បាត់ដំបង÷ សមត្ថកិច្ចនាំខ្លួនមនុស្ស ៤នាក់បញ្ជូនទៅកាន់តុលាការ ខណ:បើកបរឋិតក្រោមឥទ្ធិពលគ្រឿងញៀនពេលកំពុងបើកបរលើដងផ្លូវ។
នគរបាលការិយាល័យប្រឆាំងគ្រឿងញៀន ស្នងការនគរបាលខេត្តបាត់ដំបងបានបង្ហាញឲ្យដឹងថា ក្រោមកិច្ចសហការចុះចល័តត្រួតពិនិត្យ បង្ការទប់ស្កាត់បង្ក្រាបបទល្មើសគ្រឿងញៀន និងសារធាតុគីមីផ្សំគ្រឿងញៀនខុសច្បាប់រវាងកម្លាំងប្រឆាំងគ្រឿងញៀន ជាមួយអាជ្ញាធរ រួមទាំងកម្លាំងសមត្ថកិច្ចមូលដ្ឋាន នៅថ្ងៃទី ២៩ ខែមករា ឆ្នាំ ២០២៤ កន្លងមកនេះបានឆ្មក់ចុះត្រួតពិនិត្យលើអ្នកបើកបរ និងយានយន្តគ្រប់ប្រភេទចំនួន ២គោលដៅក្នុងតំបន់ព្រំដែនស្រុកសំពៅលូន ខេត្តបាត់ដំបង។
យុទ្ធនាការចុះត្រួតពិនិត្យជាក់ស្តែងនេះផ្តោតលើរថយន្តធុនតូច ធំ ពិសេសយានយន្តដឹកទំនិញឆ្លងដែនពីប្រទេសជិតខាងចូលក្នុងទីផ្សារទីប្រជុំជនក្រុងបាត់ដំបង ទីក្រុងភ្នំពេញ ក៏ដូចជាតាមបណ្តាខេត្តនានាផ្សេងទៀត។ ជាលទ្ធផលកម្លាំងចម្រុះបានត្រួតពិនិត្យលើយានយន្តសរុប ២៧៧គ្រឿង ម៉ូតូចំនួន ៥៧គ្រឿង ដែលមានអ្នកបើកបរសរុបចំនួន ៤២០នាក់ ក្នុងនោះបានរកឃើញអ្នកបើកបរម៉ូតូជាបុរសឋិតក្រោមឥទ្ធិពលគ្រឿងញៀនចំនួន ៤នាក់។
អ្នកបើកបរខាងលើក្រោយធ្វើតេស្តរកឃើញសារធាតុញៀន កម្លាំងនគរបាលបានរៀបចំសំណុំរឿងបញ្ជូនទៅតុលាការតាមផ្លូវច្បាប់៕
អត្ថបទ÷ ដំបងក្រញូង
