កញ្ញា ពេជ្រ ចរណៃ គឺជាតារាសម្ដែងម្នាក់ត្រូវបានអ្នកទស្សនាទទួលស្គាល់ថាមានសមត្ថភាពនិងទេពកោសល្យខ្ពស់ក្នុងការសម្ដែង ជាពិសេសតួអង្គនាងកាឡីក្នុងរឿង «ដើមរលួសមាស» ដែលកំពុងតែបញ្ចាំងលើកញ្ចក់ទូរទស្សន៍។ តួអង្គកាចឆ្នាសរូបនេះបានបង្ហើបឱ្យដឹងថា ឈុតដែលពិបាកសម្ដែងបំផុតក្នុងរឿងនេះគឺឈុតស្រើបស្រាលនិងអារកសម្លាប់ត្រី។
ឆ្លើយឆ្លងជាមួយនឹងអ្នកសារព័ត៌មានត្រយងតាមរយៈសារអេឡិចត្រូនិចទាក់ទងទៅនឹងការសម្រេចចិត្តសម្ដែងជាតួអង្គនាងកាឡី កញ្ញាពេជ្រ ចរណៃ បានឱ្យដឹងថា «មូលហេតុដែលខ្ញុំសម្រេចចិត្តដើរជាតួអង្គកាឡីក្នុងរឿងដើមរលួសមាស ដោយសារតែខ្ញុំបង្ហាញពីសមត្ថភាពឱ្យពុកម៉ែបងប្អូនក៏ដូចជាផលិតករផ្សេងៗគាត់បានដឹងថានាងខ្ញុំមានសមត្ថភាពអាចសម្ដែងបានគ្រប់ទម្រង់បាន មិនថាតែកាចឆ្នាសឆ្នើមក្នុងតួអង្គសម័យនោះទេ សូម្បីតែតួអង្គកាចឆ្នាសបែបតួអង្គកាឡីក្នុងរឿងដើមរលួសមាសក៏នាងខ្ញុំអាចលេង(សម្ដែង)បាន»។
តួអង្គកាចឆ្នាសក្នុងរឿងភាគបុរាណខាងលើបានផ្ដល់ជាបទពិសោធយ៉ាងច្រើនសម្រាប់កញ្ញា ព្រោះការសម្ដែងតួអង្គកាចមួយនេះខុសពីតួអង្គដែលកញ្ញាធ្លាប់បានសម្ដែងមុនៗ។ រឿងនេះកញ្ញាសម្ដែងកាចស្ទើរតែគ្រប់ទម្រង់ មានទាំងកាចឆ្នាស មាយា ពិសពុល រំអួយ សម្រក់ទឹកភ្នែក កំពុងតែសើចហើយប្រែជាយំក៏មាន។
ចរណៃក៏បានបង្ហើបឱ្យដឹងដែរថាឈុតដែលពិបាកក្នុងចំណោមឈុតពិបាកជាច្រើននោះគឺឈុតវ៉ៃកុមារី ឈុតសម្លាប់អារកត្រី និង ឈុតស្រើបស្រាល។