សម្តេចប៉ាប ហ្វ្រង់ស៊ីស ទួញសោកចំពោះសង្រ្គាមនៅក្នុងដែនដីបរិសុទ្ធ ដែលមន្ត្រីសុខាភិបាលប៉ាឡេស្ទីនបាននិយាយថា ការវាយប្រហារតាមអាកាសបានសម្លាប់មនុស្សយ៉ាងហោចណាស់ ៧៨នាក់នៅថ្ងៃបុណ្យណូអែល ក្នុងរាត្រីដ៏សាហាវបំផុតមួយរបស់តំបន់ហ្គាហ្សាស្ទ្រីប នៅក្នុងការប្រយុទ្ធគ្នារយៈពេល ១១សប្តាហ៍ របស់អ៊ីស្រាអែលជាមួយក្រុមហាម៉ាស។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី២៥ ខែធ្នូ ឆ្នាំ២០២៣។
ការវាយប្រហាររបស់អ៊ីស្រាអែល បានចាប់ផ្តើមរាប់ម៉ោងមុនពាក់កណ្តាលអធ្រាត្រ បានបន្តឈានដល់ថ្ងៃបុណ្យណូអែលនៅថ្ងៃចន្ទ ទី២៥ ខែធ្នូ នេះ។ អ្នកស្រុក និងប្រព័ន្ធផ្សព្វផ្សាយប៉ាឡេស្ទីនបាននិយាយថា អ៊ីស្រាអែលបានបង្កើនការបាញ់ផ្លោងតាមអាកាស និងថ្មើរជើងដាក់គោលដៅលើជំរុំជនភៀសខ្លួន អាល់ ប៊ូរ៉េច (al-Bureij) នៅកណ្តាលតំបន់ហ្គាហ្សា។
អ្នកនាំពាក្យក្រសួងសុខាភិបាលលោក អាស្រាហ្វ អាល់ គីដ្រា (Ashraf Al-Qidra) បាននិយាយថា យ៉ាងហោចណាស់មនុស្ស ៧០នាក់ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលសំដៅទៅលើទីក្រុង ម៉ាហ្គាហ្ស៊ី (Maghazi) នៅកណ្តាលតំបន់ហ្គាហ្សា។ អ្នកនាំពាក្យក្រសួងសុខាភិបាលរូបនេះបន្ថែមថា អ្នកស្លាប់ភាគច្រើនជាស្ត្រី និងកុមារ។
កងទ័ពអ៊ីស្រាអែលបាននិយាយថា ខ្លួនកំពុងពិនិត្យមើលរបាយការណ៍នៃឧប្បត្តិហេតុ នៅទីក្រុង Maghazi ហើយបានប្តេជ្ញាចិត្តកាត់បន្ថយគ្រោះថ្នាក់ដល់ជនស៊ីវិល។
ទាក់ទិននឹងបញ្ហានេះ ក្រុមហាម៉ាស់ បដិសេធការចោទប្រកាន់របស់អ៊ីស្រាអែល ថា ខ្លួនធ្វើប្រតិបត្តិការនៅក្នុងតំបន់ដែលមានប្រជាជនរស់នៅច្រើន ឬប្រើប្រាស់ជនស៊ីវិលជាខែលការពារពួកគេ។
យ៉ាងណាម៉ិញ អឌ្ឍចន្ទក្រហមប៉ាឡេស្ទីន បានផ្សព្វផ្សាយវីដេអូនៃអ្នករបួសត្រូវបានគេបញ្ជូនទៅកាន់មន្ទីរពេទ្យ ដោយបាននិយាយថា យន្តហោះចម្បាំងអ៊ីស្រាអែល កំពុងទម្លាក់គ្រាប់បែកលើផ្លូវសំខាន់ៗ រវាងតំបន់ហ្គាហ្សាភាគកណ្តាល ដោយរារាំងការឆ្លងកាត់នៃរថយន្តគិលានសង្គ្រោះ និងរថយន្តសង្គ្រោះបន្ទាន់។
ក្រុមគ្រូពេទ្យបាននិយាយថា ការវាយប្រហារតាមអាកាសរបស់អ៊ីស្រាអែល ដាច់ដោយឡែកមួយទៀត នៅទីក្រុង កាន យូនីស (Khan Younis) ភាគខាងត្បូងតំបន់ហ្គាហ្សា បានសម្លាប់ជនជាតិប៉ាឡេស្ទីន ៨នាក់។
ជុំវិញហេតុការណ៍នេះ បព្វជិតបានលុបចោលការប្រារព្ធពិធីនៅក្រុង បេថ្លេហិម (Bethlehem) ក្នុងតំបន់ West Bank របស់ប៉ាឡេស្ទីន កាន់កាប់ដោយអ៊ីស្រាអែល ជាកន្លេងដែលមានទំនៀមទម្លាប់ដែលថា ព្រះយេស៊ូវ បានប្រសូតក្នុងទឹកដីដ៏ពិសិដ្ឋនេះកាលពី ២,០០០ឆ្នាំមុន៕
