ឯកឧត្តម ថោង ខុន ប្រធានគណៈកម្មការអន្តរក្រសួងដើម្បីត្រួតពិនិត្យបច្ចេកទេសកសាងពហុកីឡដ្ឋានជាតិមរតកតេជោ បានលើកឡើងក្នុងរបាយការណ៍ថាពហុកីឡដ្ឋាននេះមានកៅអីផ្ទុកអ្នកចូលទស្សនា៦ម៉ឺននាក់ ព្រមទាំងអាចជម្លៀសមនុស្សចេញត្រឹម៧នាទីប៉ុណ្ណោះ ករណីមានហេតុការណ៍ណាមួយកើតឡើង។
ការលើកឡើងនេះក្នុងកម្មវិធីសម្តែងទស្សនីយភាពសិល្បៈកម្មវិធីបើកសម្ពោធវិមានកីឡដ្ឋាននៃពហុកីឡដ្ឋានជាតិមរតកតេជោនិងពិធីរាប់ថយក្រោយ៥០០ថ្ងៃ ឆ្ពោះទៅកាន់ព្រឹត្តិការណ៍ប្រកួតកីឡា Sea Games Asean Para Games ឆ្នាំ២០២៣ នៅរាជធានីភ្នំពេញ ព្រឹកថ្ងៃសៅរ៍ ទី១៨ ខែធ្នូ ឆ្នាំ២០២១ នេះ។
ឯកឧត្តមបន្តថាកីឡដ្ឋាននេះកសាងជាជំនួយរបស់ដោយប្រើប្រាស់ប្រមាណ១.១ ប៊ីលានយ័ន ឬប្រមាណជាង ១៥០លានដុល្លារអាមេរិក ដោយបើកការដ្ឋានសាងសង់នៅថ្ងៃទី ៤ ខែមេសា ឆ្នាំ ២០១៧ លើផ្ទៃដី១៩,៤ ហិចតា និងមានសំណងកីឡដ្ឋានប្រមាណ៨៦ពាន់ម៉ែត្រការ៉េ ដោយប្រើប្រាស់កម្មករ ២៧០ ជាជនជាតិចិន និង៥៥០ នាក់ជាជនជាតិខ្មែរ ហើយការសាងសង់ប្រើរយៈពេលប្រមាណ ៤៨ខែ ពោលគឺបិទបញ្ចប់នៅថ្ងៃទី៣១ ខែឧសភា ឆ្នាំ២០២១។
នៅក្នុងពហុកីឡដ្ឋានជាតិមរតតេជោ ក៏មានហាងលក់ទំនិញ និងសណ្ឋាគារផ្កាយ៥ចំនួន ៣៤បន្ទប់សម្រាប់ចូលទស្សនាការប្រកួតកីឡានៅក្នុងពហុកីឡដ្ឋានជាតិមករតតេជោ ផងដែរ។
ហេតុផលដែលកីឡដ្ឋាននេះអាចជម្លៀសមនុស្សត្រឹម៧ នាទី ប្រសិនបើមានហេតុការណ៍អាក្រក់ណាមួយកើតឡើង គឺដោយសារមានច្រកទ្វារហូតដល់៥៤ច្រកឯណោះ ខណៈបន្ទប់ទឹកមានចំនួន ៩៣ តំបន់ សរុប៨៦៣ បង្គន់។
ជាមួយគ្នានេះដែរក៏មានការគ្រប់គ្រងត្រឹមត្រូវដើម្បីថែរក្សាកីឡដ្ឋាននេះឱ្យស្ថិតស្ថេរគង់វង្ស ដោយមានបង្កើតជាគណៈកម្មការរួមដែលបែងចែកជាការគ្រប់គ្រង រដ្ឋបាល សន្តិសុខសណ្ដាប់ធ្នាប់ អនាម័យ គ្រប់គ្រងកម្មវិធីកីឡា ទឹកភ្លើង និងអាហារូបត្ថម្ភកីឡា ជាដើមផងដែរ៕