ក្លិបបាល់ទាត់គិរីវង់សុខសែនជ័យ ក្រោមការដឹកនាំរបស់លោក សាប៊ូន វិនតា កំពុងបង្ហាញលទ្ធផលមិនសូវបានល្អនៅក្នុងការប្រកួតពានរង្វាន់លីគកំពូលកម្ពុជា (Cambodian Premier League) រដូវកាលឆ្នាំ២០២៣-២៤ ដោយឆ្លងកាត់ ១៤ប្រកួតកន្លងមក ឈ្នះតែ ១ប្រកួត ស្មើ៣ និងចាញ់ ១០ប្រកួត មាន ៦ពិន្ទុ ឈរនៅបាត់តារាង។
ខណ:ការប្រកួតចុងក្រោយនៅសប្ដាហ៍ទី១៤ ថ្ងៃទី១៧ ធ្នូ គិរីវង់សុខសែនជ័យ បានបរាជ័យក្នុងលទ្ធផល ៦-០ ក្នុងជំនួបទល់ជាមួយក្លិបបាល់ទាត់បឹងកេត នៅក្នុងទឹកដីនៃកីឡដ្ឋានគិរីវង់របស់ខ្លួន ហើយក៏ជាលទ្ធផលដែលចាញ់ច្រើនគ្រាប់ផងដែរសម្រាប់ជំនួនកន្លងមក។
ក្រោយបញ្ចប់ការប្រកួតដោយលទ្ធផលបែបនេះលោក សាប៊ូន វិនតា គ្រូបង្គោលក្លិបគិរីវង់សុខសែនជ័យ បានបង្ហោះសារខ្លីមួយនៅលើគណនីហ្វេសបុករបស់លោកនៅថ្ងៃទី១៨ ធ្នូនេះថា៖ «ភាពបរាជ័យមិនអាចបញ្ឈប់ការខិតខំប្រឹងរបស់ខ្ញុំបានឡើយ។ កើតមកជាមួយអាជីពបាល់ទាត់នេះរហូតដល់ស្លាប់មិនក្បត់អាជីពខ្លួនឯងឡើយ»។
លទ្ធផលកន្លងមកនៅក្នុងពានរង្វាន់លីគកំពូលកម្ពុជា របស់លោក សាប៊ូន វិនតា គ្រូបង្គោលក្លិបគិរីវង់សុខសែនជ័យ៖
- សប្ដាហ៍ទី១៖ ចាញ់ វិសាខា ២-០ នៅកីឡដ្ឋានព្រីនស៍
- សប្ដាហ៍ទី២៖ ស្មើ ជាមួយ Tiffy Army ១-១ នៅកីឡដ្ឋានគិរីវង់
- សប្ដាហ៍ទី៣៖ ចាញ់ អង្គរថាយហ្គឺរ ២-០ នៅកីឡដ្ឋានហនុមាន
- សប្ដាហ៍ទី៤៖ ចាញ់ ព្រៃវែង ២-១ នៅកីឡដ្ឋានគិរីវង់
- សប្ដាហ៍ទី៥៖ ចាញ់បឹងកេត ២-០ នៅពហុកីឡដ្ឋានជាតិ
- សប្ដាហ៍ទី៦៖ ស្មើជាមួយណាហ្គាវើលដ៍ ១-១ នៅកីឡដ្ឋានខេត្តកមំពង់ស្ពឺ
- សប្ដាហ៍ទី៧៖ ចាញ់ ISI ដង្កោសែនជ័យ ១-០ នៅកីឡដ្ឋានគិរីវង់
- សប្ដាហ៍ទី៨៖ ចាញ់ព្រះខ័នរាជស្វាយរៀង ២-១ នៅកីឡដ្ឋានខេត្តស្វាយរៀង
- សប្ដាហ៍ទី៩៖ ឈ្នះភ្នំពេញក្រោន ១-០ នៅកីឡដ្ឋានគិរីវង់
- សប្ដាហ៍ទី១០៖ ចាញ់វិសាខា ២-០ នៅកីឡដ្ឋានគិរីវង់
- សប្ដាហ៍ទី១១៖ ចាញ់ Tiffy Army ៤-២ នៅកីឡដ្ឋានស្តាតចាស់
- សប្ដាហ៍ទី១២៖ ចាញ់ អង្គរថាយហ្គឺរ ៣-១ នៅកីឡដ្ឋានគិរីវង់
- សប្ដាហ៍ទី១៣៖ ស្មើជាមួយព្រៃវែង ២-២ នៅកីឡដ្ឋានខេត្តព្រៃវែង
- សប្ដាហ៍ទី១៤៖ ចាញ់បឹងកេត ៦-០ នៅកីឡដ្ឋានគិរីវង់
លោក សាប៊ូន វិនតា កាន់សញ្ញាប័ត្រ AFC “A” License នឹងត្រូវបានតែងតាំងជាគ្រូបង្គោលក្លិបគិរីវង់សុខសែនជ័យកាលពីដើមឆ្នាំ២០២៣។ លោកមានបទពិសោធក្នុងអាជីពបណ្តុះបណ្តាលបាល់ទាត់ ក្នុងនោះលោកធ្លាប់ជានាយកបច្ចេកទេសក្លិបបាល់ទាត់ ISI-DSC FC និង នាយកអភិវឌ្ឍយុវជនក្លិបបាល់ទាត់បឹងកេត ព្រមទាំងថ្នាលយុវជននៅសាលាបាល់ទាត់ជាតិបាទី៕