ក្រសួងវប្បធម៌និងវិចិត្រសិល្បៈបានចេញសេចក្ដីអំពាវនាវមួយពាក់ព័ន្ធទៅនឹងទិវានៃក្ដីស្រលាញ់ ណែនាំដល់យុវជនកម្ពុជា ចាំបាច់ត្រូវសិក្សាស្វែងយល់ឱ្យបានស៊ីជម្រៅពីវប្បធម៌ ប្រពៃណីដែលជាមរតកដ៏ថ្លៃថ្លារបស់ដូនតាខ្មែរ។
នៅក្នុងសេចក្ដីអំពាវនាវដែលបានចេញកាលពីថ្ងៃទី១១ ខែកុម្ភៈ ឆ្នាំ២០២២២ កន្លងទៅនេះ ក្រសួងវប្បធម៌និងវិចិត្រសិល្បៈបានបង្ហាញក្ដីព្រួយបារម្ភដោយសារតែបច្ចុប្បន្ននេះ «ទិវានៃក្ដីស្រលាញ់» កំពុងតែជ្រៀតចូលក្នុងសង្គមជាតិកម្ពុជា ជាពិសេសក្នុងស្រទាប់យុវជន បណ្ដាលឱ្យមនុស្សមួយចំនួនបានទទួលយកនិងប្រើប្រាស់ដោយភាពភ័ន្តច្រឡំ នាំឱ្យមានផលប៉ះពាល់ដល់វប្បធម៌ ទំនៀមទម្លាប់ ប្រពៃណីជាតិយើង។
នៅក្នុងលិខិតនេះបានបញ្ជាក់ដែរថា យុវជនកម្ពុជាចាំបាច់ត្រូវតែសិក្សាស្វែងយល់ឱ្យបានស៊ីជម្រៅពីវប្បធម៌ ប្រពៃណី ដែលជាមរតកដ៏ថ្លៃថ្លារបស់ដូនតាខ្មែរយើង ព្រមទាំងឈ្វេងយល់ឱ្យបានគ្រប់ជ្រុងជ្រោយអំពីខ្លឹមសារនៃថ្ងៃ១៤ កុម្ភៈ ដែលជាទំនៀមទំលាប់នាំចូលពីក្រៅ ដើម្បីបន្ស៊ីនិងសម្របទៅតាមបិរបទនៃសង្គម ក្នុងគោលដៅរក្សាការពារឱ្យបាននូវតម្លៃ និងឧត្តមភាពនៃវប្បធម៌ជាតិដែលមានចំណាស់រាប់ពាន់ឆ្នាំមកហើយនៅទ្វីបអាស៊ី។
យោងតាមសេចក្ដីអំពាវនាវនេះក្រសួងវប្បធម៌និងវិចិត្រសិល្បៈបានគូសបញ្ជាក់ទៀតថា «ទិវានៃក្ដីស្រលាញ់នៅកម្ពុជា» គួរជាឱកាសចែកចាយនិងធានានូវក្ដីស្រលាញ់ប្រកបដោយភាពថ្លៃថ្នូរ ស្មោះសរបរិសុទ្ធ ចំពោះមនុស្សជាទីគោរពស្រលាញ់មាន គ្រួសារ, ឪពកុម្ដាយ, ប្ដី/ប្រពន្ធ, កូន, ចៅ និងចំពោះញាតិមិត្ត។
ក្រៅពីផ្ដល់ក្ដីស្រលាញ់ចំពោះមនុស្សជុំវិញខ្លួនហើយនោះ ក្រុមមនុស្សដែលគួរបានទទួលក្ដីស្រលាញ់ដែរនោះមានដូចជា៖ ជនពិការ, កុមារកំព្រា, និងអ្នកដែលខ្សត់ខ្សោយជាងខ្លួន។
ជាចុងក្រោយក្រសួងបានអំពាវនាវចំពោះមាតា បិតា អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់ ជាពិសេសយុវជនខ្លួនឯងផ្ទាល់ ឱ្យចូលរួមផ្សព្វផ្សាយ អប់រំ ពន្យល់ណែនាំ ក្រើនរំលឹកដល់បងប្អូន កូនចៅ ប្រើប្រាស់ទិវានេះស្របតាមគន្លងប្រពៃណីដ៏ល្អត្រកាលរបស់ខ្មែរ ក្នុងគោលបំណងរក្សាកិត្តិយសនិងភាពថ្លៃថ្នូររបស់ខ្លួន របស់ក្រុមគ្រួសារ ពិសេសរួមចំណែកលើកកម្ពស់កិត្យានុភាពនៃសង្គមជាតិ៕
