ប្រេស៊ីល៖ ប៉ូលីសប្រេស៊ីល បានចាប់ខ្លួនស្ត្រីម្នាក់ ដែលព្យាយាមរុញអ្នកស្លាប់តាមរទេះរុញមកចុះហត្ថលេខា ដើម្បីខ្ចីប្រាក់ពីធនាគារ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃព្រហស្បតិ៍ ទី១៨ ខែមេសា ឆ្នាំ២០២៤។
បុគ្គលិកនៅធនាគារ Rio de Janeiro បានហៅសេវាសង្គ្រោះបន្ទាន់ កាលពីថ្ងៃអង្គារ បន្ទាប់ពីមានការសង្ស័យ នៅពេលដែលស្រ្តីម្នាក់ឈ្មោះ Erika Vieira Nunes បានរុញសពបុរសអាយុ ៦៨ឆ្នាំ ចូលទៅក្នុងធនាគារ ហើយស្នើសុំប្រាក់កម្ចីដោយប្រើឈ្មោះសពបុរសខាងលើ។
ប៉ូលីសបាននិយាយនៅក្នុងសេចក្តីថ្លែងការណ៍មួយថា នៅពេលដែលបុគ្គលិកសង្គ្រោះបន្ទាន់មកដល់ ពួកគេបានឃើញថា បុរសនោះបានស្លាប់បាត់ទៅហើយ សាកសពរបស់បុរសខាងលើ ត្រូវបានគេយកទៅតម្កល់ទុកនៅទីបញ្ចុះសព។
សារព័ត៌មានប្រេស៊ីល រាយការណ៍ថា ស្រ្តីឈ្មោះ Nunes បានអះអាងថា ជាក្មួយស្រីរបស់សពបុរសនោះ ហើយបានស្វែងរកប្រាក់កម្ចីចំនួន ១៧,០០០Reais (ប្រហែល ៣,២៥០ដុល្លារអាមេរិក) ដោយយកឈ្មោះរបស់អ្នកស្លាប់ មកធ្វើការកម្ចី។
ប្រធានស៊ើបអង្កេតក្នុងស្រុក Fabio Luiz បានប្រាប់គេហទំព័រព័ត៌មាន G1 ថា «នាងបានព្យាយាមបន្លំធ្វើឱ្យវាមើលទៅ ដូចជាសពខាងលើនៅរស់រានមានជីវិតហើយកំពុងស្មគ្រចិត្តចុះហត្ថលេខាលើឯកសារកម្ចី។ ប៉ុន្តែយ៉ាងណា បុរសនោះបានស្លាប់បាត់ទៅហើយ នៅពេលស្រ្តីនោះអូសគាត់ចូលទៅក្នុងធនាគារ»។
ជុំវិញបញ្ហានេះ មេធាវីរបស់ស្រ្តីឈ្មោះ Nunes បានប្រកែកថា «បុរសនោះបានស្លាប់នៅធនាគារ ប៉ុន្តែការវិភាគកោសល្យវិច្ច័យរបស់ប៉ូលីស បានកំណត់ថា បុរសនោះបានស្លាប់មុននេះ ពេលកំពុងដេក»។
យ៉ាងណាម៉ិញ ប៉ូលីសសម្រាប់តំបន់ Bangu នៅភាគខាងលិចនៃទីក្រុង Rio បានចាប់ខ្លួននាងពីបទប៉ុនប៉ងលួចដោយការក្លែងបន្លំ និងបង្ខូចឈ្មោះសាកសព៕
