ក្រុមប្រតិភូ-អត្តពលិកកម្ពុជា បានធ្វើដំណើរមកដល់មាតុប្រទេសរបស់ខ្លួនវិញហើយ នៅល្ងាចថ្ងៃទី២ ខែសីហា ឆ្នាំ២០២១ ក្រោយបញ្ចប់បេសកកម្មនៅក្នុងព្រឹត្តិការណ៍កីឡាអូឡាំពិក ទីក្រុងតូក្យូ ប្រទេសជប៉ុន ឆ្នាំ២០២០។ បច្ចុប្បន្នកំពុងធ្វើចត្តាឡីស័កនៅសណ្ឋាគារមួយកន្លែងក្នុងរាជធានីភ្នំពេញ។
ក្រុមប្រតិភូ-អត្តពលិកកម្ពុជាមានសរុបចំនួន៧រូប ក្នុងនោះមាន អត្តពលិក២រូប លើ២ប្រភេទកីឡា គ្រូពេទ្យ គ្រូបង្វឹក ដឹកនាំដោយឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) ទទួលបន្ទុកនាយបេសកកម្ម និងនាយរងបេសកកម្ម លោក ញ៉ាន សុខវិសាល។ កីឡាករអត្តពលកម្មម្នាក់គឺ ប៉ែន សុខគង់ បន្តការហ្វឹកហាត់នៅជប៉ុន មិនបានរួមដំណើរត្រឡប់មកវិញទេ។
សូមបញ្ជាក់ថាលទ្ធផលប្រកួតនៅក្នុងកីឡាអូឡាំពិករបស់អត្តពលិកកម្ពុជា ទាំង៣រូបមាន៖
១) កីឡាករ ប៉ែន សុខគង់ បានចូលរួមប្រកួតរត់ចម្ងាយ១០០ម៉ែត្រសេរីផ្នែកបុរស ក្នុងព្រឹត្តិការណ៍កីឡាអូឡាំពិក ដោយស្ថិតនៅ Heat ទី១ ប្រើថិរវេលាបាន ១១.០២ វិនាទី ឈរលេខ៦ ក្នុងចំណោមអ្នកស្ថិតក្នុង Heat ជាមួយគ្នាដែលមាន៩នាក់។ លទ្ធផលនេះធ្វើឱ្យគេអស់ឱកាសឡើងប្រកួតជុំបន្ត។
២) កីឡាករ ហែម ប៉ុច បានចូលរួមហែលទឹកសេរី ផ្នែកបុរសចម្ងាយ៥០ម៉ែត្រ ដោយរូបគេធ្វើបាន២៤.៩១វិនាទី ឈរលេខ៥២ ក្នុងចំណោមអ្នកចូលរួម៧៣នាក់។
៣) កីឡាការិនី ឃឺន ប៊ុនពេជ្រមរក បានចូលរួមហែលទឹកសេរី ផ្នែកនារីចម្ងាយ៥០ម៉ែត្រ ដោយរូបគេធ្វើបាន៩២.៤២វិនាទី ដោយឈរចំណាត់ថ្នាក់លេខ៦៥ ក្នុងចំណោមអ្នកហែលសរុប៨៣នាក់។
រូបភាព៖ Sea Games 2023
