ្រួសារខ្ញុំបានចាប់ផ្ដើមពង្រីកអាជីវកម្មកសិដ្ឋានចិញ្ចឹមមាន់ កសិដ្ឋានចិញ្ចឹមត្រី និងចំការដូងក្រអូប និងការងារមួយចំនួនទៀត ដែលធ្វើឱ្យពេលវេលារបស់ខ្ញុំមានភាពកាន់តែចង្អៀតណែន ដូច្នេះទើបសម្រេចចិត្តឈប់ធ្វើការងារពេញម៉ោង ប៉ុន្តែចំពោះការបញ្ជ្រាបផ្លូវច្បាប់នេះគឺជាក្ដីស្រលាញ់ ហើយក៏ជាគោលដៅធំមួយក្នុងការចែករំលែកចំណេះដឹងផ្នែកនេះជូនដល់សាធារណជន ទើបខ្ញុំបង្កើតកម្មវិធី #ផ្លូវច្បាប់ នេះខ្លួនឯង ហើយធ្វើការ Live ទៅតាមពេលវេលាដែលខ្ញុំអាចឆ្លៀតពេលបានពីមុខរបរគ្រួសារ»។
ជាចុងក្រោយលោក ទូច សុខៈ ក៏បានឱ្យដឹងដែរថា ថ្វីត្បិតតែលោកមិនធ្វើការងារជាបុគ្គលិកពេញសិទ្ធិ (ពេញម៉ោង) ក្នុងស្ថាប័នណាមួយ តែមិនបានសេចក្ដីថាលោកឈប់ផ្ដាច់ចេញពីវិស័យសារព័ត៌មាននោះឡើយ ព្រោះប្រសិនបើមានស្ថាប័នណាមួយចាប់អារម្មណ៍ហើយចង់សហការការងារជាមួយនឹងលោក លោកពេញចិត្តនឹងបើកទ្វារទទួល ប៉ុន្តែសូមគោរពទៅតាមម៉ោងពេលវេលាដែលលោកបានកំណត់ មួយវិញទៀត កម្មវិធី នោះត្រូវតែមានភាពស៊ីសង្វាក់គ្នាជាមួយនឹងកម្មវិធីដែលលោកកំពុងតែដំណើរការក្នុងពេលបច្ចុប្បន្នតែប៉ុណ្ណោះ។
ទន្ទឹមនឹងគ្នានេះដែរ សារព័ត៌មានត្រយង ក៏កំពុងតែរៀបចំដំណើរការនូវកម្មវិធីថ្មីមួយរបស់ខ្លួនដែលមានឈ្មោះ «ត្រយងប្រឹក្សា» ជាកម្មវិធីប្រឹក្សាច្បាប់ ដែលផ្ដោតសំខាន់ទៅលើការជជែកវែកញែកពីបញ្ហាច្បាប់ និងស្រាយរាល់ចម្ងល់និងបញ្ហានានារបស់បងប្អូនសាធារណជនដែលមានចម្ងល់ទាក់ទងទៅនឹងផ្លូវច្បាប់។
ជាការកត់សម្គាល់ ប្រសិនបើមានការចរចាណាមួយ នៅថ្ងៃខាងមុខ រវាងកម្មវិធី ត្រយងប្រឹក្សា និង កម្មវិធី ផ្លូវច្បាប់ របស់លោក ទូច សុខៈ (ទូច សុឃៈ) នោះមហាជនក៏ដូចជាអ្នកគាំទ្រសារព័ត៌មានត្រយង និងអ្នកគាំទ្រអត្ថាធិប្បាយល្បីរូបនេះ ប្រាកដជាអាចទស្សនាការអត្ថាធិប្បាយរបស់លោក តាមរយៈសារព័ត៌មានត្រយងដូចជា Website Facebook YouTube និង Telegram ៕
