ក្រោយប្រកាសតាមរក លោក អ៊ិន សុភិន ម្ចាស់ផលិតកម្ម មហាហង្ស កាលពីពេលកន្លងមក ខណៈនេះលោក សុខ រ៉ាស៊ី ពិធីករមានឈ្មោះបោះសំឡេងមួយរូបបាន សម្រេចចិត្តប្ដឹងលោក អ៊ិន សុភិន ទៅតុលការ ពីបទឆបោក។
យោងតាមការប្រកាសពីសាមីខ្លួនផ្ទាល់ លោក សុខ រ៉ាស៊ី បានបង្ហោះសំណេរលើបណ្ដាញសង្គមដែលមានអត្ថន័យចាក់ដោតខ្លាំង ហើយទោះជាមិនបានបញ្ជាក់ចំឈ្មោះចំពោះបុគ្គលណាម្នាក់ តែតាមរយៈរៀបរាប់របស់លោក មជ្ឈដ្ឋានមហាជន អាចសន្មតបានថាជាលោក អ៊ិន សុភិន ដែលជាគូករណីចាស់របស់ លោក សុខ រ៉ាស៊ី ពាក់ព័ន្ធនឹងបញ្ហាប្រាក់កាក់កន្លងមក។
ពិធីករប្រចាំស្ថានីយទូរទស្សន៍ ហង្ស មាស ខាងលើកាលពីពីរម៉ោងមុនបានសរសេររៀបរាប់លើគណនីរបស់លោកយ៉ាងដូច្នេះ៖
«បងប្អូនអាច ជឿទេថាបើមាន រៀបចំកម្មវិធីប្រលងបវរកញ្ញា កម្មវិធីកំពុងដំណើរការ ស្រាប់តែប៉ូលីស មកចាប់អ្នករៀបចំកម្មវិធីដាក់គុក ដោយសារបទឆបោក! តើបងប្អូនយល់យ៉ាងណាដែរ? យើងយោគយល់គេ១ឆ្នាំហើយ គេថាយើងមិនយោគយល់! មានលុយ មានផ្ទះ មានក្រុមហ៊ុនរាប់លាន តែមិនស្រលាញ់កិត្តិយស!»។
ខាងលើនេះគឺជាការលើកឡើងពីភាគីលោក សុខ រ៉ាស៊ី ប៉ុន្តែមិនមានការឆ្លើយតបណាមួយពីខាងភាគី លោក អ៊ិន សុភិន ម្ចាស់ផលិតកម្ម មហាហង្ស និងជាអ្នករៀបចំកម្មវិធីប្រកួត បវរកញ្ញា «Miss Grand Cambodia» ដូច្នេះត្រយងនឹងរង់ចាំស្វាគមន៍ជានិច្ចចំពោះមតិឆ្លើយតប ឬការបកស្រាយណាមួយពីភាគីលោក អ៊ិន សុភិន ចំពោះការលើកឡើងរបស់លោក សុខ រ៉ាស៊ី ខាងលើ៕
