ដើម្បីផ្លាស់ប្តូរថ្មីនៅក្នុងវិស័យបាល់ទាត់ក្នុងខេត្តសៀមរាប ក៏ដូចជានៅកម្ពុជា ក្លិបបាល់ទាត់សៀមរាប នឹងពង្រឹងបន្ថែម លើការអភិវឌ្ឍន៍ក្រុមបាល់ទាត់បុរស ក្រុមបាល់ទាត់នារី និងក្រុមយុវជន ឱ្យកាន់តែមានការប្រកួតប្រជែងបន្ថែមទៀត។
ដោយឡែកកាលពីថ្ងៃទី១៦ មីនា ក្លិបបាល់ទាត់សៀមរាប បានប្រកាសតែងតាំងលោក ពិន ពឿន គឺជាប្រធានថ្មីនៃក្លិប។ លោក ពិន ពឿន មានចក្ខុវិស័យ ក្នុងការចូលរួម ធ្វើឱ្យបាល់ទាត់នៅខេត្តសៀមរាប កាន់តែមានឈ្មោះបោះសំឡេងទាំងក្នុងប្រទេស និងអន្តរជាតិ។
១ថ្ងៃបន្ទាប់ ក្លិបបាល់ទាត់សៀមរាប ក៏បានប្រកាបីការចូលរួមរបស់លោក Alexander Kütt គឺជានាយកប្រតិបត្តិនៃក្លិប។ លោក Alexander Kütt មានបទពិសោធន៍ច្រើនក្នុងវិស័យបាល់ទាត់នៅកម្ពុជា ដូច្នេះលោកនឹងចូលរួមជួយពង្រឹងបន្ថែមការអភិវឌ្ឍន៍នានា នៅក្លិបបាល់ទាត់សៀមរាប ។
គួរបញ្ជាក់ថា ក្លិបបាល់ទាត់សៀមរាប បច្ចុប្បន្នគឺជាសមាជិកលីគទី២ កម្ពុជា ដែលកំពុងមានការប្រកួតប្រជែងយ៉ាងខ្លាំង ដោយស្ថិតនៅចំណាត់ថ្នាក់ លេខ៩ ឆ្លងកាត់ ១៦ប្រកួត ឈ្នះ២ប្រកួត ស្មើ៦ប្រកួត និងចាញ់ ៨ប្រកួត មាន១២ពិន្ទុក្នុងដៃ៕
