អាមេរិក – អ្នកគាំទ្ររបស់ក្រុមចម្រៀង BTS ពិសេសអ្នកគាំទ្រដោយចំពោះសមាជិកក្រុមគឺ V ប្រាកដជារំភើបជាក់ជាមិនខាននៅពេលបានឃើញ Kim Taehyun (V) ដើរទៅរក Lady Gaga ដល់កន្លែងអង្គុយក្នុងកម្មវិធីប្រគល់ពានរង្វាន់ 2022 Grammy Awards។
នៅក្នុងវីដេអូនោះបុរសជាតារាចម្រៀងកូរ៉េបានដើរទម្លុះហ្វូងមនុស្សដើម្បីទៅរក Lady Gaga ហើយនៅពេលបានជួបនាងហើយនោះពួកគេបានឱបគ្នា។
ហ្វេនៗដែលបានឃើញរូបភាពចែករំលែកលើ Twitter បានបង្ហាញអារម្មណ៍វិជ្ជមានដោយបញ្ចេញជាមតិយោបល់ផ្សេងៗដូចជា «កក់ក្ដៅចិត្តណាស់» «គួរឱ្យស្រលាញ់ណាស់» ខណៈដែលមានអ្នកលេង Twitter ម្នាក់បានលើកឡើងថា ខ្លួនកំពុងតែស្រក់ទឹកភ្នែក។
ក្រៅពីឱបគ្នាហើយនោះអ្នកទាំងពីរថែមទាំងថតរូបជាអនុស្សាវរីយ៍រួមគ្នាហើយបានចែករំលែកនៅលើបណ្ដាញសង្គម Twitter ថែមទៀត ដោយរូបភាពនោះត្រូវបានអ្នកប្រើប្រាស់ Twitter លើកឡើងថា «នេះជារឿងដ៏ស្រស់ស្អាតបំផុតដែលបានកើតមានឡើង។»
សកម្មភាពរបស់ V កាន់តែបង្ហាញឱ្យឃើញពីភាពសំខាន់របស់ Lady Gaga ក្រោយក្រុម BTS ទាំងមូលធ្លាប់បានទទួលស្គាល់ថាពួកគេមានក្ដីសុបិនចង់ច្រៀងរួមជាមួយនឹង Lady Gaga។
ក្រោយទទួលបានដំណឹងចង់ច្រៀងរួមគ្នាខាងលើនេះហ្វេនៗបានហៅថា «គឺជាការផ្សំផ្គុំច្រៀងរួមគ្នាមួយដែលឋានសួគ៌ប្រទាន»
ងាកមកការប្រគល់រង្វាន់ឯណោះវិញ អ្នកគាំទ្រមួយភាគធំមិនសប្បាយចិត្តនោះទេដែល BTS មិនទទួលបានពានរង្វាន់ Group Performance award ហើយរង្វាន់បែរជាធ្លាក់ទៅលើ SZA និង Doja Cat ទៅវិញ៕
ប្រភព៖ Independent