នាយឧត្ដមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបញ្ជាក់បន្ថែមលើសេចក្ដីប្រកាសព័ត៌មាន ដោយព្រមានថា មិនត្រូវមានចេតនាកេងចំណេញផ្នែកនយោបាយ ឬផលប្រយោជន៍ផ្ទាល់ខ្លួន ឬក្រុមណាមួយ លើពលីកម្មរបស់យុទ្ធជនក្នុងឧបទ្ទវហេតុផ្ទុះគ្រាប់នេះឡើយ។
តាមរយៈសេចក្ដីប្រកាសព័ត៌មានកាលពីថ្ងៃទី១ ខែឧសភា ឆ្នាំ២០២៤ នេះ ក្រសួងការពារជាតិ ស្នើដល់សាធារណជន ព្រមទាំងអ្នកសារព័ត៌មានជាតិ និងអន្តរជាតិ បញ្ឈប់ការផ្សាយព័ត៌មានមិនពិត ពាក់ព័ន្ធនឹងឧបទ្ទវហេតុផ្ទុះគ្រាប់យុទ្ធភណ្ឌចាស់ៗនៅទីបញ្ជាការភូមិភាគ៣ ដោយធ្វើការសន្និដ្ឋាន ឬយល់ឃើញណាមួយ ដោយបុគ្គលផ្ទាល់ខ្លួន មិនមានមូលដ្ឋានច្បាស់លាស់ ឬមានចេតនាបង្កចលាចល ញុះញង់ នាំឲ្យប៉ះពាល់ដល់សន្តិសុខ សណ្ដាប់ធ្នាប់ សេដ្ឋកិច្ចសង្គម ដែលឈានទៅដល់ ការទទួលខុសត្រូវចំពោះមុខច្បាប់។
សេចក្ដីប្រកាសព័ត៌មាននេះធ្វើឡើង ក្រោយពីលោក សម រង្ស៊ី ជាអ្នកនយោបាយជាប់ពិរុទ្ធបង្ហោះ ព័ត៌មានមិនពិត ដោយមានចេតនាប្រើហេតុការណ៍នេះ ដើម្បីកេងចំណេញនយោបាយ។ ខ្លឹមសារនៃសាររបស់លោក សម រង្ស៊ី បានកាឡៃឧបទ្ទវហេតុផ្ទុះគ្រាប់ ទៅជាចលនាប្រដាប់អាវុធប្រឆាំងនឹងរាជរដ្ឋាភិបាល ដែលដឹកនាំដោយសម្ដេចធិបតីហ៊ុន ម៉ាណែត ទៅវិញ។
សេចក្ដីប្រកាសព័ត៌មានរបស់ក្រសួងការពារជាតិបញ្ជាក់សាជាថ្មីថា ឧបទ្ទវហេតុផ្ទុះគ្រាប់យុទ្ធភណ្ឌ នៅទីបញ្ជាការភូមិភាគ៣ គឺជាបញ្ហាបច្ចេកទេស ដោយសារប្រភេទអាវុធជាតិផ្ទុះចាស់ៗ ខូចគុណភាព រួមជាមួយ អាកាសធាតុឡើងកម្ដៅ មិនមែនជាបញ្ហាកងទ័ពបះបោរ អំពើភេរវកម្ម ឬចេតនារបស់បុគ្គលណាមួយដូចបានបំផ្លើសឡើយ។
បើទោះបីជា ហេតុការណ៍នេះបានកន្លងទៅយូរថ្ងៃហើយក្ដី សារព័ត៌មានមួយចំនួននៅតែបន្តជីកកកាយរករឹះគល់នៃមូលហេតុកាន់តែលម្អិត ដើម្បីផ្សព្វផ្សាយជាបន្តបន្ទាប់មិនងាយចប់។ ជុំវិញបញ្ហានេះ នាយឧត្ដមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ លើកឡើងថា ក្រសួងបានចេញសេចក្ដីប្រកាសព័ត៌មានម្ដង ជាពីរដងហើយ ពាក់ព័ន្ធនឹងឧបទ្ទវហេតុខាងលើ ល្មមគ្រប់គ្រាន់អាចចុះផ្សាយជាព័ត៌មានបាន ដោយឡែកការចុះផ្សាយរបស់សារព័ត៌មានផ្សេងៗ ត្រូវឈរលើក្រមសីលធម៌វិជ្ជាជីវៈ គោរពច្បាប់ និងស្មារតីការពារកិត្តិយស ផលប្រយោជន៍ជាតិ ហើយត្រូវធានាថា មិនប៉ះពាល់ដល់កិត្តិយសកងទ័ពជាតិ។ ជាមួយគ្នានេះលោកព្រមានថា មិនត្រូវមានចេតនាកេងចំណេញផ្នែកនយោបាយ ឬផលប្រយោជន៍ផ្ទាល់ខ្លួន ឬក្រុមណាមួយ លើពលីកម្មរបស់យុទ្ធជនក្នុងឧបទ្ទវហេតុផ្ទុះគ្រាប់នេះឡើយ។
សូមរំឭកថា កាលពីរសៀលថ្ងៃទី ២៧ ខែមេសា ឆ្នាំ២០២៤ មានឧបទ្ទវហេតុផ្ទុះគ្រាប់នៅទីបញ្ជាការយោធភូមិភាគទី៣ ក្នុងខេត្តកំពង់ស្ពឺ ដែលបង្កឱ្យយោធិនចំនួន២០នាក់ បានពលីជីវិត និងយោធិនមួយចំនួនទៀតរងរបួស ព្រមទាំងខូចខាតសំណង់ក្នុងទីបញ្ជាការ រថយន្ត និង ផ្ទះសម្បែងរបស់ប្រជាពលរដ្ឋនៅក្បែរទីតាំងកើតហេតុមួយចំនួនផងដែរ៕
អត្ថបទ៖ ឈិន ធារ៉ាត់
