តារាសម្ដែង Lori Loughlin បានចាយប្រាក់ ៥០ម៉ឺនដុល្លារ ជួយដល់និស្សិតពីរនាក់ក្រោយលោកស្រីត្រូវបានដោះលែងចេញពីពន្ធនាគារមិនដល់មួយឆ្នាំផង។
តារាសម្ដែងវ័យ៥៧ឆ្នាំបានចាយប្រាក់និស្សិតចំនួន២រូបដោយមិនបង្ហាញអត្តសញ្ញាណរយៈពេល៤ឆ្នាំ នេះបើយោងតាមការផ្សាយរបស់សារព័ត៌មាន US Weekly ។ អ្នកតំណាងរបស់តារាស្រីពីភាពយន្តភាគជាស៊េរី «Full House» បានអះអាងពីការជួយឧបត្ថម្ភនេះ ប៉ុន្តែបដិសេធមិនផ្ដល់នូវព័ត៌មានលម្អិត។ លោកស្រី Loughlin និងស្វាមីជាអ្នកច្នៃម៉ូដដ៏ល្បីល្បាញលោក Mossimo Giannulli ស្ថិតក្នុងចំពោះឪពុកម្ដាយជាអ្នកមានទ្រព្យត្រូវបានពិន័យប្រាក់ដោយសារតែប្រើប្រាស់លុយជួយឱ្យកូនៗរបស់ខ្លួនបានចូលក្នុងសកលវិទ្យាល័យល្បីៗតាមរយៈការតម្លើងពិន្ទុ និង ឯកសារអត្តពលិកក្លែងក្លាយ។
បុគ្គលល្បីទាំងពីររូបបានទទួលស្គាល់ថាពួកគេបានចំណាយប្រាក់ ៥០ម៉ឺនដុល្លារឱ្យទៅកាន់ Rick Singer និង Key Worldwide Foundation ដើម្បីជួយដល់កូនស្រី Olivia Jade និង Isabella Rose បានចូលសិក្សានៅក្នុងមហាវិទ្យាល័យល្បី Southern California ក្នុងនាមជានិស្សិតជាអត្តពលិក។
តារាសម្ដែង Lori ត្រូវបានកាត់ទោសឱ្យជាប់ពន្ធនាគារចំនួនពីរខែ ហើយត្រូវបានដោះលែងឱ្យមានសេរីភាពចំនួនកាលពីខែធ្នូឆ្នាំ២០២០ ហើយបង់ប្រាក់ផាកពិន័យចំនួន ១៥ម៉ឺនដុល្លារ និងត្រូវបម្រើការងារដើម្បីប្រយោជន៍សាធារណៈក្រោយចេញពីពន្ធនាគារចំនួន ១០០ម៉ោង ខណៈដែល ស្វាមីអ្នកស្រី ជាប់ពន្ធនាគារចំនួន៥ខែ ពិន័យជាទឹកប្រាក់ ២៥ម៉ឺនដុល្លារ ហើយបំពេញការងារដើម្បីជាប្រយោជន៍សាធារណៈចំនួន ២៥០ម៉ោង ដោយលោកត្រូវបានដោះលែងវិញកាលពីខែមេសាឆ្នាំ២០២១នេះ។
បន្ទាប់ពីលោក Louglin ត្រូវបានដោះលែង លោកស្រីបានត្រលប់ចូលមកក្នុងវិស័យសម្ដែងឡើងវិញ ហើយលោកស្រីក៏បានសម្ដែងជាតួអង្គ Abigail Stanton នៅក្នុងរដូវកាលទីពីរនៃរឿង «When Hope Calls» ដែលធ្លាប់ផ្សាយនៅលើទូរទស្សន៍ Hallmark ប្ដូរមកផ្សាយនៅទូរទស្សន៍ GAC Family វិញ។
រំលឹកឡើងវិញនៅពេលផ្ទុះរឿងអាស្រូវនេះចេញមកមខាងក្រៅក្រុមហ៊ុនមេរបស់ទូរទស្សន៍ Hallmark បានលុបចោលកុងត្រាថតនិងសម្ដែងទាំងអស់រវាងខ្លួននិង Loughlin។ រឿង «When Hope Calls» គឺជារឿងកម្លាយពីរឿង «When Calls the Heart» ដែលសម្ដែងដោយ Loughlin ជាតួអង្គ Abigail ប៉ុន្តែកាលណោះលោកស្រីត្រូវបាននិពន្ធឱ្យចេញពីសាច់រឿងត្រឹមរដូវកាលទី៦ ព្រោះលោកស្រីពាក់ព័ន្ធនឹងបញ្ហាអាស្រូវប្រើល្បិចឱ្យកូនស្រីបានចូលរៀនមហាវិទ្យាល័យល្បីឈ្មោះ។
ការចំណាយប្រាក់ដ៏ច្រើនដើម្បីជួយឱ្យនិស្សិតចំនួន២រូបឱ្យសិក្សាចប់ចុងចប់ដើមនេះ មិនត្រូវបានសាធារណជនគាំទ្រ និងសាទរនោះឡើយ ដោយសារតែ អ្នកទាំងនោះនៅតែមិនពេញចិត្ត ព្រោះតែយល់ឃើញថាលោកស្រីធ្វើនេះគ្រាន់តែដើម្បីលុបលាងកេរ្តិ៍ឈ្មោះមិនល្អរបស់ស្រីឱ្យបានល្អប្រសើរឡើងវិញប៉ុណ្ណោះ៕