ករណីយករូបទង់ជាតិទាំងមូលមកធ្វើការច្នៃម៉ូដជាសំលៀកបំពាក់នៅលើខ្លួននោះ ក៏កំពុងត្រូវបានមហាជនអ្នកលេងបណ្ដាញសង្គមហ្វេសប៊ុក និង TikTok មានការវែកញែកមិនឈប់។ គេឃើញមានអ្នកខ្លះមានមតិគាំទ្រ ហើយមានអ្នកខ្លះទៀតលើកហេតុផលមិនគាំទ្រ ដែលមតិទាំងអស់សុទ្ធសឹងចេញពីមជ្ឈដ្ឋានមហាជនអ្នកស្រឡាញ់ការច្នៃម៉ូដ និងអ្នកស្រឡាញ់វប្បធម៌ជាតិ។ ថ្ងៃនេះសារព័ត៌មានត្រយង ក៏បានទាក់ទងទៅកាន់បណ្ឌិតច្នៃម៉ូដសហសម័យ ឯម រាម ដើម្បីសុំការស្រាយបំភ្លឺបន្ថែម ជុំវិញករណីមួយនេះ ថាតើគួរ ឬមិនគួរ ចំពោះការយកទង់ជាតិច្នៃធ្វើសំលៀកបំពាក់បែបនេះ?
បើតាមការយល់ឃើញរបស់លោក ឯម រាម បានប្រាប់អ្នកសារព័ត៌មានត្រយងកាលពីព្រឹកមិញ(ថ្ងៃទី៩ ខែមីនា ឆ្នាំ២០២២)នេះថា ការបញ្ជាក់ពីអត្តសញ្ញាណរបស់ជាខ្មែរគឺមានច្រើនយ៉ាង មិនមែនមានតែការយករូប ប្រាសាទ ឬទង់ជាតិ មកច្នៃជាសំលៀកបំពាក់ ទើបយើងអាចបញ្ជាក់ប្រាប់គេថា យើងជាកូនខ្មែរ ឬជាស្នាដៃរបស់ខ្មែរនោះទេ។ លោកថា «ខ្មែរយើងមានអត្តសញ្ញាណច្រើន ដូចជា ម្ហូប រុក្ខជាតិ សត្វ ពណ៌ និងតំបន់ធម្មជាតិច្រើនទៀត ជាដើម។ល។ ចំពោះការច្នៃម៉ូដដែលយកទង់ជាតិមកធ្វើជាសម្លៀកបំពាក់ទាំងមូលបែបនេះ ចំពោះខ្ញុំគឺមិនគាំទ្រទេ ព្រោះខ្មែរយើងមានព្រលឹងដូនតា ហើយទង់ជាតិទៀតសោត គឺយើងឱនគោរព ដែលសបញ្ជាក់ថា យើងគោរពព្រលឹងដូនតាបុព្វបុរសខ្មែរ។ គេអាចច្នៃម៉ូដដោយប្រើតែពណ៌របស់ទង់ជាតិបាន ដូចជា ខៀវ និងក្រហម តែកុំប្រើរូបប្រាសាទអង្គរវត្ត»។
យ៉ាងណាមិញ លោក ឯម រាម បានប្រាប់ទៀតថា «ចុះហេតុអ្វីបានជាបរទេសគេធ្វើបាន ដោយមិនមានការរិះគន់? តែជាគំនិតខ្ញុំគិតថា បរទេសគេមានវប្បធម៌គេផ្សេង គេមិនបានអុជធូបគោរពឧទ្ទិសដល់ដូនតានោះទេ ហើយក៏គ្មានរូបប្រាសាទដែលតាំងតំណាងឱ្យបុព្វបុរស ឬព្រលឹងដូនតាអ្វីនោះដែរ ពោលគឺបរទេសមិនមានជំនឿនិងការគិតដូចយើង។ ជាមតិខ្ញុំ គេគួរតែចៀសវាងកុំយករូបទង់ជាតិមកច្នៃម៉ូដអី យើងគប្បីគិតទៅលើ Concept ឱ្យចំថាយើងចង់បានអី? សំលៀកបំពាក់បែបបុរាណ សម័យ ឬក៏ចង់បង្ហាញអ្វីឱ្យគេស្គាល់ប្រាកដ។ យើងអាចប្រើរូបទង់ជាតិតូចមួយជាផ្នែកដាក់លើឈុត ដូចអ្វីដែលធ្លាប់ឃើញលើអាវកីឡាករ។ តែបើចំពោះខាងវិស័យបវរកញ្ញា ខ្ញុំគិតថាមិនបាច់ដាក់ក៏បាន ព្រោះគេបានប្រកាសមុនហើយថា Cambodia អ៊ីចឹងទៅ។ នោះគឺគេបានបញ្ជាក់ឱ្យយើងហើយជាស្រេច»។
ជារួម មិនថាយើងស្រឡាញ់ជាតិហើយទាល់តែមានទង់ជាតិ ដាក់នៅលើក្បាលឬក៏យកមកស្លៀកទើបហៅថាស្រឡាញ់ជាតិនោះទេ ក៏ប៉ុន្តែវាមានចំនុចច្រើនណាស់ដែលយើងអាចបញ្ជាក់ថា យើងពិតជាស្នេហាជាតិ។ ជាក់ស្ដែងដូចជា ការគ្រវីទង់ជាតិ ដែលយើងអាចយកគំនិតនេះមកធ្វើជាសកម្មភាពនៅក្នុង MV ក៏បាន ចៀសវាងការយកមកស្លៀក ព្រោះមើលទៅដូចជាមិនស័ក្ដិសម។ នេះបើតាមការបញ្ជាក់បន្ថែមរបស់លោក ឯម រាម ។
ចុងក្រោយលោកចង់ឱ្យអ្នកច្នៃម៉ូដមួយចំនួន មានការសិក្សាស្វែងយល់បន្ថែម ក្នុងការស្វែងរកគំនិតថ្មីៗយកមកប្រើ ដើម្បីគេចផុតពីការរិះគន់។ ក៏ប៉ុន្ដែលោកថា កន្លងមកលោកក៏ធ្លាប់រងនូវពាក្យរិះគន់ច្រើនដែរ តែលោកទទួលយកទាំងអស់ ហើយចាត់ទុកថា ជាការរិះគន់ដើម្បីស្ថាបនាស្នាដៃបន្ថែមទៀត៕
