ដើម្បីផ្ដល់កិត្តិយស និងលើកទឹកចិត្តដល់ក្រុមកីឡករទូក ង និងកីឡាករ បាល់ទាត់ខេត្តកំពង់ចាម ដែលខិតខំដណ្តើមបានជ័យលាភីលេខ១ ជូនខេត្តកំពង់ចាម រដ្ឋបាលខេត្ត កំពង់ចាម នឹងរៀប ចំពិធីដង្ហែរក្បួនក្នុងក្រុងកំពង់ចាម អបអរសាទរដល់ក្រុមកីឡាករទូក ង និងកីឡាករ បាល់ទាត់ខេត្តកំពង់ចា។
ពិធីដង្ហែរក្បួនអបអរនេះ នឹងធ្វើឡើងនៅរសៀលថ្ងៃទី១ ខែធ្នូ ឆ្នាំ២០២៣ វេលាម៉ោង ១៥:០០នាទី ចេញដំណើរ ពីសាលាខេត្តកំពង់ចាម បត់តាមផ្លូវត្រសក់ផ្អែម ឆ្ពោះទៅរង្វង់មូលជ័យវរ្ម័នទី៧ បន្តទៅវេទិកាអុំទូក តាម ផ្លូវមាត់ទន្លេរហូតដល់មុខវត្តដីដុះ បត់តាមរង្វង់មូលនាងគង្ហីង ឆ្ពោះមកគល់ស្ពានគីហ្សូណា បន្តតាមផ្លូវ ព្រះមុនីវង្ស, ផ្លូវជាតិលេខ ៧ចាស់ និងបញ្ចប់នៅវិមានឯករាជ្យខេត្តកំពង់ចាម។
ដើម្បីអោយកម្មវិធីនេះប្រព្រឹត្តិទៅដោយរលូន រដ្ឋបាលខេត្តកមពង់ចាម បានណែនាំដល់លោកអភិបាលនៃគណ:អភិបាលក្រុមកំពង់ចាម ដូចខាងក្រោម៖
១-ត្រូវណែនាំដល់បងប្អូនប្រជាពលរដ្ឋ ដែលរស់នៅតាមដងផ្លូវនៃការដង្ហែរក្បួន សំអាតអនាម័យ មុខគេហដ្ឋាន អាគារសាធារណៈ ឯកជន និងដោតទង់ជាតិគ្រប់គេហដ្ឋាន។
២-បំផុសឱ្យបងប្អូនប្រជាពលរដ្ឋដែលរស់នៅតាមដងផ្លូវនៃការដង្ហែរក្បួន ចេញមកឈរទទួលអបអរសាទរក្បួនដង្ហែរឆ្លងកាត់មុខគេហដ្ឋានរៀងៗខ្លួន។
៣-សហការជាមួយមន្ទីរ-អង្គភាពជុំវិញខេត្ត រៀបចំក្បួនរថយ័ន្តដង្ហែរ ដោយក្នុងមួយមន្ទីរ- អង្គភាព រថយន្តចំនួន ០១គ្រឿង។
៤-សហការជាមួយ ស្នងការដ្ឋាននគរបាខេត្ត និងបញ្ហាការកងរាជអាវុធហត្ថខេត្ត រៀបចំ ការពារសន្តិសុខ សណ្ដាប់ធ្នាប់តាមដងផ្លូវដង្ហែរក្បួន ពិសេសសម្រួលចរាចរណ៍ដល់ការ ដង្ហែរក្បួន។
គួរបញ្ជាក់ថា ក្រុមបាល់ទាត់ មន្ទីរ អយក ខេត្តកំពង់ចាម ក្លាយជាម្ចាស់ជើងឯក នៃពានរង្វាន់សម្តេចអគ្គមហាសេនាបតីតេជោ ហ៊ុន សែន ( Hun Sen Cup) ថ្នាក់ខេត្ត លើកទី១៧ ឆ្នាំ ២០២៣-២០២៤ ក្រោយយកឈ្នះត្បូងឃ្មុំ ក្នុងលទ្ធផល ២-០ នៅយប់ថ្ងៃទី២៤ ខែវិច្ឆិកា ពហុកីឡដ្ឋានជាតិ។
ដោយឡែកសម្រាប់ការប្រណាំងទូ ង ក្នុងព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣ ម្ចាស់ជើងឯកគូពិសេសខ្នាតអន្តជាតិ ចំណុះ៧៥នាក់ គឺបានទៅលើកទូកង ដែលមកពីស្រុកកងមាស ខេត្តកំពង់ចាម មានឈ្នះថា មហាទន្សាយតេជោសែនជ័យ ទទួលបានចំណាត់ថ្នាក់លេខ១ ទូទាំងប្រទេស៕