តារាសម្ដែង និងបង្ហាញម៉ូដ ទឹម រដ្ឋា បានសម្រេចចិត្តចូលរោងជ័យជាមួយស្វាមី នៅថ្ងៃទី ២៥ និងសំពះផ្ទឹមចងដៃនៅព្រឹកថ្ងៃទី ២៦ ខែមីនា ឆ្នាំ២០២២។ ស្វាមីអ្នកនាងក៏ត្រូវបានមហាជនមួយចំនួនស្គាល់ហើយថា គឺលោក Jovany Antonio ក៏ជាម្ចាស់ក្រុមហ៊ុនអចលនទ្រព្យទាំងក្នុងនឹងក្រៅប្រទេស។ អ្នកទាំងពីរបានចងស្នេហ៍ចងចិត្ត និងស្គាល់ពីគ្នាទៅវិញទៅមកអស់រយៈពេល ៦ឆ្នាំ។
តាមរយៈវីដេអូដែលបានបង្ហោះនៅលើបណ្ដាញសង្គមហ្វេសប៊ុកបានឱ្យឃើញថា ពិធីរៀបមង្គលការរបស់តារាសម្ដែងស្រីរូបនេះ ពិតជាអធឹកអធមបែបលំដាប់អភិជនមួយរូបនៅក្នុងស្រុក។ យ៉ាងណាមិញ អ្នកនាង ទឹម រដ្ឋា បានរៀបរាប់ថា៖ «ទីកន្លែងដែលនាងខ្ញុំ នឹងរៀបចំគឺស្ថិតនៅជាយក្រុងភ្នំពេញ ហើយមង្គលការនាងខ្ញុំ និងគូដណ្តឹង គឺជាគូស្វាមីភរិយាទី១ ដែលរៀបចំធ្វើនៅទីនោះតែម្តង។ តាមពិតទៅ នាងខ្ញុំមិនចង់លាក់បងប្អូនទេ គ្រាន់តែចង់ឱ្យមានការភ្ញាក់ផ្អើលបន្តិច សម្រាប់បងប្អូននិយមគាំទ្រវិស័យសិល្បៈនាងខ្ញុំ ហើយការសម្រេចចិត្តរៀបចំមង្គលការនៅឆ្នាំនេះ គឺចំពេលវេលាប្រារព្ធខួប ស្គាល់គ្នារវាងនាងខ្ញុំ និងគូដណ្តឹង រយៈពេល ៦ ឆ្នាំផងដែរ»។
ជាមួយគ្នានោះដែរ អ្នកនាង ទឹម រដ្ឋា ក៏បានរម្លឹកដែរថា ស្វាមីរបស់អ្នកនាងធ្លាប់បានពញ្ញាក់អារម្មណ៍អ្នកនាងម្ដងរួចមកហើយ កាលពីថ្ងៃអនុស្សាវរីយ៍នៃខួបចំណងស្នេហ៍ ៥ឆ្នាំ នៅលើទូកមួយដ៏ធំនៅកណ្ដាលសមុទ្រ។ ស្វាមីអ្នកនាងបានបំពាក់ចិញ្ចៀនរៀបការឱ្យអ្នកនាង ដែលជាសក្ខីភាពនៃស្នេហារបស់អ្នកនាង។ អ្នកនាងថា តាំងពីពេលនេះមក គឺខ្ញុំបានរៀបការជាមួយគាត់បាត់ទៅហើយ។ រហូតមកទល់ពេលគឺលើសពីភ្ញាក់ផ្អើលថែមទៀត។
ដោយឡែកគេបានដឹងថា ពិធីរៀបមង្គលការរបស់អ្នកនាង ទឹម រដ្ឋា គ្រោងនឹងមានតារាសិល្បៈប្រុសស្រីជាច្រើននាក់ចូលរួម ក៏ដូចជាអ្នកជំនួញ អ្នកមុខអ្នកការ ដើម្បីអបអរសាទរ ចំពោះថ្ងៃសិរីថ្ងៃជ័យរបស់អ្នកនាង ទឹម រដ្ឋា។ នៅមិនទាន់ដឹងថា អ្នកនាង ទឹម រដ្ឋា មានគម្រោងរៀបចំប៉ុន្មានតុនោះទេ។ ព័ត៌មានលម្អិត សារព័ត៌មានត្រយងនឹងជម្រាបជូនប្រិយមិត្តតាមក្រោយបន្ថែមទៀត៕
