សិល្បៈជាតិ៖ កម្មវិធីជប់លៀង អាពាហ៍ពិពាហ៍រវាងអ្នកនាង ដួង ម៉ានិច និងស្វាមីអ្នកជំនួញវ័យក្មេង លោក វ៉ន លីពុទ្ធិឆាត ដែលអ្នកគាំទ្រនិយមហៅថា ហ៊ា ឆាត តាមម៉ាក់និច បានប្រព្រឹត្តិទៅក្នុងបរិយាកាសមួយដ៏សែនរីករាយនិងរ៉ូមែនទិច នាឆ្នេរសមុទ្ររាម កាលពីរាត្រីថ្ងៃទី ២២ ខែមេសា ឆ្នាំ២០២៤ កន្លងទៅ ក្រោមវត្តមានភ្ញៀវកិត្តិយសដ៏ច្រើនកុះករ។
ជាការពិតណាស់គូស្វាមីភរិយាថ្មោងថ្មីមួយគូនេះ ធ្លាប់បានក្រាបក្បាលដល់កន្ទេល នៅចំពោះមុខអ្នកមានគុណទាំងសងខាង ក្នុងពិធីរៀបអាពាហ៍ពិពាហ៍បែបប្រពៃណីខ្មែរ ក៏ដូចជាបានចុះសំបុត្រអាពាហ៍ពិពាហ៍តាមច្បាប់ រួចម្ដងមកហើយកាលពីថ្ងៃទី១០ ខែមេសា កន្លងទៅ។
យ៉ាងណាមិញដោយសារកម្មវិធីនោះប្រព្រឹត្តិទៅលក្ខណៈឯកជន ក្នុងចំណោមក្រុមគ្រួសារសាច់ញាតិ ទើបនៅថ្ងៃទី២១-២២ ខែមេសា កន្លងទៅនេះ បុគ្គលល្បីទាំងពីរបានរៀបចំកម្មវិធីជប់លៀងដើម្បីជួបជុំមិត្តភក្ដិ និងប្រកាសពីឋានៈជាស្វាមីភរិយាស្របច្បាប់ ដោយមានភ្ញៀវកិត្តិយសទាំងក្នុងរង្វង់សិល្បៈ និងក្រៅរង្វង់សិល្បៈជាសាក្សី។
កម្មវិធីរបស់ អ្នកនាង ដួង ម៉ានិច ត្រូវបានសាធារណជនមើលឃើញថា បានផ្ដល់ជាគំរូល្អមួយដែរ ព្រោះបានបញ្ជាក់ថាមិនទទួលគ្រឿង ស្រវឹង ក្រៅពីរឿងមួយនេះ ពិធីអាពាហ៍ពិពាហ៍ដ៏អធិកអធមរបស់អ្នកនាង ក៏មិនភ្លេចរំលេចអនុស្សាវរីយ៍ពីអតីតកាល គាស់កកាយបទចម្រៀងល្បី គ្រលែង សំនៀង របស់ លោក Tempo Tris និង T.O ដែលអ្នកនាង សម្ដែងជាតួឯកស្រី មក Surprise ស្វាមី ហ៊ា ឆាត ផងដែរ។ អ្នកនាង បានលើកយកក្បាច់រាំចង្អុលមេឃ ដែលធ្លាប់ល្បីល្បាញ និងផ្ទុះខ្លាំងលើតិកតុកកាលពី៧ឆ្នាំមុនមករាំ រំលឹកអនុស្សាវរីយ៍ចាស់ រហូតផ្ទុះការចាប់អារម្មណ៍យ៉ាងគគ្រឹកគគ្រេងនៅលើបណ្ដាញទំនាក់ទំនងសង្គមទាំង ហ្វេសប៊ុក និង តិកតុក សារជាថ្មី។
គួររំលឹកផងដែរថា អ្នកនាងដួង ម៉ានិច ធ្លាប់បានសរសើរស្វាមីហ៊ា ឆាត បុរសអ្នកជំនួញអនឡាញ និង យូធូបប៊ឺដែលមានឈ្មោះលើបណ្ដាញសង្គមសរសេរថា Lyderzz ថាជាបុរសល្អ ចេះស្រលាញ់និងយកចិត្តទុកដាក់មើលថែទាំងនាង ផ្ដល់ភាពកក់ក្ដៅដល់នាង ជាពិសេសគឺហ៊ានលះបង់ពេលវេលាផ្ទាល់ខ្លួន លះបង់យុវវ័យ ព្រមទាំងអ្វីៗគ្រប់យ៉ាងដើម្បីឱ្យនាងមានស្នាមញញឹម ហើយក៏ជាមនុស្សដែលចង់ឃើញនាងបានសម្រេចក្ដីស្រមៃ ដោយអ្នកនាងបានបញ្ជាក់យ៉ាងខ្លីទៀតថា ក្ដីស្រមៃរបស់នាង អត់មានអ្វីច្រើនទេ គឺគ្រាន់តែចង់កាន់ដៃស្វាមីដល់ចាស់រៀងខ្លួនប៉ុណ្ណោះ៕