ថៃ – មុននឹងផ្ទុះរឿងអាស្រូវត្រូវនារីម្នាក់ប្រកាសបកអាក្រាតថាបានលួចលាក់បង្កាត់ភ្លើងស្នេហ៍ជាមួយនឹងគ្នានោះ ព្រះសង្ឃល្បីឈ្មោះដែលជាតារា Tiktok ផ្នែកទេសនា ធ្លាប់ជាអតីតអ្នកចម្រៀងប្រកួតកម្មវិធីដ៏ល្បីមួយរបស់ថៃ។
ក្លាយជាដំណឹងក្ដៅគគុកមួយក្រោយពេលនារីម្នាក់បានចេញមកបង្ហាញភស្តុតាងសំឡេងសន្ទនារផ្សេងៗហើយអះអាងថាមានសម្ព័ន្ធភាពស៊ីជម្រៅជាមួយនឹងព្រះសង្ឃពូកែទេសនាមានឈ្មោះល្បីល្បាញលើ Tiktok គឺលោកបង កាតុ ឬភិក្ខុផុងស័ក្តិកន នាខេត្តនគររាជសីម៉ា ប៉ុន្តែនៅពេលខាងស្រីបានចេញមកសុំទោសគ្រប់ៗគ្នាហើយបានសារភាពថាខ្លួនបង្កើតរឿងនេះឡើងមកព្រោះតែមានជំងឺ បៃផូឡា (Bipolar) ពិសេសមានស្មារតីមិនប្រក្រតី។
សម្រាប់ប្រវត្តិរបស់ព្រះតេជគុណខាងលើនេះស្ថិតនៅភូមិភាគខាងត្បូងមានព្រះនាមថាកាតុ បច្ចុប្បន្នមានអាយុ២៣ឆ្នាំ ជាអ្នកស្រុកនគររាជសីម៉ា បានបួសតាមសន្យាជាមួយនឹងម្ដាយដែលកើតជំងឺមហារីក មុននេះព្រះសង្ឃអង្គនេះទទួលបានកូតាសិក្សាជំនាញនីតិសាស្ត្រ ប៉ុន្តែបានបោះបង់ចោលការសិក្សាវិញដើម្បីមកមើលថែម្ដាយមានជំងឺ។
តាំងតែអាយុ៧ឆ្នាំ ព្រះសង្ឃកាតុគឺជាអ្នករកប្រាក់ចាយវាយក្នុងផ្ទះនិងព្យាបាលម្ដាយដែលឈឺធ្ងន់ មិនថាសម្ដែង ក្រោយមកបានជួបនិងស្គាល់ព្រឹទ្ធាចារ្យចម្រៀងលូកធុង ទើបបានហ្វឹកហាត់រៀនរហូតមានលទ្ធភាពបើកក្រុមមួយខ្លួនឯង ត្រឹមអាយុ១៣ឆ្នាំប៉ុណ្ណោះ។
ក្រៅពីមានក្រុមសម្ដែងជារបស់ខ្លួនឯងផ្ទាល់ហើយនោះ ព្រះសង្ឃអង្គនេះធ្លាប់ជាតារាចម្រៀងប្រកួតកម្មវិធី «ไมค์ทองคำ 7» របស់ស្ថានីយទូរទស្សន៍ Workpoint ផងដែរ។ នៅក្នុងកម្មវិធីនោះលោកកាតុ បានប្រាប់ថាខ្លួនត្រូវមើលថែម្ដាយមានជំងឺមហារីកសួត មួយថ្ងៃប្រើប្រាស់ថ្នាំមួយគ្រាប់ៗតម្លៃ៧០០បាត ដូច្នេះត្រូវធ្វើការងារធ្ងន់ដើម្បីបានប្រាក់ព្យាបាលម្ដាយដើម្បីឱ្យម្ដាយបានមានក្ដីសុខជាមួយនឹងខ្លួន។ក្រោយពីដើរតាមក្ដីសុបិនធ្វើជាអ្នកចម្រៀងកាលពី៤ឆ្នាំមុន ព្រះសង្ឃកាតុបានសម្រេចចិត្តបួសសងគុណម្ដាយ។
ព្រះសង្ឃអង្គនេះចាប់ផ្ដើមល្បីល្បាញលើបណ្ដាញសង្គម Tiktok ដោយការប្រើប្រាស់តិចនិកពីការបញ្ចូលសំឡេងមកប្រើប្រាស់ក្នុងការទេសនាអប់រំធម៌តាមរយៈអនឡាញ ថែមទាំងមានការបញ្ចេញបញ្ចូលភាពកំប្លុកកំប្លែង ត្រូវចិត្តយុវវ័យ ធ្វើឱ្យមានឈ្មោះបោះសំឡេងខ្លាំងរវាង១ឆ្នាំទៅ២ឆ្នាំនេះ៕
ប្រភព៖ Khaosod
