ត្រលប់មកជាទីចាប់អារម្មណ៍និងព្រួយបារម្ភឡើងវិញសម្រាប់បងប្អូនប្រជាពលរដ្ឋកម្ពុជានៅក្នុងថ្ងៃទី១៥ ខែសីហា ឆ្នាំ២០២១ ក្រោយរឿងរ៉ាវដែលភាគីកម្ពុជាបានដាក់ការសង្ស័យថាប្រាសាទថ្មដែលមានឈ្មោះថា«សីហនគរ» កំពុងសាងសង់នៅទឹកដីថៃបានស្ងប់ស្ងាត់បន្តិច ស្រាប់តែថ្ងៃនេះរឿងនេះបានផ្ទុះកំដៅឡើងវិញជាថ្មី ដោយសារតែបែកធ្លាយរូបភាពថ្មីៗ ដែលត្រូវបានផេកធំៗដែលឈឺឆ្អាល និងព្រួយបារម្ភខ្លាំងចំពោះបញ្ហានេះបានស្រុះស្រួលគ្នា ផុសលើផេករបស់ខ្លួនតាមរយៈបណ្ដាញសង្គមហ្វេសប៊ុក។
តាមរយៈបច្ចុប្បន្នភាពនៃរូបភាពដែលបែកធ្លាយចេញមកក្រៅបង្ហាញឱ្យឃើញប្រាសាទសីហនគរកាន់តែលេចចេញជារូបរាងសឹងតែ៩០ភាគរយ ឬនិយាយដោយខ្លីគឺជិតរួចរាល់ហើយ ដែលធ្វើឱ្យមហាជនកម្ពុជាមានក្ដីមួរម៉ង និងមិនពេញចិត្តជាខ្លាំងដែលភាគីថៃនៅតែចិញ្ចឹមចិត្តចម្លងបន្ត ហើយមិនមានចំណាត់ការសមស្របណាមួយចំពោះបញ្ហានេះសោះ។
ដូចជាផេក Kun Khmer Like , Universe Pageant ដែលជាផេកមានចំនួនគណនី Follow និង Like យ៉ាងច្រើនក៏បានចេញមកបង្ហាញក្ដីព្រួយបារម្ភដូចគ្នា ដោយផេក Kun Khmer Like បានសរសេរថា «គេធ្វើជិតរួចហើយ…» ខណៈដែលផេក Universe Pageant ក៏បានលើកឡើងដែរថា «ពេលនេះថៃកំពុងតែបន្ដសាងសង់ប្រាសាទចម្លងចេញពីប្រាសាទអង្គរវត្ដរបស់ប្រទេសកម្ពុជាយេីងបន្ដទៀតហេីយពិតជាសាហាវ»។
ក្រៅពីផេកធំៗខាងលើនេះក៏មានបងប្អូនប្រជាពលរដ្ឋអ្នកជាតិនិយមដ៏ច្រើនបានផុសពីចំណាប់អារម្មណ៍និងការទាមទាររបស់ខ្លួននៅបណ្ដាញសង្គមបង្ហាញពីការមិនពេញចិត្តចំពោះភាគីថៃដែលនៅតែបន្តចេតនាចម្លងរចនាបទរបស់ប្រាសាទអង្គរវត្តខ្មែរទោះជាភាគីកម្ពុជាស្នើឱ្យមានការបង្ហាញភស្ដុតាង ឯកសារ គំរូប្លង់ និងផ្អាកដំណើរការសាងសង់ក្ដី។
ខាងក្រោមនេះជារូបភាពបច្ចុប្បន្នភាពនៃប្រាសាទថ្មដែលសង្ស័យថាបានចម្លងតាមរចនាបទប្រាសាទអង្គរវត្តខ្មែរ៖