សម្ដេចធិបតី ស្នើឲ្យក្រុមហ៊ុនធំៗ ដែលវិនិយោគលើវិស័យបច្ចេកវិទ្យា បើកឱកាសឲ្យយុវជនខ្មែរ ដែលបានឆ្លងកាត់ និងកំពុងបណ្ដុះបណ្ដាលជំនាញពាក់ព័ន្ធបានចូលធ្វើជាកម្មសិក្សាការី ឬអ្នកហាត់ការងារ ដើម្បីរៀនសូត្របង្កើនជំនាញបន្ថែមទៀត ដោយសហការជាមួយក្រសួងការងារ និងបណ្ដុះបណ្ដាលវិជ្ជាជីវៈ ដែលកំពុងអនុវត្តកម្មវិធីនយោបាយរបស់រាជរដ្ឋាភិបាលក្នុងការបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនកម្ពុជា សំដៅឆ្លើយតបទៅនឹងតម្រូវការទីផ្សារការងារ និងទាក់ទាញការវិនិយោគពីក្រុមហ៊ុនធំៗកាន់តែច្រើន។
សម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា មានប្រសាសន៍បែបនេះ ក្នុងឱកាសអញ្ជើញជាអធិបតីក្នុងពិធីសម្ពោធដាក់ឲ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតានៅតំបន់សេដ្ឋកិច្ចពិសេសរ៉ូយ៉ាល់គ្រុប រាជធានីភ្នំពេញ នាព្រឹកថ្ងៃទី០២ ខែឧសភា ឆ្នាំ២០២៤។
សម្ដេចធិបតី បានគូសបញ្ជាក់ថា រាជរដ្ឋាភិបាលតែងចាត់ទុកវិស័យឯកជនជាក្បាលម៉ាស៊ីនក្នុងការអភិវឌ្ឍសេដ្ឋកិច្ចជាតិ និងជាដៃគូសំខាន់ក្នុងការបង្កើតការងារជូនប្រជាពលរដ្ឋ ការបង្កើតគំនិតច្នៃប្រតិស្ឋ ការលើកកម្ពស់ផលិតភាព ការពង្រឹងសមត្ថភាពប្រកួតប្រជែងរបស់កម្ពុជាក្នុងទីផ្សារតំបន់ និងទីផ្សារសកល។ ជាមួយគ្នានេះ ការដាក់ទុនវិនិយោគរបស់ក្រុមហ៊ុនបច្ចេកវិទ្យាធំៗ មកកាន់កម្ពុជា បានផ្ដល់នូវលទ្ធភាពក្នុងការផ្ទេរបច្ចេកវិទ្យាទំនើបៗ ចូលមកកម្ពុជាក្នុងទម្រង់ពីរ គឺ ទី១ ហេដ្ឋារចនាសម្ព័ន្ធ សម្ភារៈបច្ចេកទេស និងគ្រឿងយន្ត, ទី២ គឺធនធានមនុស្ស ដែលត្រូវធ្វើការបណ្ដុះបណ្ដាល និងទទួលបានបទពិសោធន៍ថ្មីៗ តាមរយៈការងារ។
សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លើកទឹកចិត្តឲ្យក្រុមហ៊ុនបច្ចេកវិទ្យា ដែលបានដាក់ទុនវិនិយោគមកកម្ពុជា មិនត្រឹមតែដើរតួនាទីផលិត និងធ្វើពាណិជ្ជកម្មប៉ុណ្ណោះទេ ជាមួយគ្នានេះក៏ត្រូវតែដើរតួនាទីជាថ្នាលបណ្ដុះធនធានមនុស្ស ដើម្បីការពារ ជំរុញលើកទឹកចិត្ត បង្កលក្ខណៈល្អប្រសើរ ដើម្បីឲ្យវិស័យបច្ចេកវិទ្យានៅកម្ពុជាកាន់តែរីកចម្រើនផងដែរ៕
អត្ថបទ៖ ឈិន ធារ៉ាត់
