នៅព្រឹកថ្ងៃទី២៩ ខែតុលា ឆ្នាំ២០២១ ត្រូវនឹងថ្ងៃសុក្រនេះ ក្រសួងវប្បធម៌និងវិចត្រសិល្បៈបានផ្សាយល្ខោនយីកេរឿង «មាយើង» នៅលើបណ្ដាញសង្គម (Facebook) ហើយទទួលបានការគាំទ្រខ្លាំងពីសំណាក់អ្នកលេងហ្វេសប៊ុកយ៉ាងខ្លាំងគួរឱ្យកត់សម្គាល់។
ព្រឹកថ្ងៃឈប់សំរាកដែលជាទិវាឡើងគ្រងរាជ្យសម្បត្តិគំរប់រយៈពេល១៧ឆ្នាំនៃអង្គព្រះមហាក្សត្រព្រះបាទសម្ដេចព្រះបរមនាថ នរោត្តម សីហមុនី ក្រសួងវប្បធម៌វិចិត្រសិល្បៈបានធ្វើការ Live Stream ល្ខោនយីកេខ្មែររឿង «មាយើង» នៅលើផេកផ្លូវការរបស់ក្រសួង ហើយទទួលបាននូវការចូលរួមទស្សនាផ្ទាល់កំពុង Live យ៉ាងច្រើនជាង 1K ព្រមទាំងមានការចូលរួមសរសើរយ៉ាងខ្លាំងចំពោះការលើកយកទម្រង់សិល្បៈបុរាណរបស់ខ្មែរមួយនេះមកធ្វើការផ្សព្វផ្សាយ។
យោងតាមរយៈការចូលមកបង្ហាញពីចំណាប់អារម្មណ៍របស់ខ្លួននៅក្នុងពេលទស្សនាវីដេអូ Live រឿង «មាយើង» ខាងលើ អ្នកទស្សនាភាគច្រើនជាយុវវ័យបានបញ្ចេញយោបល់ថា «សម្តែងបានល្អជាងរឿង ខ្មែរ ថតបច្ចុប្បន្ន. 
» «ចូលរួមលើកស្ទួយសិល្បៈវប្បធម៌» «បើបានទៅមើលផ្ទាល់មិនដឹងជាល្អយ៉ាងណាទេ»។
នេះគ្រាន់តែជាការលើកយក Comment មួយចំនួនតូចចេញពីចំនួន Comment ដ៏ច្រើនលើសលប់ដែលមានសរុបត្រឹមម៉ោង១១ព្រឹកថ្ងៃទី២៩ ខែតុលា ឆ្នាំ២០២១នេះ មានរហូតដល់១.៦K Comment ចំនួន Like ៤.៣K និងចំនួន Views មាន៣៩K។
ល្ខោនយីកេ «មាយើង» គឺជាសាច់រឿងដែលបរិយាយពីចៅមាណពមួយរូបមានប្រពន្ធស្រស់ស្អាតឈ្មោះមាយា ជាស្ត្រីខ្ជិលច្រអូស មិនចេះកិច្ចការផ្ទះ ខ្ជះខ្ជាយ ចង់មានចង់បានតែមិនចូលចិត្តធ្វើការងារ។ ថ្ងៃមួយចៅមាណពបាននាំនាងមាយាជាប្រពន្ធទៅជញ្ជាត់ត្រីដូចសព្វមួយដង ទៅដល់នោះចៅមាណពបានព្យាយាមរកត្រីបានហើយក៏យកមកឱ្យនាងជាប្រពន្ធទុកក្នុងកញ្ជើ ប៉ុន្តែនាងមាយានោះមិនខ្វល់ទោះជាកញ្ជើធ្លាយក៏ដោយ ធ្វើឱ្យត្រីដែលចៅមាណពរកបានហូរចូលទឹកវិញអស់។ ជួនជាចៃដន្យមានសំពៅរបស់នាយសំពៅបានធ្វើដំណើរកាត់ទីនោះ ភរិយារបស់នាយសំពៅឈ្មោះនាងលក្ខិណាបានប្រាប់ហើយដោយនាយសំពៅលួចបេតីនាងមាយាផងនោះ ក៏ធ្វើជាខឹងសម្បារថាប្រពន្ធមានចិត្តឱ្យចៅមាណព ហើយសុំប្ដូរប្រពន្ធគ្នា។
រឿងរ៉ាវជីវិតរវាងនាយសំពៅនិងនាងមាយានឹងទៅជាយ៉ាងណានៅពេលចាប់ដៃគ្នាជាប្ដីប្រពន្ធ? ចំណែកចៅមាណពពេលបាននាងលក្ខិណាជាប្រពន្ធតើជីវិតរបស់គេកាន់តែដុនដាបជាងមុនឬល្អប្រសើរជាងមុន? អាចទស្សនាវីដេអូរឿង «មាយើង» នៅលើផេក ក្រសួងវប្បធម៌ និងវិចិត្រសិល្បៈខាងក្រោមនេះ៖
