កូរ៉េខាងត្បូង- Hyun Bin និង Son Ye Jin តួឯកប្រុសស្រីពីភាពយន្តភាគជាស៊េរី «Crash Landing on you» ប្រកាសត្រៀមរៀបអាពាហ៍៍ពិពាហ៍នៅខែមីនាខាងមុខនេះ។
កាលពីថ្ងៃទី១០ ខែកុម្ភៈ ឆ្នាំ២០២២ ផលិតកម្មដែលគ្រប់គ្រងលើកំពូលតារាសម្ដែង Hyun Bin បានចេញមកផុសសំបុត្រសរសេរដោយដៃមួយមានខ្លឹមសារថា «អ្នកទាំងអស់គ្នាប្រាកដជាទាយដឹងហើយមែនទេ? មែនហើយ ខ្ញុំកំពុងតែត្រៀមបើកទំព័រជីវិតថ្មី។ ខ្ញុំសន្យានឹងនាងថាខ្ញុំនឹងធ្វើឱ្យនាងមានតែស្នាមញញឹមហើយដើរទៅមុខជាមួយគ្នា»។
យោងតាមសារព័ត៌មាន Newsis បានផ្សាយថាក្រុមហ៊ុនដែលគ្រប់គ្រងលើកំពូលតារាទាំងពីរបានឱ្យដឹងថាសំណព្វចិត្តរបស់ហ្វេនទាំងពីរដួងនឹងរៀបការនៅខែមីនា ដោយអាពាហ៍ពិពាហ៍នឹងត្រូវរៀបចំឡើងជាលក្ខណៈឯកជនក្នុងទីក្រុងសេអ៊ូលដោយអញ្ជើញតែមិត្តភក្ដិនិងសាច់ញាតិតែប៉ុណ្ណោះ។
ងាកមកតារាសម្ដែងកំពូលសម្រស់ Son Ye Jin ក៏បានប្រកាសលើផេកផ្ទាល់ខ្លួនដែរថា «គាត់គឺជាបុរសម្នាក់ដ៏កក់ក្ដៅ។ ខ្ញុំមានអារម្មណ៍ល្អពេលខ្ញុំនៅក្បែរគាត់។ខ្ញុំស្និតស្នាលគ្នាដោយធម្មជាតិ។អរគុណដែលធ្វើឱ្យទំនាក់ទំនងពួកយើងក្លាយជាបុព្វេសន្និវាស។ អ្នកទាំងអស់គ្នា សូមជូនពរដល់អនាគតដែលពួកយើងត្រៀមសាងរួមគ្នា»
ចំណែកស្ថានីយទូរទស្សន៍ SBS ឯណោះវិញបានហៅអាពាហ៍ពិពាហ៍របស់ Top Star ទាំងពីរថាជាអាពាហ៍ពិពាហ៍ប្រចាំសតវត្ស ព្រោះបុគ្គលទាំងពីរគឺជាមនុស្សមានសមត្ថភាព កិត្តិយស។ មនុស្សរាប់សិបពាន់ដែលជាអ្នកស្រលាញ់ពេញចិត្តតារាទាំងពីរបានចែករំលែកដំណឹងដ៏រីករាយនេះហើយថែមទាំងជូនពរដល់តារាទាំងពីរឱ្យមានសុខសុភមង្គល និងឆាប់មានបុត្រ។
ក្នុងចំណោមមនុស្សជាច្រើនដែលជូនពរដល់តារាទាំងពីរក៏មានមិត្តភក្ដិដែលជាមិត្តសិល្បករដូចជា Song Yoon Ah, Lee Min Jung, និងអ្នកថតរូបល្បី Lim Hyo Seon ក៏ចូលរួមសាទរចំពោះតារាទាំងពីរដួងនេះផងដែរ។
នៅក្នុងថ្ងៃទី១០ ខែកុម្ភៈ ដដែល កម្មវិធី TVN «You Quiz on the block» Son Ye Jin បាននិយាយថា ក្នុងរយៈពេល២០ឆ្នាំដែលខ្លួនប្រឡូកចូលក្នុងវិស័យសិល្បៈ Hyun Bin គឺជាមនុស្សដំបូងដែលខ្លួនលង់ស្រលាញ់ជាចំហ៕