សិល្បៈជាតិ៖ មុននេះបន្តិចយោងតាមការបង្ហោះរបស់ស្រីស្អាត ប៉ុន សុរ៉ាវត្តី តារាសម្ដែងដ៏មានប្រជាប្រិយភាពមួយរូប កញ្ញាបានលើកឡើងថាកុំភ្លេចត្រៀមចាំទស្សនារឿងភាគថ្មីរបស់ខ្លួន ដោយក្នុងនោះមានអ្នកគាំទ្រខ្លះផ្ដាំកញ្ញាបើឆ្លងទៅសម័យលង្វែង កុំភ្លេចយកប្រហុកសម័យបច្ចុប្បន្នទៅឱ្យអ្នកស្រុកលង្វែកភ្លក់ និងប្រៀបធៀបរសជាតិផង។
នាថ្ងៃទី១៣ ខែកុម្ភៈ ឆ្នាំ២០២៤ គណនីហ្វេសប៊ុករបស់កញ្ញា ប៉ុន សុរ៉ាវត្តី បានបង្ហោះផ្សព្វផ្សាយរឿងភាគថ្មីដែលខ្លួនសម្ដែងឱ្យផលិតកម្ម Crystal Film មានចំណងជើងថា «ឆ្លងភពជួបស្នេហ៍» ជារឿងភាគបុរាណត្រៀមចាក់បញ្ចាំងនាពេលឆាប់ៗនេះ ព្រមទាំងភ្ជាប់ជាមួយនឹងសំណេរយ៉ាងក្បោះក្បាយថា៖ «ជានិស្សិតចុះកម្មសិក្សា នៅភូមិមួយ តែចៃដន្យក៏បានឆ្លងភពទៅកាន់សម័យលង្វែក បានជួបបុរសម្នាក់ដែលទទួលយកយើង ទាំងដែលសភាពយើងខុសពីអ្នករាល់គ្នា រួចក៏បានបង្រៀនយើងអោយយល់ពីរបៀបរស់នៅនាសម័យនោះ ហើយពិសេសជាងនោះទៅទៀតគាត់បានបង្រៀនយើងពីរបៀបស្លៀកសម្លៀកបំពាក់ទៀតផង តែជាអកុសលយើងទាំងពីរអ្នកក៏…….ទាំងអស់មាននៅ Crystal Film ចាក់ផ្សាយជូនឆាប់ៗនេះហើយ»
ក្រោយស្ដាប់តាមការរៀបរាប់របស់ សារ៉ាវត្តី អ្នកគាំទ្រសុទ្ធតែបញ្ចេញមតិដូចៗគ្នាថា យើងនេះប្រាកដជារឿងភាគមួយដ៏ល្អគួរឱ្យចង់ទស្សនា ព្រោះមានបង្ហាញពីជីវភាព សំលៀកបំពាក់ របៀបរស់នៅរបស់មនុស្សនាសម័យលង្វែក តែក្នុងនោះក៏មានអ្នកលើកឡើងមួយចំនួនគួរឱ្យចាប់អារម្មណ៍ដែរនោះគឺ «ចេញរឿងថ្ងៃណា Idol កុំភ្លេចពេលឆ្លងភពយកប្រហុកទៅផង ដើម្បីឲ្យអ្នកសម័យមុនភ្លក់ប្រហុកសម័យឥឡូវថារសជាតិខុសគ្នាដែរទេ?»
ការលើកឡើងបែបនេះព្រោះតែកញ្ញា ប៉ុន សារ៉ាវត្តី ធ្លាប់បានបង្ហាញថ្វីដៃសម្ដែងរឿង «ប្រហុកស្រែស្នេហ៍ខ្ញុំ» ចាប់គូជាមួយនឹងលោក ទ្រី ដារ៉ាវុទ្ធ ជារឿងដែលទទួលបានភាពល្បីល្បាញយ៉ាងខ្លាំងនៅលើទូរទស្សន៍ PNN រហូតដល់កញ្ញា ជាប់ងារជានាងប្រហុក ថែមទៀត។
សូមជំរាបជូនថា ភាពយន្ត «ឆ្លងភពជួបស្នេហ៍» នេះគឺជារឿងប្រភេទសម័យលាយបុរាណ ព្រោះតួឯកស្រីដែលជានិស្សិតបានឆ្លងភពពីសម័យបច្ចុប្បន្នទៅកាន់សម័យបុរាណ ប៉ុន្តែសាច់រឿងនឹង Happy Ending ឬយ៉ាងណានោះនៅមិនទាន់ដឹងនៅឡើយ ព្រោះមិនច្បាស់ថាតួស្រីនឹងឆ្លងត្រលប់មកកាន់សម័យបច្ចុប្បន្នវិញ ឬក៏បន្តរស់នៅភពបុរាណជាមួយនឹងតួឯកប្រុស។ ដូច្នេះមានតែរងចាំតាមដានទាំងអស់នេះនៅពេលដែលរឿងនេះត្រូវបានចាក់បញ្ចាំងនៅលើកញ្ចក់ទូរទស្សន៍៕