តើមានរឿងអ្វីកើតឡើង មួយរយៈចុងក្រោយនេះមិនឃើញ Lady Prang ឬ ប្រាង កាន់យ៉ៈណៈរ៉ាន់ ទៅណាមកណា ពាក់ចិញ្ចៀនភ្ជាក់ពាក់ដូចពីមុនទៀតនោះឡើយ ចំណែកគូដណ្ដឹងដែលជាតារាចម្រៀង Rapper ល្បី Tong Twopee ក៏បាត់ខ្លួនមិនឃើញទៅចូលរួមកម្មវិធីសន្និសីទកាសែតខនសឺត Rapper Wars ក្រោយផ្ទុះដំណឹងស្នេហាប្រេះឆារវាងអ្នកទាំងពីរផងដែរ។
សម្រាប់អ្នកគាំទ្រនៅកម្ពុជាបើនិយាយពី Lady Prang មិនសូវជាស្គាល់ច្រើននោះទេ ប៉ុន្តែបើនិយាយពី Maeying Panward អ្នកគាំទ្រជាច្រើនស្គាល់ច្បាស់ណាស់ ព្រោះគ្មានអ្នកណាមិនស្គាល់តួអង្គសំខាន់មួយក្នុងរឿងបុព្វេសន្និវាសនោះឡើយ។ យ៉ាងណាមិញថ្មីៗនេះមានដំណឹងចចាមអារ៉ាមផ្សព្វផ្សាយនៅលើបណ្ដាញសង្គមក្រោយមានផេកមួយបានចេញមកផុសទាក់ទងនឹងគូស្នេហ៍តារាល្បី បង្ហាញសញ្ញាប្រេះឆា បន្ទាប់ពីខាងប្រុសលុតជង្គង់សុំរៀបការកាលពីចុងឆ្នាំមុន។ ដំណឹងនេះធ្វើឱ្យអ្នកតាមដានជាច្រើនដាក់ការសង្ស័យទៅគូ Lady Prang និង Tong Twopee ព្រោះមានអ្នកសង្កេតឃើញថាខាងស្រីបានចុច Unfollow Instagram ភាគីខាងប្រុស ប៉ុន្តែមិនដល់មួយម៉ោងក្រោយខាងស្រីបានត្រលប់មកចុច Follow ដូចមុនវិញ។ ចំពោះករណីនេះមានអ្នកខ្លះលើកជាសំនួរថា តើព្រោះតែចុចច្រឡំ ឬ មួយតាំងចិត្តចុច Unfollow លែងចង់តាមដាន Tong Twopee មែនទែន។
រឿងរ៉ាវនេះកើតឡើងព្រោះតែមានអ្នកទាញតារាសម្ដែងរូបសង្ហា Film Thanaphat ថាមានពាក់ព័ន្ធនឹងករណីស្នេហាប្រេះឆាលើកនេះផងដែរ ព្រោះកន្លងមកអ្នកទាំងពីរសម្ដែងរឿងជាមួយគ្នាដូច្នេះហើយមានការចុច Like លើ IG និងចុច Tag រូបភាពឱ្យគ្នាទៅវិញទៅមក។ មនុស្សមួយភាគធំយល់ថាភាពស្និតស្នាលរវាងតារាទាំងពីរនេះគឺព្រោះតែអ្នកទាំងពីរសម្ដែងរឿងជាមួយគ្នាដូច្នេះធ្វើបែបនេះគឺជាការ Promote រឿងឱ្យមានទស្សនិកជនចាប់អារម្មណ៍ចង់តាមដានរឿងដែលទាំងគូសម្ដែងរួមគ្នាប៉ុណ្ណោះ។
យ៉ាងណាមិញក៏មានអ្នកចេញមកវិភាគពាក់ព័ន្ធទៅនឹងចិញ្ចៀនភ្ជាប់ពាក្យនៅលើដៃខាងឆ្វេងរបស់ Lady Prang ថាមួយរយៈកន្លងមកនេះមិនឃើញកញ្ញាពាក់ដូចកាលពីលើកមុនឡើយមិនថានៅថ្ងៃដើរកម្សាន្តឬណាត់គ្នាញ៉ាំអាហារជាមួយនឹងមិត្តភក្ដិមិនពាក់ព័ន្ធនឹងចេញទៅសម្ដែងរឿងក៏មិនឃើញពាក់ដែរ។ ប៉ុន្តែចំពោះករណីនេះក៏មានអ្នកលើកឡើងដែរថាអាចមានហេតុផលផ្ទាល់ខ្លួនដូចជាខ្លាចជ្រុះបាត់ទើបដោះរក្សាទុក ព្រោះចិញ្ចៀនមិនមែនតម្លៃទាបនោះទេ ចាំដល់ថ្ងៃសំខាន់ចាំយកមកពាក់ដើម្បីសុវត្ថិភាព។
ប៉ុន្តែកាលពីថ្ងៃទី៨ ខែសីហា ឆ្នាំ២០២២ ម្សិលមិញនេះនៅក្នុងកម្មវិធីសន្និសីទកាសែត ស្រាប់តែមិនឃើញមានវត្តមាន Rapper Tong Twopee ចូលរួមឡើយទោះជាដំបូងឡើយមានឈ្មោះតារារូបនេះចូលរួមក្នុងកម្មវិធីលើកនេះក្ដី ហើយម្ចាស់ខ្លួនក៏មិនបានបញ្ជាក់មូលហេតុដែលខ្លួនអវត្តមានក្នុងកម្មវិធីនេះនោះដែរ។
ចំពោះរឿងរ៉ាវស្នេហាប្រេះឆារបស់អ្នកទាំងពីរនេះនៅមិនទាន់អាចសន្មតបានថាពិតឬក្លែងក្លាយប៉ុន្មានភាគរយដែរ លុះត្រាតែសាមីខ្លួនទាំងពីរចេញមកបញ្ជាក់អះអាងទើបដឹងថាការពិតគឺជាអ្វី។ បើងាកទៅចាប់អារម្មណ៍ IG របស់ Lady Prang និង Tong មិនឃើញមាននិយាយអ្វីដល់រឿងរ៉ាវស្នេហាប្រេះឆាលើកនេះនោះឡើយ។ Lady Prang កំពុងតែដើរកម្សាន្តយ៉ាងរីករាយនៅលើកោះភីភី ខេត្តក្រាក់ប៊ី ចំណែកកំលោះ tong ក៏ទើបតែផុស Story ហើយមើលទៅក៏មិនពាក់ព័ន្ធនឹងរឿងស្នេហានោះដែរ ព្រោះជារូបភាពលើករាសីនបន្ថែមលាភជ័យឱ្យដល់ម្ចាស់ខ្លួនរកស៊ីមានបាន។
សូមទស្សនាវីដេអូ ៖
