ថ្មីៗនេះមានដំណឹងរសើបមួយកំពុងផ្ទុះបានការចាប់អារម្មណ៍នោះគឺរឿងរ៉ាវស្នេហារវាងកំពូលមហាសេដ្ឋី Elon Musk និងតារាសម្ដែងសិចស៊ីក្មេងវ័យ Bassett ដោយមានអ្នកមើលឃើញបុគ្គលល្បីទាំងពីររូបនេះបានណាត់ជួបគ្នាលើយន្តហោះផ្ទាល់ខ្លួនកាលពីចុងសប្ដាហ៍កន្លងទៅផងដែរ។
តាមប្រភពសុំមិនចេញឈ្មោះបានប្រាប់កាសែត Hollywood life ថាទំនាក់ទំនងរវាងអ្នកទាំងពីរនេះមានរយៈពេល៧ខែហើយ ប៉ុន្តែមិនចង់ឱ្យរឿងស្នេហារបស់ខ្លួនសាយភាយជាសាធារណៈ។ តារារូបនេះគឺជានារីទីមួយដែលមានទំនាក់ទំនងជាមួយកំពូលមហាសេដ្ឋីអាមេរិកបន្ទាប់ពីលោកបែកបាក់។
ចំពោះប្រវត្តិនារីដែលអាចក្ដោបបានបេះដូងរបស់កំពូលមហាសេដ្ឋីលំដាប់ពិភពលោកនេះមានឈ្មោះពេញ Natasha Bassett មានវ័យ២៩ឆ្នាំ កើតនិងធំធាត់នៅប្រទេសអូស្ត្រាលី ប៉ុន្តែបានផ្លាស់មករស់នៅទីក្រុងញូវយ៉ក កាលពីអាយុ១៩ឆ្នាំ ដោយសារបានទទួលអាហារូបករណ៍ផ្នែកសម្ដែង។
មិត្តស្រីថ្មីរបស់លោក Elon Musk រូបនេះចាប់អាជីពសម្ដែងតាំងពីអាយុ១៤ឆ្នាំ ដោយផ្ដើមសម្ដែងនៅក្នុងមហោស្រពឯស្រុកកំណើត ហើយក្រោយមកត្រូវបានជ្រើសរើសឱ្យចូលក្នុងក្រុមហ៊ុនមហោស្រព Sydney។
កាលពីឆ្នាំ២០០៩ Bassett បានសម្ដែងរឿងភាគដំបូងក្នុងរឿង «Dungoona and Rake»។ ស្រីស្អាតរូបនេះបានចាកចេញពីអូស្ត្រាលីក្រោយបញ្ចប់ការសិក្សាថ្នាក់វិទ្យាល័យដើម្បីចាប់ក្ដីសុបិនធ្វើជាតារាសម្ដែងរបស់ខ្លួន។យោងតាម IC នារីដ៏ស្រស់ម្នាក់នេះមានកម្ពស់១ម៉ែត្រ៧១សង់ទីម៉ែត្រ និងមានទម្ងន់ប្រមាណ៦០គីឡូ។
សម្រាប់កេរ្តិ៍ឈ្មោះរបស់នារីអូស្ត្រាលីនេះបានផ្ទុះការចាប់អារម្មណ៍និងត្រូវកាសែតទស្សនាវដ្ដីយកទៅចុះផ្សាយដោយសារតែនាងសម្ដែងជាតួអង្គ Britney Spears ក្នុងភាពយន្ត «Britney Ever After» ដែលជារឿងត្រូវបានមហាជនក៏ដូចជាអ្នកគាំទ្រ Britney រិះគន់យ៉ាងខ្លាំង ប៉ុន្តែក៏មានអ្នកសរសើរនាងដូចគ្នាដែរ។
ស្នាដៃផ្សេងរបស់ Bassett រួមមាន « Katie Says Goodbye (2016)» និង «Hail, Caesar!» ដោយឡែកភាពយន្តថ្មីដែលត្រៀមបញ្ចាំងរបស់កញ្ញាគឺ «Elvis» ដែលជារឿងនិយាយពីខ្សែជីវិតស្ដេចចម្រៀង Rock&Roll លោក Elvis Presley នឹងបញ្ចាំងលើរោងភាពយន្តនៅអំឡុងខែមិថុនាខាងមុខនេះ បន្ថែមលើនោះកញ្ញាក៏នឹងមានវត្តមានសម្ដែងរឿងឱ្យអ្នកដឹកនាំបារាំង Smantha Rebillet រឿង «Love Lust Longing» ផងដែរ៕
ប្រភព៖ VNEXPRESS