សិល្បៈជាតិ៖ ស្របពេលដែលសិល្បករសិល្បការិនីឆ្នើមជាច្រើនក្នុងវិស័យសិល្បៈ ត្រូវបានឡើងទទួលការបំពាក់គ្រឿងឥស្សរិយយសដោយប្រមុខថ្នាក់ដឹកនាំប្រទេស ស្រាប់តែស្រីស្អាតពីដួង ងិន ម៉ារ៉ាឌី និង អែម គុនថង បែរជាបង្ហោះសារតូចចិត្តស្អិតទ្រូងព្រោះមិនបានឡើងទទួលគ្រឿងឥស្សរិយយសដូចគេ ដោយសំអាងថា ខ្លួនក៏ធ្លាប់បានតស៊ូចេញទៅប្រកួតនៅឆាកអន្តរជាតិដើម្បីមុខមាត់ប្រទេស និងបានចូលរួមកម្មវិធីថ្នាក់ជាតិជាច្រើនណាសដែរ ប៉ុន្តែប្រហែលជាមិនសំខាន់ទើបគ្មានអ្នកស្គាល់ ឬចាប់អារម្មណ៍ទេមើលទៅ?
ស្រីស្អាតអតីតម្ចាស់មកុដ Miss Universe Cambodia ឆ្នាំ ២០២១ អ្នកនាង ងិន ម៉ារ៉ាឌី បានបង្ហោះសារនៅលើបណ្ដាញសង្គមហ្វេសប៊ុកឡើងថា ៖ «ខ្ញុំមិនយល់ ក្នុងនាមខ្ញុំជា miss universe Cambodia 2021 ម្នាក់ដែរ ហើយក៏បានតំណាងប្រទេសកម្ពុជាទៅលើឆាកអន្តជាតិដូច បងៗក្នុងក្រុមខ្ញុំដែរ តើមូលហេតុអីបានជាខ្ញុំមិនទទួលបានគ្រឿងឥស្សរិយយសដូចគេ? តើខ្ញុំមានចំណុចអន់ត្រង់ណា? ឬមួយអស់លោកអ្នកដែលបញ្ចូនឈ្មោះទៅថ្នាក់លើមិនបានស្គាល់ខ្ញុំ? ok យល់គ្រប់យ៉ាង »។
ហើយជាមួយគ្នានោះដែរ ស្រីស្អាត Miss Global Cambodia ឆ្នាំ ២០២២ កញ្ញា អែម គុនថង ក៏បានបង្ហោះសារតូចចិត្តដែរថា ៖ «ខ្ញុំនេះវិញចូលរួចកម្មវិធីជួយជាតិតាំងពីឆ្នាំ 2015 មិនដែលបានលុយទេព្រោះស្រលាញ់ កម្មវិធីបុណ្យជាតិមានមុខរហូតដល់ពេលមានកម្មវិធីអីចឹងអត់មានមុខខ្ញុំសោះ»។
យ៉ាងណាមិញ ការបង្ហោះសាររបស់ស្រីស្អាតទាំងពីរខាងលើក៏បានទាញឱ្យអ្នកគាំទ្រចូលរួមជាមតិបន្ទោសអ្នករៀបចំកម្មវិធីដែលមិនបានអើពើអ្នកទាំងពីរស្រដៀងៗគ្នាថា ៖ «អ្នកល្អច្រើនណាស់តែគេមើលរំលង » «ហេតុអ្វីគេមើលរំលង Queen» « កុំចង់បានអីបងបើគេមើលមិនឃើញពីតម្លៃការលះបង់ តស៊ូដើម្បីមុខមាត់ជាតិ កំណើតនៅតែស្រលាញ់បង » និងខ្លះទៀតថា «ខ្ញុំក៏អត់យល់ដូចគ្នា តែបែរជាតួរទើបតែល្បីបាន1-3ឆ្នាំអី តួថ្មីអីបែរជាមានឈ្មោះទៅវិញ »។
ដោយឡែក កម្មវិធី «ពិសាអាហារសាមគ្គី និង បំពាក់គ្រឿងឥស្សរិយយស ជូនលោកគ្រូ អ្នកគ្រូ និង សិល្បករ សិល្បការិនី ដែលមានស្នាដៃល្អឆ្នើម» គឺនឹងប្រព្រឹត្តទៅនាថ្ងៃទី២៥ ខែមេសា ឆ្នាំ២០២៤ នៅមណ្ឌលសន្និបាត និងពិព័រណ៌កោះពេជ្រ ក្រោមវត្តមានដ៏ខ្ពង់ខ្ពស់ពីសម្ដេចមហាបវរធិបតី ហ៊ុន ម៉ាណែត ៕
