យោងតាមការសម្រេចរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី៩ ខែមករា ឆ្នាំ២០២៤ រាជរដ្ឋាភិបាលកម្ពុជានឹងផ្អាកជាបណ្ដោះអាសន្នសម្រាប់រយៈពេល៦ខែ នូវការនាំចូលគ្រឿងក្នុង និងបំណែកសាច់បង្កក ដោយវិធានការនេះចាប់អនុវត្តពីថ្ងៃទី ១២ ខែមីនា ឆ្នាំ២០២៤នេះតទៅ។
សមាគមអ្នកចិញ្ចឹមសត្វកម្ពុជាបានបង្ហាញនូវការសាទរ និងក្ដីសង្ឃឹម ព្រមទាំងការព្រួយបារម្ភជាមួយគ្នានឹងវិធានការនេះផងដែរ។ សង្ឃឹមនោះ គឺវិស័យចិញ្ចឹមសត្វនៅកម្ពុជានឹងប្រសើរឡើងវិញ បន្ទាប់ពីវិបត្តិកូវីដ-១៩ បានថយឥទ្ធិពល ហើយកសិករដែលបោះបង់ការចិញ្ចឹម អាចនឹងត្រឡប់មកចិញ្ចឹមសត្វវិញ ខណៈតម្លៃសត្វចិញ្ចឹមក៏អាចនឹងកើនឡើងរហូតដល់ខ្ទង់ចំណេញបាន។
ចំណែកឯការព្រួយបារម្ភនោះ គឺសាច់បង្កកនៅតែបង្កផលប៉ះពាល់អវិជ្ជមាននៅក្នុងទីផ្សារសាច់សត្វដដែល ព្រោះថា សាច់បង្កកដែលនាំចូលមកមុខថ្ងៃអនុវត្តវិធានការ មានចំនួនច្រើន ពោលគឺអាចមានវត្តមានក្នុងទីផ្សាររហូតដល់៦ខែផងក៏ថាបាន។ នេះជាការលើកឡើងរបស់លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា។
បើតាមលោក ស៊្រុន ពៅ ទោះយ៉ាងណាក៏ដោយ លោកនៅតែបង្ហាញសុទិដ្ឋិនិយមលើវិស័យនេះថា វានៅតែល្អប្រសើរជាងប៉ុន្មានឆ្នាំមុននេះ ព្រោះរាជរដ្ឋាភិបាលបានងាកមកកែសម្រួលបទដ្ឋានគតិយុត្តិមួយចំនួនដែលគាំទ្រដល់វិស័យចិញ្ចឹមសត្វ។ ជាក់ស្ដែងនៅខែធ្នូចុងឆ្នាំ២០២៣ រាជរដ្ឋាភិបាលបានចេញអនុក្រឹត្យលេខ ៣៧០ ដោយបានដាក់បញ្ចូលផលិតផលសាច់គ្រឿងក្នុងសត្វ និងបំណែកសាច់បង្កកជាប្រភេទទំនិញជាប់កម្រិតកំណត់ និងនិរាករណ៍ចោលនូវអនុក្រឹត្យលេខ ១៧ ស្ដីពីការដាក់ឲ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់។ សូមបញ្ជាក់ថា អនុក្រឹត្យលេខ ១៧ នេះបានបើកទូលាយឲ្យនាំចូលសាច់បង្កក ដោយមិនមានការកំណត់ ឬត្រួតពិនិត្យតឹងរ៉ឹងនៅក្នុងប្រទេសនោះឡើយ ដើម្បីបំពេញតម្រូវការនៅក្នុងស្រុកអំឡុងពេលរីករាលដាលជំងឺកូវីដ-១៩។
បន្ថែមលើនេះ រាជរដ្ឋាភិបាលបានសម្រេចចេញវិធានការផ្អាកការនាំចូលសាច់បង្កកបណ្ដោះអាសន្នទៀត វាជាការណ៍ល្អសម្រាប់អ្នកចិញ្ចឹមសត្វនៅកម្ពុជា។
ប្រធានសមាគមអ្នកចិញ្ចឹមសត្វ ក៏បានបង្ហាញពីទំនុកចិត្ត ការជឿជាក់ និងពឹងផ្អែកទាំងស្រុង ចំពោះក្រសួងស្ថាប័ន និងសមត្ថកិច្ចពាក់ព័ន្ធទាំងឡាយក្នុងការអនុវត្តវិធានការខាងលើ។ ជាមួយគ្នានេះលោកស៊្រុន ពៅ បានឲ្យដឹងថា លោកបានធ្វើទំនាក់ទំនងយ៉ាងជាប់លាប់ជាមួយអ្នកសារព័ត៌មានប្រចាំនៅតាមព្រំដែន និងអំពាវនាវទៅកាន់សាធារណជនឲ្យជួយតាមដានទាំងអស់គ្នា ដើម្បីឱ្យប្រាកដថាវិធានការស្ដីពីការហាមឃាត់ការនាំចូលសាច់បង្កកនេះ ត្រូវបានអនុវត្តដោយប្រសិទ្ធភាព ឬក៏នៅតែមានជនខិលខូចគប់គិតគ្នាលួចលាក់នាំចូលសាច់បង្កកបំពានលើបម្រាមទៀត។
ជុំវិញបញ្ហានេះអ្នកនាំពាក្យក្រសួងកសិកម្ម ដែលជាតួអង្គសំខាន់មួយដែរនោះ នៅមិនទាន់ឆ្លើយតបនឹងសំណួរនៅឡើយទេ ដែលថា តើក្រសួងពាក់ព័ន្ធមានរៀបចំជារចនាសម្ព័ន្ធណាមួយ ដើម្បីត្រួតពិនិត្យ បន្ថែមលើការអនុវត្តវិធានការនេះដែរ ឬយ៉ាងណា ដើម្បីធានាបាននូវការអនុវត្តដោយប្រសិទ្ធភាព៕
អត្ថបទ៖ ឈិន ធារ៉ាត់