កំដៅនៃជម្លោះរវាងលោក សុខ រ៉ាស៊ី និង លោក អ៊ិន សុភិន ហាក់មិនទាន់រកចំណុចរួម ដើម្បីសម្រុះសម្រួលគ្នាបាននៅឡើយទេ ព្រោះភាគីទាំងសងខាងនៅតែខ្វែងគំនិត និងមានទស្សនៈផ្ទុយគ្នាទោះជាបានជួបដោះស្រាយគ្នាម្ដងនៅមុខសមត្ថកិច្ចរួចហើយក្ដី។
សូមចុចអាន អស់ការអត់ទ្រាំ លោក សុខ រ៉ាស៊ី ប្រកាសប្ដឹងលោក អ៊ិន សុភិន ទៅតុលាការ!
បើសង្កេតឱ្យស៊ីជ្រៅបញ្ហាជម្លោះរឿងប្រាក់កាសនេះមិនត្រឹមតែលោក សុខ រ៉ាស៊ីនោះទេ ដែលប្រឈមនឹងបញ្ហានេះជាមួយនឹងម្ចាស់ផលិតកម្ម មហាហង្ស ព្រោះកាលពីពេលថ្មីៗនេះដែរស្រាប់ផ្ទុះចេញនូវអ្នកដឹកនាំមួយរូបបានចេញមកបង្ហាញពីចំណាប់អារម្មណ៍របស់ខ្លួនតាមរយៈបណ្ដាញសង្គមដោយលើកឡើង ពីអ្នកជំពាក់ប្រាក់ដែលឱ្យខ្លួនដឹកនាំរឿងចំនួន៣ តែបែរជាមិនគិតគូរ បើកលុយកាក់ឱ្យក្រោយចប់កិច្ចការ ជាងនោះទៀតមិនត្រឹមតែមិនសងហើយ បានដាក់ទំនាយឱ្យក្រុមគ្រួសាររបស់អ្នកស្រីស្លាប់មួយពូជថែមទៀតផង។
រឿងរ៉ាវដ៏ក្ដៅគគុកនេះត្រូវបានភរិយាលោក Remy Hou (រ៉េមមី ហ៊ូ) គឺអ្នកស្រី ផូ ភារត្ន័ បញ្ជាក់មកកាន់សារព័ត៌មានត្រយងថា អ្នកស្រីនិងស្វាមីបានទទួលដឹកនាំភាពយន្តខ្នាតធំចំនួន៣រឿងឱ្យផលិតកម្មមហាហង្ស ដោយទទួលបានឈ្នួលកម្លាំងពលកម្មមួយរឿង ៣ពាន់ដុល្លារ សរុប៣រឿងចំនួន៩ពាន់ដុល្លារ។ ប៉ុន្តែទឹកប្រាក់ដែលទទួលមានត្រឹមតែពាក់កណ្ដាលប៉ុណ្ណោះ គឺ៤ពាន់៥រយដុល្លារប៉ុណ្ណោះ ចំណែកទឹកប្រាក់ពាក់កណ្ដាលទៀតត្រូវម្ចាស់ផលិតកម្មខាងលើដោះសារម្ដងជាពីរដងដោយមូលហេតុផ្សេងៗ។
ងាកត្រលប់មកដល់ការដាក់ទំនាយនិងដៀលគ្រួសារអ្នកស្រី គឺបណ្ដាលមកពីអ្នកស្រីបាន Share ផុសមួយរបស់លោក សុខ រ៉ាស៊ី ភ្ជាប់ជាមួយនឹងសំណេរយ៉ាងដូច្នេះថា៖ «កម្មពារមិនចាំជាតិក្រោយទេ នេះជាStyle ដដែលៗដែលគាត់ធ្លាប់ប្រើជាមួយអ្នកទន់ខ្សោយរួមទាំងខ្ញុំ។ អ្នកដឹងបានដឹង»។
ក្រោយបង្ហោះសំណេរនេះរួចអ្នកស្រីបានឱ្យសារព័ត៌មានត្រយងដឹងថា លោក អ៊ិន សុភិន ដែលមិនដែលឆ្លើយតបសារអ្នកស្រីដើម្បីបញ្ជាក់ឱ្យដាច់ស្រេចរឿងថ្លៃដឹកនាំដែលសល់ពាក់កណ្ដាលទៀតនោះបានខលមកអ្នកស្រី ហើយខឹងដាច់ក្បាលដាច់កន្ួុយ ព្រមទាំងប្រើពាក្យប្រមាថដល់អាយុជីវិតគ្រួសារអ្នកស្រីព្រមទាំងច្រានចោលពីរឿងកុងត្រា ថាលោកមិនដឹងនោះទេ ព្រោះកុងត្រា លេខាលោកគឺជាអ្នករៀបចំ ព្រមទាំងប្រកែកថាប្រណាំងយកមួយឈ្នះដៃ រួចហើយលោកបានលុបចោលសារឆ្លើយឆ្លងជាមួយគ្នាទាំងអស់ ប្រហែលជាក្នុងគោលបំណងលុបបំបាត់ភស្ដុតាង តែសំណាងដែលអ្នកស្រី Screen shot សល់ទាន់សល់បានភស្តុតាង២សន្លឹកដែរ។
អ្នកស្រី ផូ ភារ័ត្ន បានបញ្ជាក់ជាចុងក្រោយដែរថា គោលបំណងដែលអ្នកស្រីបញ្ចេញរឿងនេះគឺអ្នកស្រីមិនមានចេតនាប្ដឹងផ្ដល់អ្វីនោះទេ តែសុំស្នើឱ្យលោក អ៊ិន សុភិន មេត្តាអនុវត្តទៅតាមគោលការណ៍ និង ច្បាប់របស់ក្រុមហ៊ុនគាត់ ម្យ៉ាងវិញទៀត អ្នកស្រីផ្ទាល់ អ្នកស្រីគ្មានសង្ឃឹមទេថា អ្នកស្រីនឹងទទួលបានសំណងពីភាគីម្ខាងទៀតនោះទេ តែអ្នកស្រីសប្បាយចិត្ត នៅពេលដែលអ្នកស្រីប្រកាសជាសាធារណៈបែបនេះ ព្រោះអ្នកស្រីចង់ផ្ញើសារឱ្យមនុស្សផ្សេងៗទៀតមានការប្រុងប្រយ័ត្នខ្លួន ព្រោះអ្នកស្រីនិងស្វាមីផ្ទាល់មានកុងត្រាច្បាស់លាស់ហើយ នៅលោក អ៊ិន សុភិន ប្រែក្រឡាស់បាន។
សារព័ត៌មានត្រយងបានព្យាយាមទំនាក់ទំនងទៅកាន់លោក អ៊ិន សុភិន ដើម្បីបកស្រាយពីបញ្ហានេះ ប៉ុន្តែលេខទូរស័ព្ទរបស់លោកមិនអាចទំនាក់ទំនងបាននោះទេ៕
