យោងតាមសារព័ត៌មាន Yonhap កំពូលតារាសម្ដែងនិងតារាកូរ៉េជាច្រើនរូបបានចូលរួមបរិច្ចាគដើម្បីជួយដល់ជនរងគ្រោះដោយសារជំនន់ទឹកភ្លៀងកាលពីពេលថ្មីៗនេះដែលបណ្ដាលឱ្យមនុស្សស្លាប់១៥នាក់ និងមនុស្សជិត១៦០០នាក់ត្រូវបង្ខំចិត្តភៀសខ្លួនចាកចេញពីផ្ទះរបស់ពួកគេ។ តើតារារូបណាខ្លះដែលបានចេញមុខជួយសង្គ្រោះដល់ប្រជាជនកូរ៉េដែលកំពុងតែរងផលប៉ះពាល់ដោយសារជំនន់ទឹកភ្លៀងលើកនេះ?
តារាសម្ដែងរូបសង្ហាដែលប្រិយមិត្តកម្ពុជានិងគាំទ្រតាមរយៈរឿងភាគកូរ៉េ «Itaewon Class» និង «What’s wrong with secretary Kim» បានបរិច្ចាគថវិកាផ្ទាល់ខ្លួន១០០លានវ៉ុន (US$ ៨៣,៩២៧) ទៅដល់មូលនិធិសម្រាលគ្រោះអាសន្ននៃសមាគមសម្រាលគ្រោះមហន្តរាយកូរ៉េ។
ចំណែកកពូលតារាកំប្លែងនិងពិធីករល្បី Yoo Jae Suk ក៏បានបរិច្ចាគថវិកា១០០លានវ៉ុនដូចគ្នាដែរ។ សម្រាប់ប្រុសស្អាតញញឹមស្រស់ Song Jung Ki តារាសម្ដែងរឿង «ម្ចាស់ព្រះអាទិត្យ» និង «Vincenzo» តារាសម្ដែង Yoo In Na តារាចម្រៀង Jang Yoon Jeong, Kim Jung Kook និងតារាទូរទស្សន៍ Jang Sung Kyu បានបរិចា្ចគម្នាក់៥០លានវ៉ុនទៅកាន់មូលនិធិខាងលើនេះដូចគ្នា។
យូ អ៊ិនណា ចាង យូនជុង
មកដល់ពេលនេះរបាយការណ៍ខូចខាតទ្រព្យសម្បត្តិទាំងឯកជននិងសាធារណៈបានបន្តកើនឡើងជាលំដាប់សរុបសម្បត្តិសាធារណៈនិងឯកជនដែលរងផលខូចខាតទូទាំងប្រទេសមានរហូតដល់ ៤២៨១កន្លែង។ ផ្ទះរបស់ប្រជាជនចំនួន១៣០០ខ្នង ព្រមទាំងឃ្លាំង ក៏ដូចជាកសិដ្ឋានចិញ្ចឹមគោសរុប៧០៥កន្លែងក័៏ត្រូវលេបត្របាក់ឬកប់ក្រោមគំនរភក់ដែរ។ ចំណែកកំនើនអ្នកស្លាប់កំពុងតែមានការព្រួយបារម្ភថានឹងអាចកើនឡើងព្រោះនៅមានមនុស្ស១១នាក់ផ្សេងទៀតបាត់ខ្លួនដោយសារទឹកជំនន់គួចផាត់និងរអិលបាក់ដី។
គីម ជុងគុក ចាង សុងខ្យូ
បើយោងតាមសារព័ត៌មាន Koreaboo បានឱ្យដឹងថាក្រៅពីកំពូលតារាខាងលើនេះហើយ សូម្បីតែហ្វេនៗដែលជាអ្នកគាំទ្រចំពោះ Idol ជាតារារ៉េបានចេញមកចូលរួមឧបត្ថម្ភប្រាក់ដោយប្រើឈ្មោះតារាដែលខ្លួនគាំទ្រផងដែរ ក្នុងនោះក្រុមអ្នកគាំទ្ររបស់ Jimin សមាជិក BTS ដែលមានឈ្មោះថា Adelio បានឧបត្ថម្ភទៅមូលនិធិសម្រាលគ្រោះមហន្តរាយជាតិស្ពាននៃក្ដីសង្ឃឹមដើម្បីជួយដល់ជនរងគ្រោះដោយទឹកជំនន់។ «ពួកខ្ញុំបានបរិច្ចាគជួយដល់អ្នកដែលកំពុងតែរងគ្រោះដ៏ច្រើនដោយសារតែទឹកជំនន់តាមរយៈឈ្មោះរបស់ Jimin។ ពួកខ្ញុំសង្ឃឹមថាអាចជួយបានខ្លះទោះជាមានចំនួនតិចតួចក្ដី ហើយពួកខ្ញុំក៏សង្ឃឹមថាទឹកភ្លៀងនឹងឆាប់រាំង ដើម្បីទប់ស្កាត់ការខូចខាតផ្សេងៗទៀត។ ក្រុមអ្នកគាំទ្ររបស់ Jimin មួយផ្នែកទៀតដែលមានឈ្មោះថា MYJIMINE បានឧបត្ថម្ភដល់មូលនិធិសម្រាលគ្រោះមហន្តរាយដូចគ្នា ដោយពួកគេបានលើកឡើងថា «ពួកខ្ញុំបានបរិច្ចាគដោយប្រើប្រាស់ឈ្មោះរបស់ Jimin។ ទោះជាចំនួនមួយតិច ក្ដី តែខ្ញុំសង្ឃឹមថានឹងអាចជួយបានខ្លះ ហើយពួកខ្ញុំក៏សង្ឃឹមដែរថាលើកក្រោយនឹងអាចបរិច្ចាគកាន់តែច្រើនជាងនេះ។
ជំនន់ទឹកភ្លៀងដ៏អាក្រក់ដែលបង្កឱ្យកើតមានគ្រោះមហន្តរាយក្នុងរយៈពេលជាង៨០ឆ្នាំប្រទេសកូរ៉េនេះបានកើតឡើងកាលពីយប់ថ្ងៃអាទិត្យទី៧ឈានចូលថ្ងៃច័ន្ទ៨ ខែសីហា ឆ្នាំ២០២២៕