កូរ៉េ – អ្នកគាំទ្រនិងអ្នកលេងបណ្ដាញសង្គមកំពុងតែខឹងសម្បារចំពោះរឿងដែលកើតឡើងចំពោះ Holland តារាចម្រៀង K-pop ធ្លាប់ចេញមកបង្ហើបឱ្យដឹងថាខ្លួនជាក្រុមមនុស្សស្រលាញ់ភេទដូចគ្នា ដោយសារគេត្រូវមនុស្សមិនស្គាល់វាយនិងជេរប្រមាថ។
កាលពីឆ្នាំ២០១៨ Holland គឺជាអាយដល K-pop ដំបូងដែលហ៊ានចេញមកបង្ហើបឱ្យដឹងថាខ្លួនជា Gay ក្រៅពីមិនទទួលរងការស្អប់ខ្ពើមនិងរើសអើង តារារូបនេះថែមទាំងទទួលបានការគាំទ្រយ៉ាងខ្លាំងពីអ្នកគាំទ្រ យ៉ាងណាមិញថ្មីៗនេះ Holland បានចេញមកទម្លាយថាខ្លួនបានជួបប្រទះហេតុការណ៍ដ៏គួរឱ្យតក់ស្លុតនិងសោកសៅចិត្តជាទីបំផុត ពាក់ព័ន្ធនឹងការរើសអើងភេទ។
នៅលើបណ្ដាញសង្គម Holland បានសរសេររៀបរាប់ថា៖ «គេកំពុងរងរបួសទាំងផ្នែករាងកាយនិងអារម្មណ៍ដោយសារតែពាក្យសម្ដីរបស់មនុស្សមិនស្គាល់គ្នានៅតាមបណ្ដោយផ្លូវ Itaewon ក្នុងក្រុង Seoul ព្រមជាមួយនឹងរូបថតរបួសចេញឈាមលើខ្ទង់ច្រមុះ»។ Holland បានសរសេរបន្តទៀតថា៖ «ក្នុងខណៈដែលខ្លួនកំពុងតែដើរកម្សាន្តជាមួយនឹងអ្នកចាត់ការនិងមិត្តៗ ស្រាប់តែត្រូវមនុស្សមិនស្គាល់ម្នាក់មកដាល់ចំកណ្ដាលមុខចំនួន២ដង ថែមទាំងស្រែកហៅគេថា «អាខ្ទើយកខ្វក់»។
ក្រោយរងរបួស Holland បានចេញមកបង្ហើបថាខ្លួនបានដាក់ពាក្យប្ដឹងចំពោះអាជ្ញាធររួចរាល់ហើយ ហើយលោកក៏សង្ឃឹមដែរថារឿងក្ដីនេះនឹងឆាប់ដោះស្រាយបានយ៉ាងឆាប់រហ័ស លោកថែមទាំងនិយាយថាលោកខឹងយ៉ាងខ្លាំង ហើយក៏សង្ឃឹមណាស់ដែរ។
«នេះគឺជាបទល្មើសព្រហ្មទណ្ឌដែលអាក្រក់បំផុត ទោះជាខ្ញុំនិយាយថាខ្លួនឯងជា Gay តែខ្ញុំមិនគួរជួបនឹងហេតុការណ៍ហិង្សាបែបនេះឡើង ក្រុមមនុស្ស LGBT ស្ត្រី និង ក្រុមមនុស្សដែលមានឱកាសតិចតួចក្នុងពិភពលោកនេះក៏ដូចគ្នា។ ពិសេសហេតុការណ៍នេះកើតឡើងនៅឆ្នាំ ២០២២ ដូច្នេះបានបង្ហាញឱ្យឃើញការពិតដែលគួរឱ្យសោកសៅចិត្តបំផុតចំពោះសិទ្ធិមនុស្ស»
ចុងក្រោយ Holland បានបន្ថែមទៀតថា មិនគួរមានមនុស្សណាម្នាក់សមនឹងទទួលការប្រមាថដូចគ្នានេះទេ លោកសង្ឃឹមថាពិភពលោកនឹងពោរពេញដោយក្ដីស្រលាញ់ និងក្ដីសង្ឃឹម ជំនួសឱ្យការប្រើហិង្សានិងការស្អប់គ្នាវាយប្រហារគ្នា៕
ប្រភព៖ Allkpop