«Justin Bieber តារាចម្រៀងវ័យ ២៨ឆ្នាំ បានផ្ញើសារសុំឱ្យអ្នកគ្រប់គ្នាជួយបួងសួងភរិយារបស់ខ្លួន នៅពេលដែលបញ្ជូន Hailey ទៅកាន់មន្ទីរពេទ្យដើម្បីសង្គ្រោះបន្ទាន់» នេះបើយោងតាមប្រភពជិតស្និទ្ធប្រាប់សារព័ត៌មាន PEOPLE។
កាលពីសប្ដាហ៍មុន Hailey Bieber វ័យ២៥ឆ្នាំ បានឈឺធ្ងន់ដោយសារតែជំងឺកកសរសៃឈាមក្នុងខួរក្បាល នៅពេលបញ្ជូនខ្លួនទៅដល់មន្ទីរពេទ្យភ្លាមគឺមានអាការៈដូចជា ជំងឺគ្រោះថ្នាក់សរសៃឈាមខួរក្បាល។
ខណៈនេះភរិយាសម្លាញ់របស់ Justin បានចេញពីមន្ទីរពេទ្យមកសំរាកព្យាបាលខ្លួនបន្តនៅផ្ទះ ប៉ុន្តែអ្វីដែលធ្វើឱ្យអ្នកជិតស្និទ្ធភ្ញាក់ផ្អើលនោះគឺ Justin ហាក់ដូចជាមានភាពភ័យខ្លាចជាងសាមីខ្លួននាង Hailey ដែលជាអ្នកជំងឺទៅទៀត។ នេះបើយោងតាមប្រភពជិតស្និទ្ធប្រាប់សារព័ត៌មាន PEOPLE។
«នៅពេលមានរឿងនោះកើតឡើង គេពិតជាមានអារម្មណ៍ភ័យខ្លាចណាស់។ Justin បានផ្ញើសារទៅមនុស្សគ្រប់គ្នាដែលលោកស្គាល់ ហើយសុំឱ្យអ្នកគ្រប់គ្នាជួយបួងសួងឱ្យប្រពន្ធរបស់លោក ហើយលោកមិនដែលចាកចោលនាងឡើយ។»
ប្រភពដដែលបានបន្តទៀតថា៖ «Justin បាននិយាយថាគេមិនអាចបាត់បង់នាងទេ មិនថាគេត្រូវចំណាយអស់អ្វីក៏ដោយ គេចង់បានការព្យាបាលមួយដែលល្អជាទីបំផុត»។ «គាត់និយាយថាគាត់នឹងធ្វើគ្រប់យ៉ាងដើម្បីជួយនាង។ វាគឺជាពេលវេលាមួយសម្រាប់ពួកគេទាំងពីរបានយល់ពីតម្លៃនៃការអប់រំ ហើយផ្ដោតទៅលើថាអ្វីគឺជាបញ្ហាដ៏ពិតប្រាកដ»។
«ក្នុងដំណាក់កាលដ៏គ្រោះថ្នាក់នោះ Justin បានដឹងច្បាស់ពីរឿងសំខាន់មួយ ហើយគេបានប្រាប់អ្នកគ្រប់គ្នាជុំវិញខ្លួនគេថា Hiley គឺជាបង្អែកសម្រាប់គេ ហើយនាងបានជួយគេឱ្យចញផុតពីពេលវេលាដ៏ខ្មៅងងឹត ហើយគេចង់សរសើរនាងជារៀងរាល់ថ្ងៃ។ គេចង់មើលនាងហើយជួយនាងទៅតាមអ្វីដែលគេអាចធ្វើបាន។ ហើយគេមានមនុស្សជុំវិញខ្លួនចាំបួងសួងឱ្យនាងមានសុខភាពល្អ។ គេពិតជាភ័យខ្លាចណាស់» នេះបើយោងតាមការបញ្ជាក់ពីប្រភពជិតស្និទ្ធរបស់ Justin Bieber។
កាលពីថ្ងៃសៅរ៍កន្លងទៅ Hailey បានចែករំលែករឿងដែលខ្លួនជួបប្រទះនៅបណ្ដាញសង្គមថា៖ «ពួកគេបានរកឃើញថាខ្ញុំមានឈាមកកនៅក្នុងខួរក្បាល ដែលបណ្ដាលឱ្យបាត់បង់អុកស៊ីសែន ប៉ុន្តែខ្ញុំបានឆ្លងផុតហើយប៉ុន្មានម៉ោងក្រោយមកខ្ញុំបានស្រួលខ្លួនឡើងវិញ»
ភរិយាតារាចម្រៀងល្បីលំដាប់ពិភពលោករូបនេះបានលើកឡើងទៀតថា៖ «ទោះជាពេលនោះគឺជាពេលដែលខ្ញុំខ្លាចជាទីបំផុត ដែលខ្ញុំបានឆ្លងកាត់ ប៉ុន្តែពេលនេះខ្ញុំបានមកដល់ផ្ទះហើយ ហើយខ្ញុំក៏សុខសប្បាយដែរ ខ្ញុំសូមដឹងគុណនិងសូមអរគុណចំពោះក្រុមគ្រូពេទ្យនិងគិលានុប្បដ្ឋាយិកាទាំងអស់ដែលបានជួយព្យាបាលឱ្យខ្ញុំ»
សម្រាប់កំពូលតារាល្បីទាំងពីរដួងនេះ បានរៀបអាពាហ៍ពិពាហ៍រយៈពេល៣ឆ្នាំហើយ ពោលគឺនៅឆ្នាំ២០១៨៕
ប្រភព៖ PEOPLE