តាមគេកត់សម្គាល់ ជារៀងរាល់ឆ្នាំ លោក ទ្រី សក្កដា និងលោក សែម ឡង់ឌី ហៅ PeyPey Dy រមែងបញ្ចេញបទចម្រៀងច្រៀងរួមគ្នាជាពិសេសសម្រាប់ហ្វេនអ្នកស្ដាប់របស់ខ្លួនចំថ្ងៃនៃទិវាក្ដីស្រលាញ់ជានិច្ច។
រហូតមកទល់ពេលនេះអ្នកទាំងពីរបានបញ្ចេញបទចម្រៀងទាំងថ្មីទាំងចាស់បាន ៧បទរួចមកហើយដូចជាបទ «Cute កិប» «ទិញផ្កាជូនខ្លួនឯង» «អត់គូអត់លិឍ» «ស្រលាញ់ខ្លួនឯង» «Best Friends» «ស៊ូអត់ Solo Valentine» និងបទចុងក្រោយនេះមានចំណងជើងថា «ពេលណាមានសង្សារ» ដែលសុទ្ធសឹងជាបទចម្រៀងចាក់ដោតអារម្មណ៍របស់ហ្វេនៗ និងបង្កប់ពីអត្ថន័យស៊ីជម្រៅផងដែរ។
ជាការពិតណាស់ ការបង្កើតចំណីអារម្មណ៍ប្លែកៗជាមួយលោក សែម ឡង់ឌី អ្នកនិពន្ធបទចម្រៀង ទ្រី សក្កដា បានសម្រិតសម្រាំងអត្ថន័យបទចម្រៀងយ៉ាងខ្លាំង ដើម្បីឱ្យស៊ីជាមួយទេសកាលទិវាក្ដីស្រលាញ់ជាច្រើនឆ្នាំកន្លងមកនេះ។ ការបញ្ចេញចម្រៀងរួមគ្នានេះ ត្រូវបានហ្វេនៗអ្នកគាំទ្រកត់សម្គាល់ពីអ្នកទាំងពីររហូតក្លាយជាអត្តសញ្ញាណទៅហើយ។ មុនថ្ងៃនៃទិវាក្ដីស្រលាញ់ប៉ុន្មានថ្ងៃ អ្នកទាំងពីរតែងតែប្រកាសប្រាប់ពីការចេញបទចម្រៀងថ្មីៗជាស្នាដៃរួមគ្នា។
យ៉ាងណាមិញ នៅក្នុងឆ្នាំនេះ ខុសពីឆ្នាំរាល់ដង លោក ទ្រី សក្កដា បានប្រកាសឱ្យហ្វេនអ្នកគាំទ្រសម្ដែងអារម្មណ៍នៃក្ដីស្រឡាញ់ជូនចំពោះមន្ទីរពេទ្យកុមារអង្គរ ដោយលោកបានបង្ហោះសាររៀបរាប់ថា ៖ « បងប្អូនបន្តិចទៀត ទស្សនាMV ហើយ សូមចែករំលែកក្តីស្រលាញ់របស់អ្នកទៅកាន់មន្ទីរពេទ្យកុមារអង្គរដោយផ្ទាល់ មិនថា 1$-2$-10$-50$-100$-1000$ មានតម្លៃបំផុតសម្រាប់កុមារដែលកំពុងត្រូវការជំនួយពីយើងនៅពេលនេះ !
ដើម្បី Project មួយនេះ ចង់ប្រាប់ថាខ្ញុំអត់បានដេកបីថ្ងៃហើយ សង្ឃឹមថាបងប្អូននឹងមើលឃើញតម្លៃនៃការលះបង់មួយនេះ💕 ABA: Angkor Hospital For Children 000 320 555»៕
ទស្សនាវីដេអូចម្រៀងខាងក្រោមនេះ ៖