ឯកសារចាំបាន តែជីវិតមនុស្សមិនអាចចាំបានទេ ដូច្នេះសេវាសុខាភិបាល ប្រកបដោយគុណភាពត្រូវតែនៅកៀកនឹងប្រជាពលរដ្ឋបំផុត។ នេះជាប្រសាសន៍សម្ដេចមហាបវរធិបតីហ៊ុន ម៉ាណែត។
ដើម្បីជំរុញសេវាសុខភាពឲ្យគ្របដណ្ដប់ដល់ប្រជាពលរដ្ឋគ្រប់ៗគ្នាបាន ស្របតាមផែនការយុទ្ធសាស្ត្រដែលរាជរដ្ឋាភិបាលអាណត្តិទី៧ បានដាក់ចេញ គឺចាំបាច់ណាស់ត្រូវធ្វើវិមជ្ឈការលើវិស័យសុខាភិបាល។ ជាមួយគ្នានេះមានចំណុចអាទិភាពបីដែលត្រូវពង្រឹងគឺ ទី១ ហេដ្ឋារចនាសម្ព័ន្ធក្នុងមន្ទីរពេទ្យនៅតាមមូលដ្ឋាន រាប់តាំងពីសម្ភារៈបរិក្ខារ និងអគារពេទ្យ ទី២ សមត្ថភាពគ្រូពេទ្យគ្រប់ថ្នាក់ ជាពិសេសថ្នាក់ខេត្ត និងទី៣ បង្កើនភាពជាដៃគូរជាមួយពេទ្យឯកជន។ នេះជាប្រសាសន៍របស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងពិធីសម្ពោធដាក់ឲ្យប្រើប្រាស់មន្ទីរពេទ្យតេជោសែនកោះធំ នៅព្រឹកថ្ងៃទី ១៣ ខែមីនា ឆ្នាំ ២០២៤ ។
សូមលើកឡើងជាព័ត៌មានបន្ថែមថា មន្ទីរពេទ្យតេជោសែនកោះធំ ជាមន្ទីរពេទ្យបង្អែកថ្នាក់ស្រុក ដែលមានទំហំធំដំបូងគេ ដោយមានសមត្ថភាពផ្ដល់នូវពហុសេវារាប់ចាប់តាំងពីការពិគ្រោះយោបល់ រហូតដល់ ការវះកាត់ និងលាងឈាម និងមានគ្រែសម្រាប់អ្នកជំងឺសម្រាកចំនួន ១៧៩ គ្រែ បែងចែកទៅតាមប្រភេទជំងឺនីមួយៗ។
នេះជាសក្ខីភាពមួយនៃកំណែទម្រង់វិស័យសុខាភិបាលឲ្យកាន់តែប្រសើរឡើង ដើម្បីធ្វើយ៉ាងជំរុញសេវាសុខាភិបាលឲ្យទៅដល់ប្រជាពលរដ្ឋគ្រប់មជ្ឈដ្ឋានទូទាំងប្រទេស។
ជុំវិញការធ្វើវិមជ្ឈការក្នុងវិស័យសុខាភិបាលនេះ អ្នកឃ្លាំមើលសង្គម និង អ្នកជំនាញសុខភាពសាធារណៈ ក៏បានបង្ហាញសុទិដ្ឋិនិយមស្រដៀងគ្នាផងដែរ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លើកឡើងថា វិមជ្ឈការក្នុងវិស័យសុខាភិបាលនេះគឺជាការណ៍ល្អ និងផ្ដល់នូវផលវិជ្ជមានជាច្រើនដល់វិស័យសុខាភិបាល ដែលវាជួយជំរុញសេវាសុខភាពឲ្យដល់ប្រជាពលរដ្ឋគ្រប់មជ្ឈដ្ឋាន ជាពិសេសប្រជាពលរដ្ឋនៅតាមទីជនបទ បានកាន់តែប្រសើរឡើង។ លោកថា « បញ្ហាសមត្ថភាពរបស់មន្ត្រីសុខាភិបាល និងគ្រូពេទ្យនៅតាមមូលដ្ឋាន មិនមែនជាបញ្ហាប្រឈមក្នុងវិមជ្ឈការទេ អ្វីដែលប្រឈម និងត្រូវកែសម្រួលឲ្យបានលឿននោះ គឺ ក្រមសីលធម៌ វិន័យ និងអាកប្បកិរិយារបស់មន្ត្រីសុខាភិបាល និងគ្រូពេទ្យ ធ្វើយ៉ាងណាឲ្យស័ក្ដិសមជាអ្នកផ្ដល់សេវាជូនប្រជាពលរដ្ឋ » ។ លោកបន្ថែមថា កាលណារាជរដ្ឋាភិបាលធ្វើវិមជ្ឈការទៅឲ្យថ្នាក់ក្រោម គួរតែប្រគល់ទាំងតួនាទីភារកិច្ច ហិរញ្ញវត្ថុ សម្ភារៈបរិក្ខារ និងធនធានមនុស្សឲ្យទៅពួកគាត់ ជាមួយនឹងការបង្កើតប្រព័ន្ធគ្រប់គ្រងច្បាស់លាស់ ធានាបាននូវតម្លាភាព និងមិនមានពុករលួយ ហើយមិនគួរជ្រៀតជ្រែកក្នុងកិច្ចការទាំងនោះឡើយ ជៀសវាងបង្កការរំខានដល់ដំណើរការវិមជ្ឈការ។ ក្រសួងស្ថាប័នថ្នាក់កណ្ដាល គួរតែជាអ្នកឃ្លាំមើលពីដំណើរការនៃស្ថាប័នថ្នាក់ក្រោម និងតាមមន្ទីរពេទ្យ ដោយជួយចង្អុលបង្ហាញនូវបញ្ហា និងដំណោះស្រាយ បំពេញបន្ថែមចំណុចខ្វះខាត គាំទ្រផ្នែកណាមួយទៅតាមតម្រូវការ។
