ដំណើរទស្សនកិច្ចមួយទៅកាន់ខេត្តសៀមរាបត្រូវបានរៀបចំឡើងដោយក្លឹបអ្នកកាសែតកម្ពុជា ក្នុងគោលដៅដើម្បីចូលរួមផ្សព្វផ្សាយទ្រង់ទ្រាយធំស្ដីពីសក្ដានុពលទេសចរណ៍ខេត្តសៀមរាប។ បេសកកម្មនេះ មានការចូលរួមពីស្ថាប័នសារព័ត៌មានជាតិ និងបរទេសចំនួន ៣២ ស្ថាប័ន និងមានអ្នកសារព័ត៌មាន ចំនួន ៤២ នាក់ រួមមានទាំងទូរទស្សន៍ និងអនឡៃញ៍។
ដំណើរទស្សនកិច្ចនេះ មានរយៈពេល៣ថ្ងៃ ២យប់ គឺចាប់ផ្ដើមពីថ្ងៃទី ១៥ ដល់ថ្ងៃទី ២៧ ខែមីនា ឆ្នាំ ២០២៤ ដោយមានការឧបត្ថម្ភគាំទ្រ និងសម្របសម្រួលចូលទស្សនា យកព័ត៌មាន និងផ្ដិតរូបភាពក្នុងរមណីយដ្ឋានដ៏មានសក្ដានុពលដោយ ក្រុមហ៊ុន Angkor Wild Lif & Aquarium ក្រុមហ៊ុន Angkor Eyes (កន្ត្រកវិល) អាកាសយានដ្ឋានអន្តរជាតិសៀមរាប សហគមន៍ភូមិព្រះដាក់ ក្រុមរថយន្ត Jeep កម្ពុជា សហគមន៍អេកូទេសចរណ៍កំពុងភ្លុក បុណ្យទន្លេ និងសន្និសីទសារព័ត៌មាន ដែលមានការចូលរួមពីរដ្ឋមន្ត្រីក្រសួងទេសចរណ៍នៅមុខប្រាសាទអង្គរវត្ត។
តាមរយៈដំណើរទស្សនកិច្ចនេះ បណ្ដាក្រុមហ៊ុនខាងលើបានថ្លែងទៅកាន់អ្នកសារព័ត៌មានស្រដៀងៗគ្នាថា រយៈពេលជិត២ឆ្នាំ បន្ទាប់ពីរាជរដ្ឋាភិបាលប្រកាសបើកវិស័យទេសចរណ៍ឡើងវិញក្រោយពីការញាំញីដោយវិបត្តិកូវីដ-១៩ កំណើនភ្ញៀវទេសចរណ៍ខេត្តសៀមរាបហាក់នៅមានកម្រិតទាបនៅឡើយ ពោលគឺក្រោម៥០ភាគរយ បើធៀបទៅនឹងឆ្នាំ ២០១៩។
ទោះបីជាយ៉ាងនេះក្ដី ឯកឧត្ដម សុខ សូកេន រដ្ឋមន្ត្រីក្រសួងទេសចរណ៍នៅតែបង្ហាញសុទិដ្ឋិនិយមចំពោះកំណើនភ្ញៀវទេសចរណ៍ក្នុងចាំ២០២៤ នេះថា អាចនឹងកើនឡើងរហូតដល់ស្មើ ឬទាបជាងឆ្នាំ ២០១៩ តិចតួចប៉ុណ្ណោះ។
ក្នុងនាមជាប្រធានក្លឹបអ្នកកាសែតកម្ពុជា លោក ពុយ គា លើកឡើងថា តាមរយៈបេសកកម្មរយៈពេល ៣ថ្ងៃនេះ អ្នកសារព័ត៌មាននឹងបានចូលរួមចំណែកក្នុងការផ្សព្វផ្សាយឲ្យបានកាន់តែទូលំទូលាយ អំពីសក្ដានុពលទេសចរណ៍នៅក្នុងខេត្តសៀមរាប ឲ្យមើលឃើញថា ក្រៅតែពីប្រាសាទអង្គរ ខេត្តគោលដៅទេសចរណ៍មួយនេះ នៅមានកន្លែងទស្សនាជាច្រើន និងប្លែកៗពីគ្នា។ ជាមួយគ្នានេះ ក្លឹបអ្នកកាសែតកម្ពុជា ក៏នឹងបន្តបេសកកម្មនេះទៅកាន់ខេត្តគោលដៅទេសចរណ៍ផ្សេងៗទៀតជាបន្តបន្ទាប់។
ដើម្បីលម្អិតពីដំណើរទស្សនកិច្ចរបស់អ្នកសារព័ត៌មាន ដែលដឹកនាំដោយក្លឹបអ្នកកាសែតកម្ពុជាទៅកាន់ទីតាំងទេសចរណ៍នីមួយៗ ក្នុងខេត្តសៀមរាប សារព័ត៌មានត្រយងនឹងបង្ហាញនៅមាតិកាបន្ទាប់៕
អត្ថបទ៖ ឈិន ធារ៉ាត់