ក្រសួងធនធានទឹក និងឧតុនិយមព្រួយបារម្ភពីគុណភាពទឹកទន្លេមេគង្គ ក្រោយមានហេតុការណ៍ក្រឡាប់រថយន្តដឹកសារធាតុគីមីគ្រោះថ្នាក់ ធ្វើឲ្យកំពប់ចូលទន្លេណាម ខាន់ នៅប្រទេសឡាវ កាលពីថ្ងៃទី ៣ ខែមេសា ឆ្នាំ២០២៤ ។ ករណីនេះ លេខាធិការដ្ឋានគណៈកម្មការទន្លេមេគង្គ និងអាជ្ញាធរពាក់ព័ន្ធខាងប្រទេសឡាវ កំពុងធ្វើការត្រួតពិនិត្យអំពីទំហំប៉ះពាល់ដល់បរិស្ថាន។ គិតមកដល់ថ្ងៃទី៧ មេសានេះ លេខាធិការដ្ឋានទន្លេមេគង្គ និងអាជ្ញាធរឡាវបញ្ជាក់ថា ពុំមានផលប៉ះពាល់ដល់បរិស្ថានទន្លេណាម ខាន់ និងទន្លេមេគង្គនោះទេ។
សារធាតុគីមីដែលកំពប់ចូលទៅក្នុងទន្លេណាម ខាន់គឺជា អាស៊ីដស៊ុលហ្វួរិក មានចំណុះ៣០តោន តែវាមិនហូរចូលក្នុងទឹកទន្លេទាំងអស់នោះទេ។
សូមបញ្ជាក់ថា ទន្លេណាម ខាន់ ជាទន្លេតូចមួយនៅប្រទេសឡាវ ដែលប្រព្វគ្នានឹងទន្លេមេគង្គនៅហ្លួងព្រះបាង។
តាមការចុះផ្សាយរបស់សារព័ត៌មាន Laotian Times កាលពីថ្ងៃទី៣ ខែមេសាឆ្នាំ ២០២៤ រថយន្តដឹកអាស៊ីដស៊ុលហ្វួរិកចំណុះ ៣០តោន មួយគ្រឿងបានក្រឡាប់បះជើង នៅភូមិ ភូសាងខាំ ស្រុកហ្លួងព្រះបាង ធ្វើឲ្យកំពប់ទឹកអាស៊ីដប្រមាណជាពាក់កណ្ដាល (៥០%) ចូលទៅក្នុងស្ទឹងក្បែរទន្លេណាម ខាន់ ដែលស្ទឹងនោះវាហូរចូលទៅក្នុងទន្លេដែរ។ សារព័ត៌មានដដែលបានបញ្ជាក់ថា ទីតាំងកើតហេតុមានចម្ងាយប្រហែល ៣០០ ម៉ែត្រពីទន្លេណាម ខាន់ និងប្រហែល ៦ គីឡូម៉ែត្រពីចំណុចប្រសព្វនៃទន្លេមេគង្គ។ ប្រសិនបើគិតពីទីនោះមកដល់ព្រំប្រទល់កម្ពុជា-ឡាវមានចម្ងាយ ១ ៣៧០ គីឡូម៉ែត្រ។
ទោះជាមិនទាន់រកឃើញពីផល់ប៉ះពាល់ដល់បរិស្ថានទន្លេណាម ខាន់ និងទន្លេមេគង្គ ដែលបណ្ដាលមកពីឧបទ្ទវហេតុក្រឡាប់រថយន្តដឹកទឹកអាស៊ីដខាងលើក្ដី ក៏លេខាធិការដ្ឋានគណៈកម្មការទន្លេមេគង្គនៅតែសហការជាមួយភាគីពាក់ព័ន្ធ ដើម្បីពិនិត្យតាមដានវាយតម្លៃជាបន្តទៀត ធ្វើយ៉ាងណាធានាដល់កិច្ចការពារបរិស្ថាន និងសុខភាពសាធារណៈរបស់ប្រជាពលរដ្ឋរស់នៅតាមដងទន្លេ។
ជាមួយគ្នានេះ ក្រសួងធនធានទឹក និងឧតុនិយម និងគណៈកម្មាធិការជាតិទន្លេមេគង្គកម្ពុជា កំពុងយកចិត្តទុកដាក់ខ្ពស់ អំពីផលប៉ះពាល់ដែលអាចកើតមានពីឧបទ្ទវហេតុខាងលើ មកលើគុណភាពទឹកទន្លេមេគង្គក្នុងប្រទេសកម្ពុជា និងធ្វើការជូនដំណឹងបន្ថែម ក្នុងករណីចាំបាច់។
អត្ថបទ៖ ឈិន ធារ៉ាត់