ចំណែកលោកបណ្ឌិត អ៊ី លីម៉ា អ្នកជំនាញសុខភាពសាធារណៈ យល់ឃើញថា «ការធ្វើវិមជ្ឈការក្នុងវិស័យសុខាភិបាល គឺមិនគួរបង្អង់ចាំយូរទៀតទេ ដើម្បីជំរុញសេវាសុខភាពឲ្យកាន់តែខិតចូលទៅកៀកប្រជាពលរដ្ឋ និងផ្ដល់ជូនប្រជាពលរដ្ឋបានឆាប់រហ័ស ប្រកបដោយគុណភាព » ។ ទន្ទឹមនេះ លោកក៏បង្ហាញក្ដីបារម្ភលើប្រការមួយចំនួនផងដែរ។ ទីមួយលោកបណ្ឌិត អ៊ី លីម៉ា បារម្ភលើការធ្វើការជាមួយគ្នារវាងរដ្ឋបាលខេត្ត និងថ្នាក់មូលដ្ឋានមានរដ្ឋបាលស្រុក ខណ្ឌ ឬឃុំសង្កាត់មិនស៊ីចង្វាក់គ្នា។ ទីពីរគឺ សមត្ថភាពគ្រប់គ្រងជាប្រព័ន្ធរបស់ប្រធានមន្ទីរពេទ្យ និងមណ្ឌលសុខភាព នៅមានកម្រិត។ ទីបី គឺបុគ្គលិក និងមន្ត្រីរដ្ឋបាលខេត្តនៅមិនទាន់យល់ពីគោលនយោបាយសុខាភិបាលច្បាស់លាស់ ដើម្បីគ្រប់គ្រងផ្នែកសុខាភិបាល ធ្វើការស្រាវជ្រាវ និងសម្រេចចិត្តឲ្យបានត្រឹមត្រូវដោយខ្លួនឯងនៅឡើយ។
សម្ដេចមហាបវរធិបតីមានប្រសាសន៍ថា វិមជ្ឈការសុខាភិបាល ត្រូវធ្វើឡើងជាជំហានៗ តាមដំណាក់កាល ស្របទៅតាមហេដ្ឋារចនាសម្ព័ន្ធ និងធនធានមនុស្ស។ ប៉ុន្តែនៅពេលបច្ចុប្បន្ននេះ ទន្ទឹមនឹងដំណើរការនៃវិមជ្ឈការ រាជរដ្ឋាភិបាលកំពុងពង្រឹងវិស័យមួយនេះឲ្យរឹងមាំ តាមរយៈពង្រឹងសេវាសុខភាពនៅតាមមូលដ្ឋាន ដោយផ្ដល់នូវសម្ភារៈបរិក្ខារ ថ្នាំសង្កូវដែលមានគុណភាព និងចាំបាច់ដូចជាថ្នាំលើសឈាម ទឹកនោមផ្អែមជាដើម និងពង្រឹងសមត្ថភាពគ្រូពេទ្យ។ ពោលគឺរាជរដ្ឋាភិបាលចាត់ទុកការពង្រឹងសេវាសុខាភិបាលនៅតាមមូលដ្ឋានជាចម្បង បន្ទាប់មកគឺការពង្រីកវិសាលភាពនៃវិមជ្ឈការតាមក្រោយជាដំណាក់កាលៗ។
សូមរំឭកថា វិស័យសុខាភិបាលធ្លាប់រងការរិះគន់យ៉ាងដំណំ ទាំងការរិះគន់ចំៗ និងដោយបញ្ឆិតបញ្ឆៀង។ ហើយក៏ធ្លាប់ទទួលបានការកោតសរសើរយ៉ាងធំធេងផងដែរ លើគុណសម្បត្តិនៃការខិតខំប្រឹងប្រែងប្រយុទ្ធប្រឆាំងនឹងជំងឺកូវីដ-១៩ និងបានជួយស្រោចស្រង់អាយុជីវិតប្រជាជនកម្ពុជារាប់លាននាក់។ នៅក្នុងយុទ្ធសាស្ត្រចតុកោណនៃរាជរដ្ឋាភិបាលអាណត្តិកន្លងទៅ ក៏មានដាក់បញ្ចូលវិស័យសុខាភិបាលជាជ្រុងមួយដែរ ប៉ុន្តែមើលជារួមទៅ វាហាក់ដូចជាដើរយឺតជាងគេ។ មកដល់ជំនាន់រាជរដ្ឋាភិបាលថ្មី នីតិកាលទី៧ វិស័យនេះត្រូវបានច្រានឲ្យមកឈរបង្ហាញមុខនៅខាងមុខជួ ដើម្បីកែសម្រួល និងពង្រឹងសមត្ថភាពបន្ថែមទៀត។ ជាក់ស្ដែងកម្មវិធីនយោបាយ៦ចំណុចរបស់រាជរដ្ឋាភិបាល បានដាក់ ការពង្រីកសេវាសុខភាពឲ្យបានដល់ប្រជាពលរដ្ឋគ្រប់ៗគ្នា ឋិតនៅចំណុចទីមួយតែម្ដង។
អត្ថបទ៖ ឈិន ធារ៉ាត់
