ឆ្លងកាត់ការប្រកួតជម្រុះរយៈពេល២ថ្ងៃពេញ នៅថ្ងៃទី២៤-២៥ ខែកុម្ភៈ ឆ្នាំ២០២៤ ក្នុងមណ្ឌលបាត់ដំបង ពានរង្វាន់បាល់ទះ 4×4 ទូទាំងប្រទេស Wurkz Special Volleyball Cup 4×4 បានរកឃើញជើងខ្លាំងហើយ ដោយបានទៅក្រុមកីឡាបាល់ទះខេត្តបាត់ដំបង បន្ទាប់ពីយកឈ្នះលើក្រុមសមាគមកីឡាបាល់ទះក្រសួងមហាផ្ទៃ (B) នៅវគ្គផ្ដាច់ព្រ័ត្រ។
សម្រាប់ចំណាត់ថ្នាក់សរុបនៅមណ្ឌលបាត់ដំបង គឺ៖
១. ចំណាត់ថ្នាក់លេខ១ (ម្ចាស់ជើងឯក) បានទៅលើ ក្លិបកីឡាបាល់ទះបាត់ដំបង
២. ចំណាត់ថ្នាក់លេខ២ បានទៅលើ សមាគមកីឡាបាល់ទះក្រសួងមហាផ្ទៃ (B)
៣. ចំណាត់ថ្នាក់លេខ៣ បានទៅលើ ក្លិបស្នងការដ្ឋាន ន.ប ខេត្តបាត់ដំបង
៤. ចំណាត់ថ្នាក់លេខ៤ បានទៅលើ ក្លិបស្នងការដ្ឋាន ន.ប ខេត្តបន្ទាយមានជ័យ
ក្នុងនាមជាក្រុមខ្លាំងនៅមណ្ឌលបាត់ដំបង ក្នុងពានរង្វាន់ Wurkz Special Volleyball Cup 4×4 ក្រុមម្ចាស់ជើងឯក ក្លិបកីឡាបាល់ទះបាត់ដំបង និងក្រុមជើងឯករង សមាគមកីឡាបាល់ទះក្រសួងមហាផ្ទៃ (B) មានឈ្មោះឡើងទៅប្រកួតបន្តនៅវគ្គផ្ដាច់ព្រ័ត្រ ដែលធ្វើឡើងនៅរាជធានីភ្នំពេញ។
សូមបញ្ជាក់ថាសម្រាប់គោលដៅទាំង ៥ ដែលគ្រោងរៀបចំពាន WURKZ SPECIAL VOLLEYBALL CUP 4×4 2024 ធំៗ មានដូចខាងក្រោម៖
- ភូមិភាគទី១ គឺភូមិភាគបាត់ដំបងដែលយើងចាប់ផ្ដើមនៅថ្ងៃទី ២៤-២៦ ខែកុម្ភៈ ឆ្នាំ២០២៤ ដូច្នេះ ចំពោះបណ្ដាលខេត្តដូចជា កំពង់ឆ្នាំង បាត់ដំបង ពោធិ៍សាត់ ប៉ៃលិន និងបន្ទាយមានជ័យ
- ភូមិភាគទី២ គឺភូមិភាគសៀមរាប ចាប់ផ្ដើមពីថ្ងៃទី ២-៣ ខែមិនា ឆ្នាំ២០២៤ ដែលមានការចូលរួមតាមបណ្ដាលខេត្តដូចជា សៀមរាប កំពង់ធំ ឧត្តមានជ័យ និងព្រះវិហារជាដើម
- ភូមិភាគទី៣ គឺភូមិភាគកំពង់ចាម ដែលនឹងត្រូវរៀបចំនៅថ្ងៃទី ៩-១០ ខែមិនា ឆ្នាំ២០២៤ ដែលក្នុងនោះមាន ក្រចេះ ស្ទឺងត្រែង រតនៈគិរី មណ្ឌលគិរី ត្បូងឃ្មុំ និងកំពង់ចាម
- ភូមិភាគទី៤ គឺព្រៃវែង ដែលមានកណ្ដាល ព្រៃវែងនិងបណ្ដាលខេត្តដែលមានជាប់ភូមិផងរបងជាមួយនឹងព្រៃវែង
- ភូមិភាគខេត្តព្រះសីហនុ ដែលនឹងចាប់ផ្ដើមនៅថ្ងៃទី ២៣-២៤ ខែមិនា 2024 នៅក្នុងនោះមានខេត្ត កំពង់ស្ពឺ ព្រះសីហនុ កែប កំពត កោះកុងជាដើម
- ម្ចាស់ជ័យលាភីទាំង ៥ភូមិភាគដែលលខ១ និងលេខ២ មានឈ្មោះដោយស្វ័យប្រវត្តិសម្រាប់ធ្វើការប្រកួតនៅរាជធានីភ្នំពេញ ដែលជាវគ្គជុំផ្ដាច់ព្រ័ត្រគ្រោងនឹងរៀបចំនៅថ្ងៃទី ២២-២៨ ខែមេសា ឆ្នាំ២០២៤។ មណ្ឌលរាជធានីភ្នំពេញ នឹងផ្ដល់ឱកាសទៅដល់បណ្ដាល ក្លិបធំៗទាំង ៦ដែលជាប់លេខរៀងពីលេខ ១ដល់លេខ ៦នៅក្នុងតេជោលីគត្រូវឈរជើងចាំ ចំពោះបេក្ខជនដែលមកតាមបណ្ដាលខេត្ត ឬភូមិភាគទាំង៥៕