ផ្ទុយពីអ្វីដែលលោក Wang Xiaofei ស្វាមីរបស់ Barbie Hsu ហៅ សាន់ឆាយ បានបដិសេធចំពោះដំណឹងលែងលះដោយអះអាងថាស្នេហាអ្នកទាំងពីរនៅតែផ្អែមល្ហែម ប៉ុន្តែក្រុមហ៊ុនដែលគ្រប់គ្រងលើតារាស្រីរូបនេះបែរជាចេញមកប្រកាសពីការចែកផ្លូវគ្នារបស់គូស្នេហ៍ដែលរៀបអាពាហ៍ពិពាហ៍រយៈពេល១០ឆ្នាំនេះទៅវិញ។
តារាសញ្ជាតិចិនតៃវ៉ាន់អ្នកនាង Barbie Hsu ហៅសាន់ឆាយ កាលពីថ្ងៃចន្ទទី២២ ខែវិច្ឆិកា បានប្រកាសជាផ្លូវការថាខ្លួននិងស្វាមីជាអ្នកជំនួញល្បីឈ្មោះ Wang Xiaofei រួចរាល់ជាស្ថាពរហើយ។
អ្នកទាំងពីរបានជួបត្រឹម៤ដងប៉ុណ្ណោះមុននឹងសម្រេចចិត្តរៀបអាពាហ៍អាពាហ៍កាលពីឆ្នាំ២០១១ នេះបើតាមការចុះផ្សាយដោយសារព័ត៌មាន CNA គូស្នេហ៍ទទួលបានកូនស្រីម្នាក់ និងកូនប្រុសម្នាក់ជាចំណងដៃអាពាហ៍ពិពាហ៍។
យោងតាមមិត្តភក្ដិរបស់សាន់ឆាយ បានឱ្យសារព័ត៌មាន Apple Daily ដឹងថាការដែលមិត្តរបស់ខ្លួនសម្រេចចិត្តលែងលះស្វាមីរបស់ខ្លួនដោយសារមូលហេតុចំនួន៣សំខាន់ៗ៖
១. អ្នកទាំងពីរមានគំនិតនិងការគិតខុសគ្នា ដោយសារតែការធំធាត់និងការចិញ្ចឹមបីបាច់ពីគ្រួសារផ្សេងគ្នា
២. សាន់ឆាយ រស់នៅក្នុងកោះតៃវ៉ាន់ ប៉ុន្តែអតីតស្វាមីរបស់អ្នកនាង Wang Xioafei តែងតែធ្វើដំណើរទៅកាន់ប្រទេសចិនដីគោក ដែលធ្វើឱ្យទំនាក់ទំនងរបស់អ្នកទាំងពីរកាន់តែឃ្លាតឆ្ងាយពីគ្នា
៣. ចុងក្រោយ លោក Wang តែងតែបង្ហោះការយល់ឃើញពាក់ព័ន្ធនឹងនយោបាយ ដោយអតីតស្វាមីសាន់ឆាយតែងតែរិះគន់ទៅលើកោះតៃវ៉ាន់ ដែលបណ្ដាលឱ្យមានការវាយប្រហារដោយពាក្យសម្ដីជាមួយនឹងក្រុមអ្នកគាំទ្រជាច្រើនលើកច្រើនសារ។
