ក្រសួងសាធារណការនិងដឹកជញ្ជូន បានជូនដំណឹងស្ដីពី ការដាក់ឲ្យដំណើរការដកពិន្ទុបណ្ណបើកបរ និងការបង់ប្រាក់ពិន័យអន្ដរការណ៍ចំពោះបទល្មើសច្បាប់ ស្ដីពីចរាចរណ៍ផ្លូវគោក ដោយប្រើប្រាស់ឧបករណ៍បច្ចេកទេស។ ទន្ទឹមនឹងនេះ ក្រសួងក៏បានប្រាប់ឲ្យអ្នកបើកបរយានជំនិះត្រូវដាក់បណ្ណបើកបរច្បាប់ដើមតាមខ្លួន ដើម្បីឲ្យនគរបាលងាយស្រួលនៅក្នុងការត្រួតពិនិត្យ នៅពេលមានបទល្មើសផ្សេងៗ។
នៅក្នុងសេចក្ដីជូនដំណឹងចុះកាលបរិច្ឆេតថ្ងៃទី៩ សីហា ២០២២ បានឲ្យដឹងថា កម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្ដរការណ៍ចំពោះបទល្មើសច្បាប់ ស្ដីពីចរាចរណ៍ផ្លូវគោក ដោយប្រើប្រាស់ឧបករណ៍បច្ចេកទេស គឺក្នុងគោលបំណងបង្កើនប្រសិទ្ធភាព នៃការរឹតបន្ដឹងកអនុវត្តច្បាប់ស្ដីពីចរាចរណ៍ផ្លូវគោក សំដៅកាត់បន្ថយគ្រោះថ្នាក់ចរាចរណ៍ និងធានាតម្លាភាពក្នុងការពិន័យចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក។
តើនីតិវិធីនៃការដកពិន្ទុនេះ ធ្វើយ៉ាងដូចម្ដេចខ្លះ ហើយចាប់ផ្ដើមនៅពេលណា? តាមសេចក្ដីជូនដំណឹងបានបញ្ជាក់ចំនួន៣ចំណុច គឺ៖
១. កម្មវិធីដកបណ្ណបើកបរ និងការបង់ប្រាក់ពិន័យអន្ដរការណ៍ចំពោះអំពើល្មើសច្បាប់ស្ដីពីចរាចរណ៍ផ្លូវគោក ដែលរៀបចំដោយក្រសួងមហាផ្ទៃ និងក្រសួងសាធារណការ និងដឹកជញ្ជូន នឹងដាក់ឲ្យដំណើរការអនុវត្តសាកល្បងនៅទូទាំងប្រទេស ចាប់ពីថ្ងៃទី ១ ខែកញ្ញា ២០២២នេះតទៅ ហើយនឹងដំណើរការអនុវត្តពេញលេញនៅថ្ងៃទី០១ ខែមករា ឆ្នាំ២០២២។
២.ការដកពិន្ទុបណ្ណបើកបរ និងការពិន័យអន្ដរការណ៍ចំពោះអំពើល្មើសស្ដីពីចរាចរណ៍ផ្លូវគោកត្រូវបានអនុវត្តដោយឧបករណ៍បច្ចេកទេស ដើម្បីកត្រាព័ត៌មានរក្សាទុកក្នុងប្រព័ន្ធ។ ដូចនេះសូមអ្នកបើកបរយានយន្ដគ្រប់រូបយកតាមខ្លួននូវបណ្ណបើកបរយានយន្ដ (ច្បាប់ដើម) ដើម្បីផ្ដល់ជូនសមត្ថកិច្ចត្រួតពិនិត្យ និងអនុវត្តការដកពិន្ទុ ក្នុងករណីមានការប្រព្រឹត្តិល្មើសច្បាប់ស្ដីពីចរាចរណ៍ផ្លូវគោក។
៣.ការបង់ប្រាក់ពិន័យអន្ដរការណ៍ចំពោះអំពើល្មើសស្ដីពីចរាចរណ៍ផ្លូវគោក អាចបង់ប្រាក់នៅតាមបញ្ជរទ្រូម៉ាន់នី ឫតាមប្រព័ន្ធស្វ័យប្រវត្តិកម្មរបស់ក្រុមហ៊ុនទ្រូម៉ាន់នី បន្ថែមលើការបង់ប្រាក់ដោយផ្ទាល់នៅស្នាក់ការនគរបាលចរាចរណ៍ផ្លូវគោក។
