កាលពីថ្ងៃទី២៩ ខែវិច្ឆិកា ម្សិលមិញ ប្រុសស្អាតថេណា តារាចម្រៀងម្ចាស់រហស្សនាម រាជបុត្រសំបូរមនោសញ្ចេតនា បានចេញមកថ្លែងអំណរគុណចំពោះអ្នកគាំទ្រនៅលើផេកផ្លូវការរបស់ខ្លួន បន្ទាប់ពីបទចម្រៀង «ខ្យល់ត្រជាក់» អាចរកបានចំនួនទស្សនាគ្រប់១០លានដង (10M Views) នៅក្នុងរយៈពេលត្រឹមតែ៩ខែប៉ុណ្ណោះ ក្រោយបទចម្រៀងនេះចេញកាលពីថ្ងៃទី៥ ខែកុម្ភៈ ឆ្នាំ២០២១ នេះ។
សូមចុចអាន ៩ បទថេណា មួយៗបទមាន Viewsលើស១០លានដងលើ YouTube!
បទចម្រៀង «ខ្យល់ត្រជាក់» ដែលជាបទចម្រៀងមនោសញ្ចេតនាស្នេហាដែលរៀបរាប់ពីការស្រលាញ់របស់បុរសម្នាក់ចំពោះសង្សាររបស់ខ្លួនដែលទោះជាពេលនេះអ្នកទាំងពីរលែងដូចកាលពីមុនប៉ុន្តែរូបគេនៅតែស្រលាញ់បារម្ភ និងនឹកនាជានិច្ច ជាពិសេសនៅពេលដែលខ្លួនត្រជាក់ធ្លាក់មកម្ដងៗធ្វើឱ្យរូបគេនឹកដល់អតីតសង្សារកាន់តែខ្លាំងទ្វេរដង។
កាលណោះនៅពេលដែលតារាចម្រៀងរូបនេះបានបង្ហោះបទនេះរួចលោកបានប្រើ Hashtag ថា #បទចុងក្រោយ ព្រមទាំងរៀបរាប់ពីការនឿយណាយរបស់ខ្លួនក្នុងវិស័យសិល្បៈចម្រៀងផងដែរ។ «ខ្ញុំចាប់ផ្ដើមវិថីសិល្បៈយូរហើយ ក្ដីបំណងដំបូងគឺចង់លើកស្ទួយសិល្បៈចម្រៀងសម័យអោយមានលក្ខណជារបស់ខ្លួន និងដើម្បីរស់ផងដែរ។ ខ្ញុំគិតថាខ្ញុំឆ្លងកាត់រឿងច្រើនណាស់ ជោគជ័យក៏បានច្រើនដែរ ហត់នឿយក៏ច្រើនដែរ។ គ្មានការចាប់ផ្ដើមណាដែលគ្មានទីបញ្ចប់នោះទេ។ ពេលខ្លះភាពស្ងប់ស្ងាត់ប្រហែលជាល្អសម្រាប់ខ្ញុំ។ សូមអរគុណ»
សំណេររៀបរាប់នោះបានធ្វើឱ្យអ្នកគាំទ្របង្ហាញការបារម្ភ ក៏ដូចជាលើកទឹកចិត្តឱ្យបុរសដែលមានដើមកំណើតនៅខេត្តកោះកុងរូបនេះ សំរាកលម្ហែខួរក្បាល ហើយឆាប់វិលត្រលប់មកវិញ។ យ៉ាងណាមិញតារាចម្រៀងរូបនេះមិនបានសំរាកពីការងារសិល្បៈយូរណាស់ណានោះទេ ព្រោះ ៧ខែក្រោយ បុរសសង្ហារូបនេះបានត្រលប់មកវិញដោយបញ្ចេញបទចម្រៀង «Ma Boo» ដែលជាបទចម្រៀងស្នេហាបែបយុវវ័យ មានលក្ខណៈបែបកូរ៉េទទួលបានការគាំទ្រយ៉ាងច្រើន ហើយបន្តមកទៀតលោកក៏បានបញ្ចេញ Video ចម្រៀងថ្មី «ផ្កាយ» និងបទ «នឹក Miss You» សុទ្ធសឹងជាបទទទួលបានការគាំទ្រច្រើនពីសំណាក់អ្នកគាំទ្ររបស់តារាចម្រៀងវ័យក្មេងនេះ ដោយបទចម្រៀងនីមួយៗមានចំនួន Views លើសពី១លានដងទាំងអស់។
ងាកមកសំណេរថ្លែងអំណរគុណរបស់លោកនៅលើបណ្ដាញសង្គមក្រោយបទចម្រៀង «ខ្យល់ត្រជាក់» មានចំនួន Views ច្រើនលើសលប់ ដោយទង្វើនេះគឺចង់បង្ហាញពីការអរគុណដឹងគុណ ចំពោះអ្នកគាំទ្រ (Fan) ដែលតែងតែជួយទស្សនា និងជួយ Stream ទើបធ្វើឱ្យបទរបស់លោកមានចំនួន Views ច្រើនរហូតរាប់លាន តួយ៉ាងដូចជាបទខ្យល់ត្រជាក់ដែលអាចរកចំនួន Views រហូតដល់១០លានដង។
ឆ្លើយតបចំពោះពាក្យអរគុណដែលតារាសំណព្វចិត្តអរគុណខ្លួន អ្នកគាំទ្រជាច្រើនបានចូលមកអបអរសាទរចំពោះលទ្ធផលដ៏គាប់ប្រសើរនៅលើឆាណែល Youtube របស់តារាចម្រៀងរូបនេះ ដោយមានអ្នកគាំទ្រមួយចំនួនថែមទាំងនិយាយទៀតថាខ្លួនបើកបទស្ដាប់រាល់ថ្ងៃរឿងអីមិនអាចឡើងដល់១០លានជាដើម៕
