អតីតតារាសម្ដែងល្បី អ្នកនាង សារ៉ាយ សក្កណា ដែលបានរៀបការហើយទៅរស់នៅសហរដ្ឋអាមេរិក បានធ្វើដំណើរត្រលប់មកដល់ស្រុកកំណើតមាតុប្រទេសវិញកាលពីពេលថ្មីៗនេះ ដោយការមកលើកនេះ គឺមានគោលដៅមក Surprised ម្ដាយ មិនមានគោលដៅអ្វីជាពិសេសនោះទេ នេះបើយោងតាមការឆ្លើយតបរបស់អ្នកនាងប្រាប់មកកាន់សារព័ត៌មានត្រយង។ ប៉ុន្តែបើទោះជាសាមីខ្លួនពោលថាមិនមានផែនការអ្វីពិសេសក្ដី តាមការសង្កេតឃើញថាអ្នកម្ដាយកូនពីររូបនេះហាក់កំពុងត្រូវប៉ាន់សំរុកថតបង្ហាញម៉ូដឈុតរៀបការបែបប្រពៃណីជាតិឱ្យសំអាងការក្នុងស្រុកជាច្រើន។
យោងតាមការឆ្លងឆ្លើយជាមួយនឹងអ្នកសារព័ត៌មានត្រយង អ្នកនាងសារ៉ាយ សក្កណា បានឱ្យដឹងថាគោលបំណងមកស្រុកខ្មែរលើកនេះ គឺមិនមានអ្វីជាពិសេសនោះទេ ព្រោះដំបូងឡើយអ្នកនាងគ្រាន់តែមានបំណងមក Surprised ម្ដាយ និងស្នាក់នៅប្រទេសកម្ពុជាចំនួន២ ទៅ៣ខែ ប៉ុណ្ណោះ តែពេលមកដល់ស្រុកខ្មែរ ទើបដឹងថាមានរៀបចំការប្អូននៅខែមករា ដូច្នេះអ្នកនាងនឹងចូលរួមក្នុងពិធីមង្គលការនោះតែម្ដង។
ថ្វីត្បិតតែអ្នកនាង សារ៉ាយ សក្កណា បញ្ជាក់ប្រាប់ខាងសារព័ត៌មានត្រយងថាអ្នកនាង មកលេងស្រុកកំណើតនិងមកសួរសុខទុក្ខអ្នកមានគុណក្ដី ប៉ុន្តែបើមើលតាមការចែករំលែករបស់អ្នកនាងនៅលើផេកផ្ទាល់ខ្លួនបានបង្ហាញឱ្យឃើញថាអ្នកនាងកំពុងតែមានហាងឆេង ត្រូវប៉ាន់មានសំអាងការក្នុងស្រុកជាច្រើនបានជ្រើសរើសអ្នកនាងឱ្យថតផ្សព្វផ្សាយម៉ូដសំលៀកបំពាក់បុរាណឱ្យសំអាងការរបស់ខ្លួន ដោយសារតែអ្នកនាងជានារីខ្មែរមានសំបុរស្រអែមស័ក្ដិសមនឹងឈុតប្រពៃណី ពេលស្លៀកលើខ្លួនមើលទៅលេចធ្លោនិងស្អាតទាក់ទាញបាននូវការចាប់អារម្មណ៍យ៉ាងច្រើនពីមហាជន៕
