ចិន – កាលពីអំឡុងឆ្នាំ២០១៧-២០១៩ ខណៈដែល Alexadre Pato ចេញទៅលេងឱ្យក្លិបបាល់ទាត់ Tianjin Quanjian ក្នុងក្របខណ្ឌ Chinese Super League បុរសដែលជាអតីតខ្សែប្រយុទ្ធក្រុមជម្រើសជាតិប្រេស៊ីលរូបនេះធ្លាប់ឈ្លក់វង្វេងនឹងសម្រស់របស់តារាស្រីចិន Dilraba Dilmurat យ៉ាងខ្លាំង។
រឿងរ៉ាវដែលក្លាយជាប្រវត្តិសាស្ត្រលំដាប់ប្រទេសនៅក្នុងពិភពបាល់ទាត់របស់ប្រទេសចិន ហើយក្លាយជាដំណឹងផ្អើលពិភពលោកនោះគឺដោយសារតែខ្សែប្រយុទ្ធក្រុមសាំបា ធ្លាប់បានចេញមកសារភាពថាខ្លួនបានធ្លាក់ក្នុងអន្លង់ស្នេហ៍របស់ «Dilraba» តារាសម្ដែង Super Star លំដាប់ប្រទេសរបស់ចិន ក្រោយបានឃើញកញ្ញានៅក្នុងកម្មវិធីទូរទស្សន៍មួយ។
កាលណោះ Pato បានចេញមកនិយាយថា Dilraba គឺជានារីម្នាក់ដែលស្អាតបំផុត ហើយបើទោះជាពេលនេះកញ្ញានៅមិនទាន់ចាប់អារម្មណ៍លើខ្លួន តែលោកជឿថាបើសិនលោកអាចស៊ុតបាល់បញ្ចូលទីបានញឹកញាប់ នាងអាចនឹងងាកមកចាប់អារម្មណ៍ចំពោះលោកនៅថ្ងៃណាមួយ។ នេះបើយោងតាមការបង្ហោះរបស់ Pato នៅលើបណ្ដាញទំនាក់ទំនងសង្គម Weibo របស់ចិន។
ក្រោយព្យាយាមតាមស្នេហ៍ Dilraba តួឯកស្រីពីភាពយន្ត «You Are My Glory» អស់រយៈពេល៥ខែតែគ្មានលទ្ធផល Pato ក៏សម្រេចចិត្តដកចិត្តចេញពីស្នេហាតែម្ខាងហើយងាកទៅសេពគប់នារីម៉ូដែលកាណាដាវិញ។
គួរដឹងថា Dilraba គឺជាតារាសម្ដែងចិនវ័យ២៩ឆ្នាំ មានស្រុកកំណើតនៅស៊ិនជៀង ជានារីជនជាតិចិនគោរពបូជាសាសនាអ៊ីស្លាម ដោយសារតែមានមុខមាត់ស្អាត ភ្នែកធំ ច្រមុះស្រួច ស្បែកសរលោងធ្វើឱ្យនារីរូបនេះសាងបានភាពល្បីល្បាញយ៉ាងឆាប់រហ័សក្នុងអាជីពសម្ដែង។
សម្រាប់សមិទ្ធិផលភាពយន្តល្បីៗរបស់ Dilraba ដែលប្រិយមិត្តទស្សនិកជនបានស្គាល់និងទស្សនាមានដូចជា « Eternal Love of Dream ឬ សុបិនស្នេហ៍ទេវតាបីជាតិ», «Chang Ge» និង «You Are My Glory» ចាប់ដៃគូសម្ដែងជាមួយនឹងបុរសសង្ហា Yang Yang ផងដែរ៕