ឈុតឆាកថើបបបូរមាត់ដ៏សែនផ្អែមល្ហែម គឺជាឈុតឆាកដ៏ពិសេសនិងមិនអាចខ្វះបានមួយរបស់ខ្សែភាពយន្តភាគកូរ៉េ ព្រោះជាឈុតឆាកដែលឆក់បានបេះដូងអ្នកទស្សនា ដោយសារតែចូលតួជាមួយនឹងតួឯកប្រុសស្រី។ យ៉ាងណាមិញនៅមានឈុតឆាកថើបក្នុងរឿងកូរ៉េជាច្រើនទៀតដែលត្រូវហ្វេនស្អប់ព្រោះតែមូលហេតុច្រើនយ៉ាង។
សូមចុចអាន ហាមអ្នកខ្សោយបេះដូងមើល៖ ឈុតថើបពីរឿងភាគកូរ៉េចំនួន ៥ ដែលត្រូវបានជ្រើសរើសជាឈុតថើបរំជួលអារម្មណ៍!
១. Father Is Strange
នៅក្នុងខ្សែភាពយន្តភាគខ្នាតវែង «Father Is Strange» តួអង្គ Byun Mi Young (Jung So Min) ត្រូវអ្នកដឹកនាំបង្ខំឱ្យថើបលើមុខរបស់ដៃគូសម្ដែង Ahn Joong Hee (Lee Joon) ដើម្បីឱ្យបានស្នាមក្រែមប្រឡាក់លើថ្ពាល់ពិតៗ។ ក្រោយមកទៀត Jung So Min ត្រូវបន្តថើបបបូរមាត់របស់ Lee Joon ទៀត។ ឈុតឆាកដែលនឹកស្មានថាចេញមករ៉ូមែនទិចប៉ុន្តេបែរជាត្រូវអ្នកទស្សនារិះគន់ខ្លាំងព្រោះការថើបនេះគ្មានអ្វីខុសពីការរំលោភបំពានរាងកាយនៅកន្លែងធ្វើការនោះទេ។
២. Seonam Girls High School Investigators
ឈុតឆាកថើបគ្នារវាងសិស្សស្រីវិទ្យាល័យពីនាក់នៅក្នុងសាច់រឿង «Seonam Girls High School Investigators» គឺជាឈុតឆាកថើបគ្នារវាងក្រុមនារីស្រលាញ់ភេទដូចគ្នាដំបូងចាក់ផ្សាយនៅលើកញ្ចក់ទូរទស្សន៍កូរ៉េ។ ក្រៅពីមិនទទួលបានការគាំទ្រហើយនោះ ឈុតឆាកនេះថែមទាំងត្រូវអ្នកទស្សនាជះសម្ដីរិះគន់ ដោយក្នុងនោះសូម្បីតែគណៈប្រឹក្សាចាត់ថ្នាក់ស្ដង់ដារឱ្យស្ថានីយទូរទស្សន៍កូរ៉េ (KCSC) ក៏បានលើកឡើងដែរថាឈុតឆាកនេះបានបំពានច្បាប់ទូរទស្សន៍ប្រទេសកូរ៉េ មាត្រា២៧ ស្ដីពីការរក្សាភាពថ្លៃថ្នូរ និងមាត្រា៤៣ ស្ដីពីការសាបព្រោះអារម្មណ៍រវាងកុមារនិងមនុស្សពេញវ័យ។ ក្រុមអ្នកគាំទ្រ LGBT បានបដិសេធនិងមិនគាំទ្រចំពោះសេចក្ដីប្រកាសរបស់គណៈកម្មាការប្រឹក្សាចាត់ថ្នាក់ស្ដង់ដារស្ថានីយទូរទស្សន៍កូរ៉េ KCSC ដោយបានលើកឡើងថាសេចក្ដីសម្រេចខាងលើនេះគឺរំលោភលើសិទ្ធិមនុស្ស។
៣. Moonlight Drawn By Clouds
ឈុតឆាកក្នុងរឿងនេះក៏ត្រូវបាន KCSC ចាត់ទុកថាបំពានច្បាប់ទូរទស្សន៍ដូចគ្នា គឺត្រង់ឈុតឆាកថើបមាត់គ្នារវាងតួអង្គ Hong Ra On (Kim Yoo Jung) និង Lee Yeong (Park Bo Gum)។ មូលហេតុដែលត្រូវចាត់ទុកថាខុសនោះគឺត្រង់ Kim Yoo Jung ទើបតែមានអាយុ ១៧ឆ្នាំនៅខណៈដែលកញ្ញាសម្ដែងរឿងនោះ។ ចំពោះករណីនេះអ្នកទស្សនាបានយល់ស្របចំពោះការលើកឡើងរបស់ KCSC ហើយប្រឆាំងចំពោះការថើបបបូរមាត់គ្នាចំពោះតួអង្គដែលមិនគ្រប់អាយុ ខណៈអ្នកខ្លះទៀតលើកឡើងថាឈុតនេះមិនជាខុសឆ្គងពេកនោះទេ វាគ្រាន់តែធ្វើឱ្យមានអារម្មណ៍ដូចមើលគេហួច។
៤. Our Gab Soon
ភាពយន្តភាគខ្នាតវែង «Our Gab Soon» ក៏ទទួលរងការរិះគន់ចាស់ដៃដូចគ្នាដែរសម្រាប់ឈុតឆាកថើបបបូរមាត់គ្នារវាងតួឯកស្រី Shin Gab Soon (Kim So Eun) ខណៈដែលតួស្រីសុំបែកគ្នាពីតួប្រុស Heo Gab Dol (Song Jae Rim) ហើយត្រូវខាងប្រុសបង្ខំថើបបបូរមាត់។ ឈុតឆាកនេះត្រូវបានគេរិះគន់ខ្លាំងៗថាផ្សព្វផ្សាយការប្រើហិង្សាក្នុងទំនាក់ទំនងស្នេហា។ ប៉ុន្តែជារឿងមួយគួរឱ្យភ្ញាក់ទៅវិញនៅពេលដែល KCSC និងក្រុមការងារផលិតរឿងភាគបែរជានិយាយថា «មិនមានបញ្ហាអីនោះទេ»។
ចុះប្រិយមិត្តត្រយងវិញ តើធ្លាប់បានទស្សនារឿងភាគទាំង៤ខាងលើនេះដែរទេ? តើយល់ថាឈុតថើបទាំង៤ខាងលើនេះពិតជាគួរឱ្យរិះគន់មែនដែរទេ?