តារាចម្រៀងតូចច្រឡឹងតែសំឡេងក្រអួនក្រអៅ ចំរើន សុភ័ក្ត្រ កាលពីថ្ងៃទី១៧ ខែមីនា ម្សិលមិញនេះ បានបង្ហោះស្វាគមន៍សមាជិកថ្មីរថយន្តខ្លាញ់គោ Forthing ស៊េរី២០២២ ហើយទទួលបានការអបអរសាទរយ៉ាងច្រើនសន្ធឹកសន្ធាប់ពីអ្នកគាំទ្រនិងមិត្តសិល្បករ-សិល្បការិនី។
យោងតាមការបង្ហោះដោយផេករបស់អតីតបេក្ខជនប្រកួតកម្មវិធី The Voice Cambodia រដូវកាលទីមួយឆ្នាំ ២០០៤ រូបនេះបានឱ្យដឹងថាខ្លួនបាននាំចូលសមាជិកថ្មីចូលផ្ទះ ដែលម្ចាស់ខ្លួនបានហៅរថយន្តថ្មីរបស់ខ្លួននេះថាប្អូនស្រីពៅ។
«ថ្ងៃនេះថ្ងៃជាវេលាល្អ ព្រះឥន្ទសាទរទេវតាបាចផ្កា នាំប្អូនស្រីពៅតុបតែងកាយយា រួចជូនជីវាចូលគេហដ្ឋានប្អូនអើយប្អូនស្រីសូមប្អូនជួយបង មាសប្រាក់កែវកងរកស៊ីមានបានទោះទៅឆ្ងាយជិតសូមសុខក្សេមក្សាន្ត សត្រូវជិតប្រាណបរវាសជៀសឆ្ងាយ 
ថ្ងៃព្រហស្បតិ៍ ១៥ កើត ខែផល្គុន ឆ្នាំឆ្លូវ ត្រីស័ក ពស ២៥៦៥ត្រូវនឹងថ្ងៃទី17 ខែមីនា ឆ្នាំ2022»
រថយន្តស៊េរីថ្មីរបស់ ចំរើន សុភ័ក្ត្រ គឺជារថយន្តផលិតនៅក្នុងប្រទេសចិនម៉ូដែល Forthing T5 EVO មានតម្លៃជាង៣ម៉ឺនដុល្លារ នេះបើយោងតាមផេក Forthing ផ្នែកលក់រថយន្ត បានផ្សព្វផ្សាយនៅលើផេករបស់គេកាលពីថ្ងៃទី២០ ខែកុម្ភៈឆ្នាំ២០២២នេះ។
ក្រោយតារាចម្រៀងរូបនេះបានបង្ហោះចែករំលែករឿងរ៉ាវល្អៗក្នុងជីវិតរបស់ខ្លួន សម្រាប់បើកសករាជថ្មីនៃជីវិតនោះ មហាជនជាអ្នកគាំទ្រ និងមិត្តសិល្បករបាននាំគ្នាសាទរចំពោះជោគជ័យថ្មីមួយទៀតក្នុងជីវិតរបស់តារាស្រីរូបនេះ៕
ប្រភព៖ facebook ចំរើន សុភ័ក្រ្ត/Sopheak Chamroeun
